Fandun fa Wasur ro Ḇaḇerurya Ke?

1, 2. (a) Rariso ḇardadi ro Yesaya 60:22 ndarirya ḇeri ro ras-ras ḇepupes ine? (b) Fandandun rosai naisya ro Yahwe organisasi ḇyedi ro supswan ine?

”ḆEBORḆA sya nari sḇesyaran, ma ḇekasun sya nari sḇe er ḇesambraḇ kaku.” (Yes. 60:22) Wos nane ndarirya kwar ro kirine ro ras-ras ḇepupes ya. Kaku ya, ro taun 2015, Saksi Yahwe ri 8.220.105 sisya sḇaryas ankankinem ḇeḇye Karajan ro supswan ḇesiper! Allah ḇyardi kwar barbor ro kawasa ḇyesi, ”Aya, Yahwe, nari yafrur fasawna ro fafisu ya.” Inja ro fafisu ine, nari fararur nabor kaku naisya fa kofrurna. Kirine kofrur nabor kwar ro ḇaḇeḇaryas ma koḇuk farkarkor kuker ankankinem ḇeḇye ya ke? Naek srar sibor sisun kwar ro fararur perintis biasa ḇaido perintis ekstra. Ḇeḇeso sya sra fa sḇarek ro moḇ ḇesena insama sifnoḇek fararur ḇaḇeḇaryas ro dia, ma ḇesesya sfararur samḇraḇ ro ḇaḇawes Balai Karajan ya.

² Ro taun oser, fanam ḇe 2.000 sidang ḇebabo neḇefrur. Sidang ansine sefandun penatua ma hamba pelayanan. Ro taun oser, hamba pelayanan risyaran fandun fa sḇe penatua ma naek risyaran ḇesesya fandun fa sḇe hamba pelayanan. Kaku ḇeri, ’roi nabor nasya fa sifrur ro fararur ḇe Tuan’, ma ine faro naek sya monda ḇa, ḇape faro srar sya kako.​—1 Kor. 15:58, NW.

ROSAI SFANDUNNA FA SISUR RO ḆAḆERURYA?

3, 4. Rosai fandun fa wafrur ya insama wasur ro ḇaḇerurya?

³ Wasya 1 Timotius 3:1. Manwawan Paulus idif ḇar naek ”ḇemarisen” sya fa sḇe manfarkin. Snonkaku imḇe dun roi oso ḇebinkwanbur i ido, fandun fa ḇyensewar kaku ryes ḇramin ḇyedi fa duni. Kirine wawasen kada, naek oso imarisen fa ḇye hamba pelayanan. Fyawi fandun fa ifrur mnis rari-rari Kristen ḇyena. Ramnai, fyarmyan ḇe hamba pelayanan kwar ido, fyararur sambraḇ pdef insama ḇye manfarkin.

⁴ Naek ma srar ḇeḇeso sifrur fararwe ro kankenem sena snaro simarisen sifrur nabor syadiwer fa sifarmyan ḇe Yahwe I. Imnis raris, imbude simarisen sḇe perintis, sfararur ro Betel, ḇaido sifnoḇek fararur ḇaḇawes Balai Karajan. Mkorama komam rariso Refo ifnoḇek kokam fa kosur pdef ro ḇaḇerurya.

KOSUR PDEF RO ḆAḆERURYA

5. Rariso na romawa babo sya sḇuk samamḇraḇ sena ro fararur Karajan ya?

⁵ Romawa babo sya bisa fa sifrur roi naborwer ro fararmyan sena ḇe Yahwe I snaro sbabo kaker ma sisambraḇ. (Wasya Amsal 20:29.) Naek ḇe romawa babo ḇeḇeso ro Betel sya sifrur syap-syap ma Refo na. Naek ma srar ḇebabo ḇebor sya sḇawes ḇaido sifnoḇek fa sifrur mnis Balai Karajan na. Ḇeḇeso sya simarisen sḇuk oras sena fa sifnoḇek naek srar ḇesmai susa snaro rim ḇeba. Ma ḇebor ro romawa babo ḇe perintis sya sfarkor wos ḇesena ḇaido sifrur marandan ḇe moḇ ḇese fa sḇaryas ankankinem ḇeḇye ya.

6-8. (a) Rariso snonkbor oso fyadwer mamam ḇyedi faro fararmyan ḇe Allah, ma rosai ḇefnai ya? (b) Rariso na ’koḇaḇir ma komam snar Yahwe ima ḇyenaḇye’?

⁶ Koswar Yahwe ma komarisen koḇuk samambraḇ koḇena ḇesiper ḇe I. Imbude, na koḇaḇir imnis raris naek Aaron ḇyaḇir na. Imarisen fa fyarmyan ḇe Allah, ḇape isma raryaḇ ḇa. Aaron ryaḇe fananjur ma iso ro ḇaḇeḇaryas rofyor ḇyabo kaker rariryano, ikofen, ”Yamam ḇoi fananjur ma fararur ḇaḇeḇaryas inema nafrur papum ra.” Inja, rosai ifrur ya?

⁷ Aaron ḇyensewar kaku fa iwasya myaren Refoya, ifrur fasasos faro fananjurya, ma ḇyuk kankarem ro diwa. I kako ḇyenadi faswef. Nanekam nafnoḇek i fa isur ro ḇaḇerurya. Myamḇir ma iswar kaku Yahwe I. Bon ya iso, Aaron ḇyaḇir isma aski ḇeba kaku. Ḇye perintis ma ifnoḇek snonkaku ḇesmai susa snar rim ḇeba, ma ifrur marandan ḇe sup ḇese fa ḇyaryas ro diwa. Kirine ḇye penatua kwar ma fyarmyan ro Betel. Rariso sneḇaḇir ḇyedi kuker kankenem ḇyedi? Aaron ikofen, ”Yaḇaḇir kaku ma yamam kwar snar Yahwe ima ḇyenaḇye kaku. Snaro ḇarakas ḇyedi, yaḇaḇir yaḇenyaki ḇe I ma yamarisen fa yafrur nabor syadiwer ro fararmyan, ma ine nḇuk ḇarakas ḇebor syadiwer.”

⁸ Manḇefas mazmur doḇe, ”Ḇaḇir ma mam kada snar Yahwe ima ḇyenaḇye.” Ikofen wer, ”Snonkaku ḇesewar Yahwe I, nari sipok seananjar roi ḇeḇyeya ḇa.” (Wasya Mazmur 34:8-10.) Kakuḇae, rofyor koḇuk samambraḇ koḇena ḇesiper ḇe Yahwe I ido, nari kosma aski snaro kofawi kofrur fa imarisen. Ma nari ifrur mnis asas ḇyena fa myamfaduru ko pdef.

WASUSU AWER

9, 10. Rosai ḇefnai fandun ḇe au fa wawaf kuker kaḇaḇaḇ?

⁹ Imbude komarisen kofrur naborwer ro fararmyan koḇena ḇe Yahwe I. Ḇape rariso rofyor kowaf kawan kwar fa kosma fakamaman oso ro sidang ḇaido kowaf fafisu ro kankenem koḇena nefararwe? Imbude fandun fa koḇekaḇaḇaḇ. (Mi. 7:7) Yahwe imbude na ryir wararu fafisu oso isya pdef ro kankenem koḇena rariryano, kokyar kaku nari isonem ko ḇesya kwar. Na kofarkor ro Abraham farari ḇyena. Yahwe ḇyeasas nari ḇyuk romawa oso ḇe i, ḇape fandun fa iwaf kawan kaku rofyor Ishak ḇyeḇeaḇen ḇaim. Ro swaf ani, Abraham kyaḇaḇaḇ ma myamwarek kakyar ḇyedi ḇe Yahwe fa napromes ḇa.​—Kej. 15:3, 4; 21:5; Ibr. 6:12-15.

¹⁰ Kakuḇae, napyan ḇa beko fa kowafe. (Ams. 13:12) Ḇape rofyor kokara ker fafisu kosmana ma sne ḇefafafko koḇena, nari koryaḇ werḇa. Imbape, na koḇuk swaf kowaf ya fa kofrur mnis kenem koḇena insama kosyus fa kosma fakamaman oso ro sidang.

11. Rari ḇepyum rosai bisa fa konana, ma rosai ḇefnai fa ine nefandun kaku?

¹¹ Nwa rari-rari ma samambraḇ wafandunna. Kuker wawasya Refo ma wawasen rosai wawasya na, na wafawi nanem, nwa kakara ḇemnis, ma wafrur snemuk ḇepyum. Kaku ya, naek sya fandun fa sna rari ma samambraḇ ḇeradine fa smamfaduru sidang. (Ams. 1:1-4; Tit. 1:7-9) Rofyor kofarkor Refo, na kofawi rariso Yahwe sneḇaḇir ḇyedi faro roi nakam. Inja ro ras ḇe ras, na koḇuk rosai kofarkor kwarna insa kofrur snemuk ḇeyun marisen ḇe Yahwe I. Imnis raris, nari kofawi rariso kofrur pyum snonkaku ḇesesya rai, rariso kofasos pipi koḇena, ma rariso kokinfir hiburan ma sansun kosunna.

12. Rariso naek srar ḇero sidang sya sfasna mankunsi bisa fa sikamar fararur ro sidang?

¹² Wafrur kaku fararur sairirya sḇuk ḇe au na. Rofyor Allah kawasa ḇyesi siḇawes bait ya, Nehemia fyandun snon sya fa sikamar fararur ḇebor. Ifawi ḇar snon sine siswar Allah ma nari sifararur sambraḇ faro fararur sikamar na. (Neh. 7:2; 13:12, 13) Rarirya kako ro fafisu ine, snonkaku ḇefasna sasoasuser ma ḇefararur sambraḇ nari sna snonsnon ḇepyum ro sidang ma sḇuk fakamamar nabor syadiwer ḇe i. (1 Kor. 4:2) Inja koma naek ḇaido srar siko ke, fandun fa kofararur kuker kakaku fararur sairirya monda sḇuk ḇeko na.​—Wasya 1 Timotius 5:25.

13. Rariso na wafarari Yusuf i rofyor snonkaku ḇese sifrur pyum au ḇa?

¹³ Wasnefer ḇe Yahwe I. Rosai na wafrurya rofyor snonkaku ḇesesya sifrur pyum au ḇa? Na wafasnaḇadir ḇesi rariso sneḇaḇir bedi. Ḇape rofyor wawoswarek mankundaw ma kwara auma wanapes syadi ido, na wafrur fa nsamswen syadiwer. Na kofarkor nabor ro Yusuf i. Naek ḇyesi sifrurpyum i ḇa. Snonkaku sya sankar i, ma ismai ro bui snaro roi ifrurḇa na. Ḇape Yusuf isnefer pdef ḇe Yahwe I. Iswarepen pdef Yahwe asas ḇyena, ma isoasuser pdef. (Mz. 105:19) Ro fafisu ḇesamswen ine, fyarkor fa nya rari ḇepyum ḇeḇuk fainda rofyor isma nasan ḇekaki. (Kej. 41:37-44; 45:4-8) Rofyor snonkaku sifrur mnis au ḇa ido, ḇenadi ḇe Yahwe I fa ḇyuk fawawi nanem. Nari ifnoḇek au fa ḇeaḇaḇen ma wafrur pyum si rofyor wawos ḇesi.​—Wasya 1 Petrus 5:10.

WASUR PDEF RO FARARMYAN BENA

14, 15. (a) Rosai ḇefnai fandun fa ’kepen mankunko’ ro nyan koḇaryas ya? (b) Rariso na wafadwer nyan waḇaryas ro fafisu ḇeḇese na? (Mam sonin ro randak artikel ine ma kotak ”Ḇensewar Kaku fa Ḇaryas Kuker Nyan Ḇesena Ke?”)

¹⁴ Paulus ikofen ḇe Timotius fa ifrur mnis nyan fa ḇyuk farkarkor Refo. Paulus doḇe, ”Wepen mankundaw ma wepen farkarkor bena.” (1 Tim. 4:13, 16) Timotius ḇyaryas kwar ro taun ḇe taun. Inja rosai ḇefnai fandun fa ifrur mnis nyan ḇyukifarkor ya? Timotius ifawi snar snonkaku ma fafisu ro kankenem sena bisa fa nefararwe. Imarisen insama snonkaku sya srowerepen i, inja fandun fa ifrur mnis ma fyadwer nyan ḇyukifarkor snonkaku sya. Baboine, kofrur rarirya kako ro ḇaḇeḇaryas koḇena.

¹⁵ Ro moḇ ḇeḇeso, kosrow snonkaku sya ro rum sena ḇa rofyor koḇaryas ro rum ḇe rum. Ro moḇ ḇese, snonkaku sya na sisya ro rum sena, ḇape jadi fa kofanam ḇe kedwa sena ḇa, snaro sḇarek ro moḇ ḇesamswen fa kosun ḇe rum sena. Iso wasma ro moḇ waḇaryas ya ido, bisa fa swewar nyan ḇese fa wasrow kuker snonkaku sya ke?

16. Rariso ḇaḇeḇaryas ro moḇ kawasa ḇeḇor sya na nḇuk bon ḇepyum ya?

¹⁶ Naek ma srar ḇebor sya sisma raryaḇ rofyor sḇaryas ro moḇ kawasa ḇebor sya. Imnis raris, sraḇe stasiun kereta, stasiun bis, pasar, ma taman-taman fa sisrow snonkaku sya fa sawos ḇesi. Saksi oso na ḇyerandak awawos ḇe snonkaku oso kuker dap abar ḇebabo. Ḇaido na ikofen roi oso ḇepyum kuker snonkaku ani romawa ḇyedi ḇaido ifukenḇair fararur ḇyena. Snonkaku ani imarisen ido, manḇaryas ya na dap knam oser ro Refo ma ifuken kakara ḇyena kuker knam ani. Fyorno ido, snonkaku sya simarisen sfawi naborwer kuker roi ḇero Refoya.

17, 18. (a) Rariso ḇekir syadi ma ḇebri rofyor ḇaryas ro moḇ kawasa ḇebor sya? (b) Ro fararmyan bedi, rariso wakfasnai Daud raryaḇ ḇyedi rofyor isandik Yahwe I?

¹⁷ Imbude samswen ḇe au fa ḇerandak awawos ro nyan kuker snonkaku wafawi ḇaim sya. Ine iso Eddie, perintis ro New York, roi ḇyaḇirna. Ḇape ismai roi oso ḇefnoḇek i fa ḇyebri syadi. Doḇe, ”Ro farkarkor Refo ro kina nuḇedi, swa yedi kuker aya nufrur riset fa nusmai kankarem faro fakfuken ma karkara ro snonkaku sya sikofenna. Nuyor kako farfnoḇek ro Saksi ḇesesya.” Kirine Eddie ḇyekir fa ḇyaryas ro moḇ kawasa ḇeḇor sya.

¹⁸ Rofyor koryaḇ syadi ro fararmyan koḇena ma koḇuk nyan ḇepyum fa koḇaryas ankankinem ḇeḇye ḇe snonkaku sya, ima kofasna kosur ro ḇaḇerurya. (Wasya 1 Timotius 4:15.) Iba syadiwer na kofnoḇek snonkaku oso fa ḇye manfamyan Yahwe ḇyedi. Daud ikofen, ”Nari yasandik Yahwe ro fafisu nakam; sanandik ḇe I nari naisya ro swardip ayedi ḇesya kwar. Snar Yahwe I nari yaryaḇ; snonkaku ḇena sne ḇemayar sya nari srower ma nari simarisen.”​—Mz. 34:1, 2.

KOSANDIK YAHWE I PDEF KUKER KOSUR RO ḆAḆERURYA

19. Rosai ḇefnai fandun fa Yahwe manfamyam ḇesoasuser oso iryaḇ, iba syadiwer rofyor ismai fafisu ḇesamswen?

¹⁹ Daud ikofen kako, ”Braur bramin benakam nari sikanowser au, sye, Yahwe, ma snonkaku ḇesoasuser ḇesi nari sisandik au. Nari sawosḇair kuker fababa ro karajan bedi, ma nari sifasnaḇair samambraḇ bedi, infa sikofenḇair faro snonkaku sya, fararur ḇeba ḇyena ma fababa sananai karajan ḇyedi.” (Mz. 145:10-12) Snonkaku ḇeswar faro Yahwe I syakam ma ḇesoasuser ḇe I simarisen kaku fa sfawar Yahwe I ḇe snonkaku ḇesesya. Ḇape rariso snar auma waduf ḇaido ḇesinan kwar, inja na pok fa buk oras naborwer ro ḇaḇeḇaryas ro rum ḇe rum? Waswarepen kaku snar rofyor wawosḇair napnapes kuker Yahwe I ḇe snonkaku ro ris bedi, raris suster ḇaido dokter, ine fyasna wasandik Yahwe I. Rofyor wasmai ro bui snaro kakyar bena ido, na bisa fa wafawar ḇe snonkaku ḇesesya kuker Yahwe I, ma nari nafrur fa snembri imarisen. (Ams. 27:11) Na imarisen au kako snar wemir monda ḇefarmyan ḇe I rofandu kina ḇesi ḇesyom ḇe Yahwe I ḇa. (1 Ptr. 3:1-4) Iba syadiwer rofandu fafisu ḇesamswen ine, bisa fa wasandik Yahwe I, fanam pdef ḇe I, ma wasur pdef ro ḇaḇerurya.

20, 21. Rofyor sḇuk fararur nabor ḇe au ro Yahwe organisasi ḇyedi ido, rariso na nḇuk barakas ḇe snonkaku ḇesesya rai?

²⁰ Yahwe nari ḇyeḇarakas au rofyor fanam pdef ḇe I ma wafarmyan kuker sne ḇesiper ḇe I. Imbude fandun fa wafrur fararwe ḇeḇeso ro jadwal ḇaido kankenem bedi, nari nwa swaf ḇebor fa wafnoḇek snonkaku sya fa sfarkor kuker asas ḇepyum Allah ḇyedi. Bisa fa wafnoḇek kako naek srar ḇesi. Ma kwarapan rariso na naek srar sya siswar kaku au rofyor smam fararur marḇak bena ro sidang!

²¹ Kofarmyan ḇe Yahwe I fyoro kwar ke roḇa, kokame na kofanam pdef ḇe I ma kosur ro ḇaḇerurya. Ro farkarkor ḇeḇeuserya, na kowawos rariso na kofnoḇek snonkaku ḇesesya fa sisur ro ḇaḇerurya.