Wasewar Fadadiren ro Yahwe I Ke?

1. Rosai Allah manfamyan ḇesouser Ḇyesya sḇaḇirna snaro sinapes ḇa?

MANWAWAN Paulus fyas, ”Aya ine yaḇekandera kaku!” (Roma 7:24, NW) Kirine, Allah manfamyan ḇesouser Ḇyesya sḇaḇir sifafko ma siḇoryaye raris Paulus i. Rosai ḇefnai ya? Snar komarisen kofrur Yahwe imarisen, ḇape koine snonkaku ḇesasar ma ḇenapes ḇa. Inja, rofyor kofrur Yahwe imarisen ḇa ido, nari kofafko kaku. Iba syadiwer, snonkaku Kristen ḇeḇeso ḇefrur sasar ḇeba sḇaḇir Yahwe nari ḇyuk ampun ḇesi ḇa.

2. (a) Ro Mazmur 34:22, rosai ḇefnai fa Allah manfamyan Ḇyesya sḇaḇir awer sisasar ker? (b) Rosai na kofarkor ro artikel ine? (Mam kotak ”Farkarkor ḇaido Kakop?”)

² Refo ḇyuk kakyar ḇeko snar rofyor kosewar fadadiren ro Yahwe I nari koḇaḇir kosasar kerḇa. (Wasya Mazmur 34:22.) Rosai knam ro wos kosewar fadadiren ro Yahwe I? Rosai fandun fa kofrur ya insama Yahwe fyasna sawarwar faro ko ma ḇyuk ampun ḇeko? Kankaremya bisa kosma kuker kofarkor ro kota ḇekadaunwarek ḇero Israel fafisu iwara. Kakuḇae, fasasos anna neḇefrur imnis ḇaḇeasas Sasoser ḇeḇefadwer kwar ro Pentakosta taun 33 M. Ḇape, Sasoser anna ndrama ro Yahwe I. Inja, fasasos faro kota ḇekadaunwarek ine, bisa kofarkor rariso Yahwe mamam Ḇyeja faro sasar, ḇefrur sasar, ma snonkaku ḇembror sya. Randakya, mkorama kofarkor fainda kosma ro kota ḇekadaunwarek ḇero Israel.

”MKOKINFIR KOTA- KOTA ḆEKADAUNWAREK”

3. Rosai fandun fa snonkaku Israel sifrur faro snonkaku ḇemun snonkaku oso?

³ Yahwe sneriso kaku rofyor snonkaku oso ḇyeḇemun. Rofyor snonkaku Israel myun snonkaku oso ido, snon oser ro snonkaku ḇemar ani karyer ḇyesya iso nari ḇemunsu faro snonkaku Israel ani, inja na syewar fa dakmun snonkaku ani kako. (Bilangan 35:19) Ine ḇeḇejadi snar snonkaku ani myun kwar snonkaku ḇesasar ḇa. Nafrur fa nya nyaki rik ma fandun fa ḇyakna kuker kankenem ḇyedi. Rofyor sḇuk samamyai marmar fasaw ḇe snon mamun ine ḇa ido, Sup Ḇeḇeasas ani na isren ḇa. Yahwe doḇe, ”Mkofrur mamas awer saprop moḇ mkoḇarekna” kuker mkomun snonkaku ḇesesya.​—Bilangan 35:33, 34.

4. Rofyor snonkaku Israel ifawi ḇa bo rosai ifrurna nun marmar ḇe snonkaku ḇese ido, rosai na ifrur ya?

⁴ Rofyor snonkaku Israel ifawi ḇa bo rosai ifrurna nun marmar ḇe snonkaku ḇese ido, na rariso? Kyara ḇaḇeri fa ifrur roi ine, ḇape syasar kwar snar myun snonkaku ḇesasar ḇa. (Kejadian 9:5) Ḇape ro parkara ḇeradine, Yahwe doḇe snonkaku ani na isma sawarwar. Snonkaku ḇesasarḇa ani bisa ifrar ro snonkaku na ḇemunsu i ma ifrar ḇe oser ro kota ḇekadaunwarek riwonem anna. Rofyor siwani fa ḇyarek ro kota ani ido, nari isma fadadiren. Ḇape, fandun fa ḇyarek ro kota ani isof imam ḇeba imar.​—Bilangan 35:15, 28.

5. Rosai ḇefnai fa fasasos kuker kota ḇekadaunwarek bisa nafnoḇek kofa komamḇir syadi Yahwe I?

⁵ Fasasos kuker kota ḇekadaunwarek ani ndrama ro kakara snonkaku sya ḇa, ḇape ndrama ro Yahwe I. Ḇyuk parenta ḇe Yosua i, ”Wakofenḇair ḇe snonkaku Israel sya, ’Mkokinfir kota-kota ḇekadaunwarek.’” Kota-kota anna ḇeḇeḇair snar nasren kwar. (Yosua 20:1, 2, 7, 8) Yahwe dun snemuk fa kota-kota anna neḇesisye kuker kota-kota ḇesena. Inja, ro fasasos ine kofarkor nabor kuker Yahwe I. Imnis raris, ine nafnoḇek ko fa komamḇir kaku Yahwe sawarwar Ḇyeja, ma nfarkor ko rariso kofadiren faro Yahwe I.

FANDUN FA ”FYAWAR PARKARA ANI ḆE MANFARKIN KOTA ANSYA”

6, 7. (a) Rosai manfarkin kota sifrur faro snonkaku Israel ḇesasar ḇa ani? (Mam sonin ro randak artikel ine.) (b) Rosai ḇefnai fa snonkaku ḇemun ani fandun fa dawos ḇe manfarkin kota ansya?

⁶ Rofyor snonkaku Israel ifawi ḇa bo rosai ifrurna nun marmar ḇe snonkaku ḇese ido, fandun fa ifrar ḇe kota ḇekadaunwarek ani ma ”fyawar parkara ḇyedi” ḇe farkankin kota ansya ro kerwa ḇeba kota ani. Manfarkin ansya fandun fa srower snonkaku ani. (Yosua 20:4) Swaf ḇeḇeso ramnai nari siwani fa ibur ḇe moḇ myun snonkaku ani insama manfarkin ḇero mnu ansya semankara i. (Wasya Bilangan 35:24, 25.) Rofyor manfarkin ro mnu ani sun snemuk snar syasar ḇa, nari siwani fa ibur kaḇer ḇe kota ḇekadaunwarek ani.

⁷ Rosai ḇefnai fa snonkaku ḇemun ani fandun fa dawos ḇe manfarkin kota sya? Snar manfarkin kota sya fandun fa smamwarek saranden ro kawasa Israel sya. Si kako fandun fa sifnoḇek snonkaku ani insama isma sawarwar ro Yahwe I. Ḇefawinanem Refo oso fyas, rofyor snonkaku ani ryaḇe manfarkin kota ansya ḇa nari smuni. Ma ikofenwer snonkaku ani imar ido ima sasar ḇyediri snaro imewer isouser fasasos Allah ifrur kwarna. Inja, fandun fa dor ma isma fafnoḇek insama ikenem pdef. Rofyor ryamura ḇe oser ro kota ḇekadaunwarek anna ḇa ido, snonkaku myun ani karyer ḇyesya bisa sakmuni kako.

8, 9. Rosai ḇefnai fa snonkaku Kristen ḇefrur sasar ḇeba fandun fa sawos ḇe penatua sya?

⁸ Kirine, insama snonkaku Kristen ḇefrur sasar ḇeba nya fasfesepen ḇepyum kaḇer kuker Yahwe I ido, fandun fa isrow penatua sya. Rosai ḇefnai fa ine fyandun kaku? Oserya, Yahwe iso ḇefasos insama penatua sya sifrurmins kaḇer kasus sasar ḇeba ani. (Yakobus 5:14-16) Ḇesuruya, simarisen sifnoḇek ḇefrur sasar ani imbror ma bisa ḇyebati wer kuker Yahwe I ma ifrur kaḇer sasar ḇyena werḇa. (Galatia 6:1; Ibrani 12:11) Ḇekyorya, penatua bena fakamaman sya sifarkor si fa sḇuk sneprei faro snonkaku ḇefrur sasar ma ḇemarisen ḇembror insama ḇyaḇir awer syasar kaker ma fyafko. Yahwe dap penatua ansya ḇe ”moḇ [ḇefadiren] ro mekem ḇeba ya”. (Yesaya 32:1, 2) Fasasos ineiso nyan oser Allah fyasna sawarwar Ḇyeja faro ko.

⁹ Allah manfamyan ḇebor Ḇyesya sisma sneprei rofyor sawos kwar ḇe penatua sya fa sisma fafnoḇek. Imnis raris, naek oso ḇenirḇe Daniel ḇefrur sasar ḇeba kwar. Ḇape, paik ḇeḇeso dawos kuker penatua sya ḇa. Doḇe, ”snar fyoro kwar, inja yakara penatua sya jadifa sifnoḇek aya ḇa.” Ḇape, imkak kako snonkaku ḇesesya na sifawi sasar ḇyeja. Osower ido, ḇyaḇir fandun fa dor maf ḇe Yahwe I rofyor ḇyenadi. Ḇarpurya, dor fafnoḇek ro penatua sya. Iswarepen, ”Yamkak kaku fa yawos ḇesi, ḇape rofyor yawos kwar yaḇaḇir rya kamnam ḇemarḇak anna sikanowbur erdai yedi kwar.” Daniel bisa dawos kaḇer ḇe Yahwe I kuker makakak ḇa. Kirine, nya sneuser ḇesren, ma fyoro mura ifarmyan ḇe hamba pelayanan.

”FANDUN FA IFRAR ḆE OSER RO KOTA ANNA”

10. Insama isma ampun, rosai fandun fa snonkaku ḇefnai marmar ani ifrur ya?

¹⁰ Insama isma ampun, snonkaku ḇefnai marmar ani fandun fa ifrar ḇe kota ḇekadaunwarek ḇefanam. (Wasya Yosua 20:4.) Imarisen ikenem kaker ido, ryaḇeri ḇe moḇ ani ma ḇyarek rodiwa isof imam ḇeba imar. Roi ine iso fandun fa snonkaku ani ifrurna. Ibur fararur ḇyena, rum ḇyeja, ma ipok fa imbran famfnom ḇa.a (Mam fas-fas kasun ro sop.) (Bilangan 35:25) Ḇape, roi ḇyensewar kwarna nefromo ḇa. Rofyor ifrar ibur kota ḇekadaunwarek ani ido, kyurfasna fyandun kuker nyaki rik ḇyena ḇa, ma roi ani bisa nun samswen faro kankenem ḇyeja.

11. Rariso snonkaku Kristen ḇemarisen ḇembror bisa fyasna ḇyesyowi kaku Allah sawarwar Ḇyena?

¹¹ Kirine, snonkaku ḇefrur sasar ḇape ḇemarisen ḇembror fandun fa ifrur roi ḇeḇeso insama isma ampun ro Allah I. Fandun fa imnai ro sasar ḇyena. Ine kyurfasna fandun fa ḇyinkwanbur rosai monda na ḇefrur fa ifrur sasar ḇeba. Manwawan Paulus fyasnaḇair rosai snonkaku Kristen ḇero Korintus ḇemarisen fa ḇembror fandun fa sifrurna. Fyas, ”Naek srar indo mkokara sas bon rosai mkosma snar fafardun ḇerama ro Allah! Bon ḇyedi isoine naek srar mkosewar kaku ḇeri fa mkofasren famameya! Naek srar mkayin sasarya, mkomkake, mkoswarkuf, mkomsik, mkomarisen mkoḇuk samamyai faro ḇesasarsya!” (2 Korintus 7:10, 11) Inja, koḇensewar insama kofrur sasar awer. Rarirya ido, kofasna faro Yahwe I snar komarisen kaku fa kofadwer kenem koḇena ma kokara awer sawarwar Ḇyena nama napyan fa kosmana.

12. Rosai fandun fa snonkaku Kristen sḇensewarna insama sisma Yahwe sawarwar Ḇyeja pdef?

¹² Rosai fandun fa snonkaku Kristen ifrurya insama isma Yahwe sawarwar Ḇyena pdef? Fandun fa ibur rosai monda, syadiwer rosai na ḇefrur isapi ro sasar ya. (Matius 18:8, 9) Imnis raris, rofyor bati ḇesya sifrur roi Yahwe imarisen ḇa ido, na ḇebati kaker kuker si ke? Rofyor samswen fa fara mankundaw ro aninem swan ido, na ḇinkwanbur fafisu ḇefrur fa winem swan nabor syadi ke? Rofyor samswen fa fara marisen farḇakḇuk famfnom ido, na ḇinkwanbur filem, situs web ḇaido fararur na ḇefrur fa wana kakara ḇesren ḇa ke? Koswarepen, rosai monda kofrur insama kosouser faro Yahwe sasoser Ḇyena, nari nefromo ḇa. Rofyor kosusu ido, na kokara kofrur Yahwe fayfko ḇaido Yahwe iswar ko werḇa. Rosai koḇaḇir nane, nafrurduf kaku ko. Rofyor kosusu ḇa, nari koḇeaski syadi snar koḇaḇir ”saswar soasuser ro [Yahwe] ḇekain fyoro”.​—Yesaya 54:7, 8.

”KOTA ANNA NA NḆE MOḆ FADADIREN”

13. Rosai ḇefnai fa snonkaku ḇemun ani bisa ḇyaḇir ḇyarek kuker aski ma payamyum ro kota ḇekadaunwarek ani?

¹³ Rofyor snonkaku ḇemun ani isya kwar ro kota ḇekadaunwarek, ipok imkak awer. Yahwe dawos kuker kota ḇekadaunwarek kwar, ”Kota-kota anna nari nḇe moḇ fadadiren.” (Yosua 20:2, 3) Rodiwa, Yahwe nari dor ḇaḇeri snonkaku ḇemun ani semankara i wer kuker parkara ḇemnis. Snonkaku na ḇemunsu i ani ipok fa syun ḇe moḇ ani fa myuni. Rofyor snonkaku ḇemun ine isya ro kota ani ido, nari Yahwe kyadaunwareki. Ḇape, kota ani imnis raris bui ḇa. Bisa fyararure, ifnoḇek snonkaku ḇesesya, ma ifarmyan ḇe Yahwe kuker aski. Kankenem ḇyedi bisa neaski ma nun raryaḇ!

14. Snonkaku Kristen ḇembror kwar rosai na ikyar ya?

¹⁴ Allah manfamyan ḇeḇeso Ḇyesya ḇefrur sasar ḇeba sḇaḇir sisasar kaker, iba syadiwer rofyor simbror kwar. Sino sisya skara Yahwe ḇyefnder sasar sena ḇa. Rofyor ḇaḇir rarirya ido, wakyar kaku rofyor Yahwe ḇyuk ampun ḇe Au, ipyospres na kwar. Wapok fa kwara wasasar kaker. Ine iso Daniel ḇeḇeyap ani ismana. Rofyor penatua ḇyuk wos ananun ḇe i ma ifnoḇeki fa nya sneuser ḇesren wer, ine nun sneprei kaku ḇe i. Doḇe, ”Yakara kerḇa snar yasasar. Rofyor kosma ampun kwar faro sasar koḇena, sasar ani neḇepyos kwar. Imnis raris Yahwe wos Ḇyena, dun kamnam ḇemarḇak koḇena ma isawen ḇinkwanna inja komamna werḇa.” Rofyor snonkaku ḇemun ani isya ro kota ḇekadaunwarek, ipok imkak ḇa snar snonkaku ḇemunsu i ani nari ryama fa myuni. Rarirya kako, rofyor Yahwe ḇyuk ampun faro sasar koḇena, kopok komkak Yahwe iswarepenna wer ma ḇyuk samamyai ḇeko ro fafisu iwama.​—Wasya Mazmur 103:8-12.

15, 16. Rosai ḇefnai fa kokyar faro Allah sawarwar Ḇyena rofyor kofawi Yesus imar ḇe farsarser ma Imam Ḇeba koḇedi?

¹⁵ Roi nabor nasya ḇefrur fa kokyar faro Yahwe sawarwar Ḇyeja ro snonkaku Israel fafisu iwara sya. Rofyor Paulus ikofen ’ḇyekandera kaku’ snar jadifa isouser Yahwe I ḇa, ikofen, ”Kasumasa faro Allah! Snar imarisen fyaspar aya kuker Yesus Kristus.” (Roma 7:25) Rosai knam ro wos ḇyeja? Ḇyensewar kaker fa pyampum marasrisen ḇesasar ma fafisu iwara ifrur sasar kwar raryano, imbror kwar. Inja, ikyar Yahwe ḇyuk ampun ḇe i snar farsarser fasaspar Yesus ḇyeja. Snar Yesus imar ḇe farsarser, inja ko kako bisa kona sneuser ḇesren ma aski. (Ibrani 9:13, 14) Imam Ḇeba koḇedi, Yesus ”ifrur rarirya snar ikenem fyoro-fyoro fadun fararyor kawasa sena faro Allah.” (Ibrani 7:24, 25) Ro fafisu iwara, imam ḇeba sḇuk kakyar ḇe snonkaku Israel sya snar Yahwe ḇyuk ampun faro sasar sena kwar. Snar Yesus ima Imam Ḇeba koḇedi, inja kokyar kaku ”nari Allah iswar ko ma ḇyeḇok ko ma kosma fafnoḇek, rofafisu koḇefandunya”.​—Ibrani 4:15, 16.

¹⁶ Inja, insama kosma fadadiren ro Yahwe I, fandun fa kokyar faro Yesus farsarser ḇyedi. Kokara monda awer farsarser ima nefasos faro snonkaku syakam. Wakyar kaku snar farsarser nḇuk fainda faro mankundaw. (Galatia 2:20, 21) Wakyar kaku snar Yahwe ḇyuk ampun kwar faro sasar Bedi snaro farsarser. Wakyar kaku snar farsarser nḇuk ḇe Au saneraro fa wakenem fyoro. Farsarser Yesus ḇyedi ima sasuref Yahwe ḇyuk ḇe Au nairi!

17. Rosai ḇefnai fa kosewar fadadiren ro Yahwe I?

¹⁷ Snar kofarkor kuker kota ḇekadaunwarek, bisa komamḇir kaku Yahwe sawarwar Ḇyedi. Fasasos Allah ifrur ine nfarkor ko fa kofawi snar ima isren. Fasasos ine kako kyurfasna fararur penatua sya fa sifnoḇek ko, nyan insama kombror kaku ma kokyar kaku Yahwe bisa ḇyuk ampun ḇeko. Ausya wasewar fadadiren ro Yahwe I ke? Yahwe ima moḇ kadaun ḇepyum faro faro ko! (Mazmur 91:1, 2) Ro artikel ḇeuserya, nari kofarkor rariso kota ḇekadaunwarek bisa nafnoḇek ko fa kofarari Yahwe, ḇebuk farari ḇepyum ro nanapes ma sawarwar.