Wasofarari Yahwe Nanapes ma Sawarwar Ḇyena

1, 2. (a) Rariso Yesus sneḇaḇir ḇyedi faro Allah Sasoser Ḇyena? (b) Rosai ḇefasnaḇadir snar manfawawi Taurat ma snonkaku Farisi sya simbranser sasoser Taurat kuker nyan ḇesasar?

YESUS iswar Sasoser Moses. Na kokandor ḇa kukro Sasoser anna ndrama ro Mankun ḇefandun ro Yesus kankenem ḇyena isoine Kmari, Yahwe I. Refo ḇyardai doḇo Yesus na iswar kaku Allah Sasoser Ḇyena. Mazmur 40:8 ikofenḇair, ”Yamarisen yafrur marisen Bena, sye Allah yedi, ma sasoser Bena isya ro sneridori.” Ro wos ma kenem ḇyena, Yesus fyasnaḇadir snar Allah Sasoser Ḇyena nama nanapes, napyum ma nari ndarirya faro I.​—Matius 5:17-19.

² Na Yesus ḇyesneso fafisu myam manfawawi Taurat ma snonkaku Farisi sya simbranser Sasoser Taurat kuker nyan ḇesasar. Nafnaifa, sasoser ani smamna ido, namnis ḇa ma sun ro kakara ḇa. Yesus ikofen faro si ḇo doḇe, ”Snar rarwas ḇar ḇeḇesamfur ro marisan, ampui ma konsop mkoḇak na.” Ine nfasnaḇadir seaunos kaku rofyor simbranser roi ḇekasun ro sasoser Taurat. Inja, rosai sasar sena? Yesus ikofenḇairna, ”Ḇape roi ḇeḇefandun syadi ro sasoser Refo Yahudi mkamdwerna, isoine: napnapes ma sawarwar ma ḇaḇeuser.” (Matius 23:23) Snonkaku Farisi sifawi knam ḇero sasoser Taurat ine ḇa, ma soḇo siso ḇesyadi ro ḇesesya. Mboi Yesus ima iḇese ro si, fyawi roi ḇero sasoser ine ma parenta ḇero sasoser annakam nfasnaḇadir kuker Yahwe I.

3. Rosai na kokarem ro artikel ine?

³ Snar koine snonkaku Kristen, inja koḇe fesepen kuker sasoser Taurat ine werḇa. (Roma 7:6) Mboi, rosai ḇefnai fa Yahwe fyasepen sasoser Taurat ine ro Wos Ḇyena, Refoya dori? Imarisen insama kofawi ma kombranser naḇe ”roi ḇefandun kaku”, isoine farkankin-farkankin ḇekainsero sasoser Taurat. Imnis radine, farkankin rosai na kofarkor ro kota ḇekadaunwarek ya? Ro artikel ḇeponya, kawos roi ḇefandun ro snonkaku ḇemun oso ifrurna ma rosai farkarkor ḇyena faro ko. Ro artikel ine, nari komam roi kun ḇe farkarkor ro kota ḇekadaunwarek ro Yahwe ma moḇsai na kakso farari Ḇyena. Nari kokarem fakfuken dikyor nane: Rariso kota ḇekadaunwarek ikofenfasnai Yahwe sawarwar Ḇyena raya? Rosai na kofarkor ro kota ḇekadaunwarek faro Allah mamam Ḇyena kuker kankenem? Rariso kota ḇekadaunwarek fyasnai Yahwe nanapes Ḇyena? Rofyor kofarkor roi nane, kwarapan moḇsa na kofarari Kma ḇekain ro nanki yaswa rai.​—Wasya Efesus 5:1.

KOTA ḆEKADAUNWAREK KYON RONA NFASNAI ALLAH SAWARWAR ḆYENA

4, 5. (a) Fasasos rosai sifrurna insama snonkaku ḇemamun sya napyan fa srama ro kota ḇekadaunwarek, ma saiḇewar ya? (b) Rosai na kofarkor ro Yahwe I kuker roi nane?

⁴ Yahwe fyasos insa kota ḇekadaunwarek riwonem anna napyan fa srayoḇ na. Dor snonkaku Israel fa skinfir ro mankunsi kota rikyor ḇero bar wambarek ma ḇero bar wamurem Warbeki Yordan. Snaro? Insamaido ḇemamun ine bisa isamberen fasaw ma napyan fa ryamura ḇe kota ani. (Bilangan 35:11-14) Sampak ḇeker ḇe kota-kota anna smam pyumna inja napyum pdef. (Ulangan 19:3) Sejarah Yahudi fyasnaḇadir snar kakop aḇyair nasya srir naro sampakna insa ḇemamun ani bisa isrow kota ani. Snar kota ḇekadaunwarek ro Israel ine nasya, inja rofyor snonkaku Israel oso fyawi ḇa bo rosai ifrurna nun marmar ḇe snonkaku oso ido na syewar kadaun ro sup amberḇa snaro na nafnai ifa isyom allah-allah ḇe kakuḇa.

⁵ Kwarapan: Yahwe iwan fa ḇemamun sine smun sifa simar. Mboi, na myam ari insa snonkaku ḇesasarḇa ḇemun snonkaku oso ine dakna sawarwar, ḇaḇenaḇye, ma fadadiren. Manfawinanem Refo oso doḇe, ”Akurfasna ḇyena sifrur nafa nasnaibos, nsamswenḇa, napyan fa sisona.” Yahwe ima imasasor ḇa, rofyor ḇyemankara manfamyan Ḇyesi syewar nyan fa ḇyemankara siḇa. Mboi, nya ’saswar ḇeba’ kaku.​—Efesus 2:4.

6. Snonkaku Farisi sifarari Yahwe sawarwar Ḇyena ke? Fasnaḇairpan.

⁶ Bape, snonkaku Farisi sakna sawarwar faro snonkaku ḇesesya ḇa. Imnis raris sejarah Yahudi fyasbadir, snonkaku Farisi simewer sḇuk ampun ḇe snonkaku oso ḇefrur sasar ḇemnis rarwan dikyor. Insama nfasnaḇair snonkaku Farisi rari sena, Yesus fyawar sararḇer kuker snonkaku Farisi ḇenadi ro snon ḇeyor som ris ḇyedi. Snonkaku Farisi ani doḇe, ”O, Allah, yakofen kasumasa faro au, snar yamnis kuker snonkaku ḇese siyafa ḇa, snonkaku ḇefasyarḇa, ḇeḇarḇor ḇa, ḇefrur farbuk ḇa ma yamnis snonkaku ḇeyor som ine ḇa.” Inja, Yesus imbe fyasna snar snonkaku Farisi ”soḇo semir sinapes” ma simewer sfasnai sawarwar.​—Lukas 18:9-14.

7, 8. (a) Rariso kofarari Yahwe sawarwar Ḇyena rai? (b) Rosai ḇefnai fandun fa kona sneḇerun?

⁷ Wafarari Yahwe I, mboi snonkaku Farisi sya waso farari sena awer. Fasnai sawarwar ma ḇaḇenaḇye. (Wasya Kolose 3:13.) Kofrur samswen awer snonkaku ḇesesya fa sor maf ro ko. (Lukas 17:3, 4) Kwarapan: ’Snonkaku ḇese sifrur yamsor ker ido na fasaw fa yaḇuk ampun faro si ke? Na yamarisen yaḇe dame kuker snonkaku ḇefrur yamsore ma yadosam ke?’

⁸ Insama bisa koḇuk ampun, fandun kaku kona sneḇerun. Snonkaku Farisi soḇe siso ḇesyadi ro snonkaku syakame, inja simewer sḇuk ampun ḇe snonkaku ḇesesya. Ḇape koḇe snonkaku Kristen, kuker sneḇerun ’komamo snonkaku ḇesesya sisyadi’ ro mankunko ma ro sneri koḇuk ampun kuker sne ḇesiper. (Filipi 2:3) Kwarapan, ’Yaso Yahwe farari Ḇyena ma yafasnai sneḇerun ke?’ Korun sne ido, na napyan ḇe snonkaku ḇesesya fa sakor maf ro ko ma ko kako nari napyan fa kakḇuk ampun ḇesi. Komsor fasawsaw awer, mboi kofasnai sawarwar.​—Pengkhotbah 7:8, 9.

MKOḆESYOWI KANKENEM MA ”NARI MKOḆENYAKI RIK ḆA”

9. Rariso Yahwe fyarkor snonkaku Israel sya snar kankenem nama nasren?

⁹ Roi ḇefnai sifrur kota ḇekadaunwarek isoine insa snonkaku Israel senyaki rik ḇa kuker smun snonkaku ḇesasar ḇa sya. (Ulangan 19:10) Yahwe ḇyesyowi kankenem, ma dayin kaku mamamun. (Amsal 6:16, 17) Snar Allah inapes ma isren, na myam monda ḇa snonkaku ḇefawiḇa bo ḇefrur roi oso ḇeyun marmar faro snonkaku ḇesesya. Imbo, snonkaku ḇefawiḇa ani bisa ismai sawarwar. Mboi randakya, na ikofenḇadir rosai ifrurna ḇe manfarkin kota sya. Siso ḇeyun snemuk snar ḇemun ani syasar ḇa, nari ḇemamun ani ḇyarek ro kota ḇekadaunwarek rawo imam ḇeba ani ryoe. Rarirya ido, snonkaku ḇemun ine na ḇyarek ro kota ḇekadaunwarek ani isof imar rodiwa. Fasasos ḇeradine nfarkor kawasa Israel sya fa sfawi kankenem nama nasren. Infa sesyowi Manḇebuk Kankenem, sḇesewar kaku insama snonkaku ḇesesi sismai roi ḇemun awer.

10. Rariso Yesus fyasnai snar manfawawi Taurat ma snonkaku Farisi sya sesyowi kankenem snonkaku ḇesesya ḇa?

¹⁰ Yahwe ima iḇese ro manfawawi Taurat ma snonkaku Farisi sya, sima sesyowi kankenem snonkaku syaḇa. Yesus ikofen faro si bo doḇe, ”Mkun kwar asyopder ro fawawiya, ma mankun mko kada mkaksunḇa ma snonkaku ḇeḇesewar fa ḇesunsya mkodwarek si.” (Lukas 11:52) Yesus maksud ḇyediso? Manfawawi Taurat ma snonkaku Farisi sya siso ḇekofenḇadir Allah Wos Ḇyena faro snonkaku sya ma sifnoḇek sifa saksmai kankenem fyoro ya. Ḇape, makunsiso ḇedwarek snonkaku ḇemarisen ḇeso Yesus, ”Manfarkin kankenem ya”. (Kisah 3:15) Rarirya, sfarkin snonkaku sya ḇe marmar. Manfawawi Taurat ma snonkaku Farisi sima snonkaku ḇeararer ma ḇefandun mankunsi monda, ma sakfandun snonkaku ḇesesya kankakenem senaḇa. Sirarmomen kaku ma sakna sawarwar ḇaḇeri!

11. (a) Rariso Manwawan Paulus fyasnai snar mamam ḇyena faro kankenem namnis kuker Yahwe mamam Ḇyena? (b) Rosai na ḇedif kofa koḇaryas kuker raryaḇ raris Paulus i?

¹¹ Rariso na kofarari Yahwe I ma komnis ḇa kuker manfawawi Taurat ma snonkaku Farisi sya? Isoine kuker koḇesyowi ma komam kankenem ine ḇe roi ḇefandun. Manwawan Paulus ifrur roi ine kuker ḇyaryas ḇe snonkaku ḇebor sya. Iso eḇedari, doḇe, ”Aya ine yasren, yaḇe sasarḇa faro mansei ryawer nari ḇero ya.” (Wasya Kisah 20:26, 27.) Ḇape, Paulus ḇyaryas snar imewer syasar ḇaido snar Yahwe iwan ifrur roi ani ke? Oroḇa. Paulus iswar snonkaku sya. Myam kankenem ro snonkaku ansine nḇesyowi kaku, ma imarisen saksmai kankenem fyoro. (1 Korintus 9:19-23) Ko kako fandun fa komam kankenem ine raris moḇ Yahwe myamna. Imarisen snonkaku simbror insa sikenem fyoro-fyoro. (2 Petrus 3:9) Insama kofarari Yahwe I, fandun fa kakswar snonkaku sya. Kona sawarwar ido, nari nadif kofa koḇaryas kuker raryaḇ. Bon ḇyena iso, na kona marisen ḇeba rofyor koḇaryas.

12. Rosai ḇefnai fa payamyum ma kankenem nefandun kaku faro Allah kawasa Ḇyesi?

¹² Infa komam kankenem ine namnis Yahwe mamam Ḇyena, fandun fa kona rari ḇekaku ro ḇaḇemkei ma fadadiren. Fyor kun oto, motor ḇaido kofararur, kofrurna kuker payamyum ma komamuserna. Nane kako faro babawes, fadaduru, ḇaido fyor kombran ḇe moḇ fananjur koḇedi. Kankenem ma payamyum koḇena naiso ḇefandun syadi ro oras ma pipina. Allah koḇedi ifrur roi ḇekaku ḇesya kwar, ma komarisen kofarari I. Faro penatua sya fandun fa skara payamyum sena, ine faro mankunsi ma ḇesesya. (Amsal 22:3) Penatua oso danun ko kuker farkankin ḇepyumna ido, rwower rosai ikofenna. (Galatia 6:1) Mkomam kankenem ine namnis kuker moḇ Yahwe myamna, ma nari ”mkoḇenyaki rikḇa”.

ḆEMANKARA ”NAMNIS KUKER FARKANKIN-FARKANKIN NANE”

13, 14. Rosai manfarkin mnu ansi sifrurna fa sifarari Yahwe nanapes Ḇyeja?

¹³ Yahwe dor ḇe manfarkin mnu rofafisu iwara sya fa sfarari nanapes Ḇyeja. Randakya, na smampyum kaku parkara annakam. Ramnai rofyor sfasnai sawarwar ḇaim, na skarauser roi ḇefnai kaku ḇemun ani ifrur radirya. Si kako na skara roi ifrurna fyor myun snonkaku oso ḇaime. Sḇesewar kaku fa smame ḇemun ine ikram masasor faro snonkaku myun ine ke ma ḇyeaw kwar fa imbe myuni ke. (Wasya Bilangan 35:20-24.) Ḇemam mamamun ani isya ido, ḇemun ine na ismai marmar namnis kuker rosai ḇemam mamamun ansuya sukofenna.​—Bilangan 35:30.

¹⁴ Rofyor sfawi kaku kwar roi ḇeḇejadi ya ramnai, manfarkin mnu ansine na smam mura ro ḇemun ine kankenem ḇyenakam, ine faro roi ifrur kwar annaḇa. Fandun fa sna fawawinanem insama sfawi rosai ḇeḇejadina ma rosai ḇefnai roi ani. Ḇefandun syadi yaiso, sfandun rur ḇesren ro Yahwe insa bisa sfasnai fawawi, sawarwar, ma nanapes.​—Keluaran 34:6, 7.

15. Rosai ḇeḇese ro Yesus mamam ḇyena ma snonkaku Farisi mamam sena faro snonkaku ḇesasarsya?

¹⁵ Snonkaku Farisi sakna sawarwar ḇa rofyor semankara snonkaku ḇesasar sya. Smam monda snonkaku ani sasar ḇyena, mboi ro rari ma kenem ḇyejaḇa. Fafisu snonkaku Farisi rifumo smam Yesus danan ro Matius rum ḇyani, sifuken ḇe Yesus manfamyan ḇyesi, ”Snaro Guru mkoḇedi danan kuker ḇeyor som ma snon sasar?” Yesus imnaf rarirya ikofen: ”Snonkaku ḇeprei sefandun [tabib] syaḇa, ḇoi snonkaku ḇeduf sya siso ḇeḇefandun [tabib]. Inja mkora, ma mkokara wos ine kankunes ḇyedi isoine: ’Roi Yaḇefandun ya isoine sne ḇesaswar ḇoi farsarser ḇa’, snar Yarama fa yor ḇenapes sya ḇa, ḇoi Yor kawasa ḇesasar.” (Matius 9:9-13) Inja, Yesus imarisen faro snonkaku ḇesasar sya fararur sena ke? Oroḇaberi. Imarisen insa simbror ro sasar sena. Ma nane iso bar ḇefandun kaku ro ankankinem Yesus ikofenna. (Matius 4:17) Yesus fyawi snar ”snon ḇeyor som ma snon sasar” ḇemarisen ḇefadwer kenem ḇyeja. Srama ḇe Matius rum ḇyeja fa san monda ḇa. Sisya ro diwa snar siso Yesus i. (Markus 2:15) Faḇye kaku, snonkaku Farisi ansi smam snonkaku syaḇa raris moḇ Yesus myam snonkaku ansi rai. Skara ḇo soḇe, snonkaku sya sipok sfadwer kenem senaḇa. Ma smam siḇe snonkaku ḇesasar ḇesmai saneraroḇa. Farisi sine siḇese kuker Yahwe I, isoine Allah ḇenapes ma Bena sawarwar.

16. Rosai na panitia pengandilan sine smam kakuna?

¹⁶ Rofafisu ine kako, fandun fa penatua sya sifarari Yahwe I, Allah ”ḇeswar nanapes”. (Mazmur 37:28) Randakya, fandun fa ’smamkukeḇ’ fa smame fararur ḇesasar oso isyandi. Nasya ido, nari siso akurfasna ḇero Refo fa sḇuki sun snemuk rosai na sifrurna. (Ulangan 13:12-14) Saksun ro panitia pengadilan ido, na skarauser na kaku ma smame na snonkaku ḇefrur sasar ḇeba ani imbror kaku kwar ke roḇa. Roi ḇeradinema napyan ḇa kukro marandor ine nsae ro sneri ma mamam ḇyena faro sasar ifrurna. (Wahyu 3:3) Ḇefrur sasar ani fandun fa imbror kaku insama ismai sawarwar.a—Mam fas-fas kasun ro sop.

17, 18. Insama penatua bisa sfawi snonkaku ani imbror kaku ke roḇa ido, rosai na sifrur ya? (Mam sonin ro randak artikel ine.)

¹⁷ Yahwe ma Yesus sufawi mnis kaku rosai ḇero snonkaku oso sneri ma roi kyarana snaro suma sumamkir kosnesna. Ḇape, penatua jadifa sifawi rosai ḇero snonkaku sisnesna. Inja, ḇe penatua ido, moḇsa na wafawi snonkaku oso imbror kaku kwar ke roḇa? Ḇeponya, ḇenadi resari wor fawinanem ma ḇaḇemamḇaḇir. (1 Raja-Raja 3:9) Ḇesuruya, ḇepake Allah Wos Ḇyena ma publikasi ḇero manfamyan ḇesoasuser sya insama mame roi ḇeḇese ro ”fafardun ro supswan ine” ma ”ḇaḇefafardun Allah imarisen na”, isoine marandor ḇekaku. (2 Korintus 7:10, 11) Farkor rosai Refo ikofen kuker snonkaku ḇembror ma ḇembrorḇa, mam sneḇaḇir sena, swaruser sena, ma rosai sifrurna.

¹⁸ Ḇekyorya, kwara mura ro snonkaku ani, mboi faro rosai ifrur kwar annaḇa. Rosai ḇefnai ifrur radirya? Rosai ḇefnai fa dun snemuk faro roi oso? Farawrowes ma ḇaḇeraryarḇa rosai ismana? Refo ḇyardi snar Yesus, iso ḇeḇe bukor sidang jemaat, ”na ḇyemankara snar rosai myam ro mka ḇyena monda ḇa, ḇaido ḇyuk farkarkor snar rosai ryower monda ḇa. Na ḇyemankara snonkaku ḇena roi noḇa kuker nanapes ma ḇyuk anun swarapepen kuker sne ḇesiper faro snonkaku ḇemayar ro supswan.” (Yesaya 11:3, 4) Penatua mkoya, Yesus kyanow mkokwar fa mkofaduru sidang jemaat ḇyedi, ma na isaramper mko insa mkoḇemankara kuker napes ma sawarwar. (Matius 18:18-20) Kokofen kasumasa nabor faro penatua sya snar sfandun ko! Si kako sifnoḇek kofa kakfasna nanapes ma kakswar min kobansi.

19. Farkarkor rosai kun ro kota ḇekadaunwarek komarisen kofrurna?

¹⁹ Sasoser Moses naser ”fawawi ma farkarkor ḇenapesya”. Sasoser ani fyarkor ko kuker Yahwe ma farkankin-farkakin Ḇyena. (Roma 2:20) Kota ḇekadaunwarek ine nfasnaḇair Sasoser ḇefarkor moḇsa penatua sya ”smankara kuker nanapes”. Kota ḇekadaunwarek ine kako fyarkor kokam fa kofasnai ”saswar soasuser ma sawarwar”. (Zakharia 7:9) Imbo, kona fesepen kuker sasoser Taurat nane werḇa. Ḇape, Yahwe fyadwer mamam Ḇyenaḇa. Nanapes ma sawarwar nefandun kaker faro I. Inja, kokofen kasumasa nabor snar kosyom Allah ḇemnis radirya. Mkorama koso rari-rari ḇeba Ḇyenane ma kosewar fadadiren ro I!