”Rwower Farkarkor ma Ananun Insama Wafawinanem”

1. Rariso na kosma fawawinanem, ma rosai faindaya?

YAHWE iso knam ro fawawinanem, ma kuker sne ḇesiper byukna faro ko. Ro Yakobus 1:5 doḇe, ”Rofyor rofandu mko ono sisya smamkarkir mnis ḇa ido, sor mamkarkir ani ro Allah kada, ḇeḇuk faro snonkaku kam kuker sanemura ma ḇeyor kaḇerna ḇa.” Bisa kosma fawawinanem rofyor korower Allah farkarkor Ḇyena. Fawawi ine bisa nafnoḇek ko insama kofrur sasarḇa ma kofanam syadi ḇe Yahwe I. (Amsal 2:10-12) Faindaya, nari kosma saneraro kankenem fyoroya.​—Yudas 21.

2. Rosai nari befnobek ko fa kobesyowi Allah farkarkor Byena?

² Snaro koine konapesḇa ma nyan sifarkor ko neḇeseyae, inja fyorno ido samswen ḇeko fa korower farkarkor ro snonkaku ḇesesya. Imbude komam farkarkor anna ḇe roi ḇeḇyeḇa. Ḇape rofyor kosma faindaya kwar nari kofawi kaku snar Allah iswar ko. Ro Amsal 3:11, 12 doḇe, ”Roma yedi, pampum awer disiplin ḇerama ro Yahwe I. Snar fyarkor snonkaku iswarsya.” Kokyar kaku Yahwe imarisen roi ḇepyum faro ko. (Wasya Ibrani 12:5-11.) Snaro myambir kaku ko, inja farkarkor ḇyukna imnis kuker rosai kosmana. Ro artikel ine nari kofarkor roi rifiak kuker disiplin: (1) koḇedisiplin mankunko, (2) farkarkor ro sinansya, (3) disiplin kosma ro sidang, ma (4) roi oso ḇefrurduf syadi ro kosma disiplin.

KOSMA FAWAWINANEM ROFYOR KOḆEDISIPLIN MANKUNKO

3. Rariso romawa oso bisa fyarkor mankundi? Fawar contoh oso.

³ Rofyor koḇedisiplin mankunko ido, na bisa kofara roi kofrurna ma nyan kakara koḇena. Ḇape roi ine ryama ro mankundiḇa, fandun fa koḇensewarna. Imnis raris romawa oso ḇefarkor randak fa dek sepeda. Nari sinan ḇyedi dufpyan sepeda ani insama romawa ani isapi ḇa. Ramnai fawawas kmari iserepeni ḇa rofyor romawa ani bisa ifrar ro mankundi kwar. Rarirya kako, romawa sesya na sna fawawi ma sedisiplin mankunsi rofyor sinan sya kuker kaḇaḇaḇ sifarkor si ”farkarkor ma ananun [Yahwe] I”.​—Efesus 6:4.

4, 5. (a) Rosai ḇefnai fa koḇedisiplin mankunko ima bar ḇefandun ro ’kenem ḇebabo’? (b) Rosai ḇefnai fa kofafko awer rofyor kofrur sasar?

⁴ Snonkaku ḇemambir Yahwe rofyor siba kwar, imbude sifawi kwar rariso sedisiplin mankunsi. Ḇape, kakuya sḇesnonkaku Kristen ḇesma fawawi nabor ḇaim. Snonkaku ansine bisa sisma fawawi ḇepyum rofyor sḇensewar fa sna ’kenem ḇebabo’ ma sifarari Kristus i. (Efesus 4:23, 24) Bar oser ḇefandun syadi ro kenem ḇebabo iso koḇedisiplin mankunko. Ine nari nafnoḇek ko fa ”kobur ḇarḇorna ma rmomen supswan ine ma insa kokenem kuker fawawinanem, nanapes ma ḇaḇeari faro Allah ro supswan ine.”​—Titus 2:12.

⁵ Kokame konapesḇa. (Pengkhotbah 7:20) Inja rofyor kofrur sasar ido, kokara awer jadifa koḇedisiplin mankunko ḇa. Amsal 24:16 ikofen, ”Snonkaku ḇenapes isapi kali rifik raryano, na dores kaḇer.” Rariso na ’kores kaḇer’ raya? Bisa kores kaḇer snar samambraḇ mankun koḇena ḇa, ḇape fafnoḇek ro rur ḇesren Allah. (Wasya Filipi 4:13.) Bon ro rur ḇesren ani iso ḇaḇefarmku mankun ḇaido imnis ra koḇedisiplin mankunko.

6. Rariso insama farkarkor Refo koḇena nun marisen? (Mam sonin ro randak artikel ine.)

⁶ Insama koḇedisiplin mankunko, fandun kaku koḇenadi, kofarkor Refoya, ma kowasenkara rosai kofarkorna. Ḇape, rosai wafrurya rofyor samswen ḇe Au fa wafarkor Refo ḇaido wamyaren wafarkor ḇa? Waswarepen Yahwe nari ifnoḇek Au fa nwa ’marisen’ faro Allah Wos Ḇyena rofyor wasewar fafnoḇek ro I. (1 Petrus 2:2) Ro randakya, wafarkor Refo menit ḇeḇeso monda resari. Fyoro mura nari farkarkor Refo Bedi nun marisen ma napyan fa wafrurna. Rofyor wawasenkara Yahwe Wos Ḇyena, nari nun marasrisen ḇeba faro Au.​—1 Timotius 4:15.

7. Rariso koḇedisiplin mankunko bisa nafnoḇek ko fa kosewar ḇepon fararmyan faro Allah I?

⁷ Koḇedisiplin mankunko, na nafnoḇek ko fa komarisen kofarmyan ḇe Allah Yahwe I. Imnis raris, kamam oso iryaḇ werḇa ro fararmyan inja dun snemuk fa dakḇe perintis biasa. Rariso isma fafnoḇek raya? Iwasya artikel ḇero majalah koḇena kuker fararur perintis ine ma dunna ro nadiya. Kuker ifrur rarirya, fasfesepen ḇyedi kuker Yahwe nasambraḇ syadiwer. I kako ḇyensewar fa daksun ro perintis ekstra ro fafisu ḇeḇeso ker. Isma roi ḇedwarek nabor raryano ḇyensewar pdef fa ifrur nabor syadi wer ro fararmyan ḇyedi. Ḇarpur mura, dakḇe perintis biasa.

MKOFARKOR ROMAWA MKOḆESI KUKER ANANUN RO YAHWE I

8-10. Rosai na ḇefnoḇek sinansya insama sifarkor romawa sesya fa sifarmyan ḇe Yahwe I? Fawar contoh oso.

⁸ Yahwe dor ro sinansya insama sifarkor romawa sesya ”farkarkor ma ananun Manseren [Yahwe].” (Efesus 6:4) Ine roi ḇepyanḇa ro fafisu ine. (2 Timotius 3:1-5) Rofyor romawa sya sḇeaḇen, sifawi ḇaim rosai ḇekaku ma ḇesasarna. Sneuser sena neḇefarkin ḇaim ro Refoya. Inja sifandun wos farkor ḇaido ananun. (Roma 2:14, 15) Manfawinanem Refo oso ikofen, wos Yunani faro ”farkarkor” kyurfasna kako ḇe sifarkor romawa sesya fa sna fakamamar faro rosai sifrurna.

⁹ Rofyor sinansya sifarkor romawa sesya kuker saswar ido, romawa sesya nari sḇaḇir sinan sesya siswar si. Sifawi jadifa sifrur roi nakam ḇa ma rosai sifrurna nari nun bon ḇepyum ḇaido ḇeḇyeḇa. Inja, sinan Kristen sya fandun fa sikyar faro Yahwe fawawi Ḇyena rofyor sifarkor romawa sesya. Nyan sifarkor romawa sesya bisa neḇeseyae imnis kuker moḇ sramaya. Ḇape, sinan ḇemnaf Allah I sya sikyar faro mankunsi ḇa ma pengalaman sena ḇa ḇaido kakara snonkakusya.

¹⁰ Bisa kofarkor ro Nuh contoh ḇyedi. Rofyor Yahwe iwan i fa ḇyawes wai ḇeba oso, Nuh ikyar pengalaman mankun ḇyenaḇa snar dakfawi ḇyawes wai ḇeba ro ras oso ḇaime. Fandun fa ikyar faro Yahwe I ma ifrur roi nakam ’imnis’ kuker rosai Yahwe ikofenna. (Kejadian 6:22) Bonya, wai ḇeba ani fyaspar Nuh ma kina ḇyesya! Nuh i kako ifarkorpyum romawa ḇyesya snar ikyar faro Allah fawawi Ḇyena. Sikenem ro fafisu ḇesamswen rofyor Faḇruḇ ḇeba ryama ḇaim raryano, Nuh ifarkorpyum romawa ḇyesya ma ḇyuk contoh ḇepyum faro si.​—Kejadian 6:5.

11. Rosai ḇefnai fa sinansya sḇensewar kaku fa sifarkor romawa sesya?

¹¹ Auma sinan ido, rariso waso Nuh contoh ḇyedi rofyor wafarkor romawa Bedi? Rwower rosai Yahwe ikofenna, waso ananun ro Wos Ḇyena ma organisasi Ḇyedi. Ḇarpur mura ido, romawa Bedi nari ḇyesyowi kaku rosai wafrur kwarna! Naek oso fyas, ”Yakofen kasumasa faro nyan sinan yedi fyarkor aya. Sufnoḇek ayafa yafanam syadi ḇe Yahwe I.” Kakuḇae, sinansya imbude sḇensewar kwar fa sifarkor romawa sesya, ḇape imbude ras oso romawa ani kyinfir fa ibur Yahwe I. Ḇape, rofyor sinansya sḇensewar kaku nari sna sneuser ḇesren ma sikyar romawa sesya nari kyaḇer ḇe Yahwe I. 

12, 13. (a) Rofyor romawa oso sepecat i, rariso sinansya sifasnaḇair sisouser Allah I? (b) Fawar pengalaman oso ḇefasnaḇair fainda rofyor sinansya sisouser Yahwe I?

¹² Faro sinan ḇeḇesosya, roi oser na ḇefrur soasuser sena faro Yahwe neḇemam rofyor romawa sesya sepecat si. Ineiso imbesrar oso ismana, inaikir ḇyedi sepecat i ma syae ro rum skoḇedi. Ikofen, ”Yasewar alasan ro publikasi koḇena insama yafanam ma yawos kuker romawa ma kpu yedi.” Ḇape, swari ikofen ḇe i snar romawa subanya ikamar sasar ḇyena ro mankundi, isya ro subrasna werḇa. Fandun kaku susouser faro Yahwe I.

¹³ Taun ḇeḇeso ramnai, romawa suḇedi kyaḇerwer ḇe sidang. Snari doḇe, ”Kirine ḇyetelfonker aya ḇaido fyarem SMS ras ḇe ras ḇe aya! I kako ḇyesyowi aya ma swa yeja snaro nusouser faro Allah I. Fasfesepen nkoḇena syambraḇ syadi.” Rofyor sepecat romawa Bedi ido, na ”wakyar faro Yahwe kuker snembri ḇesiper ke”? Na fasnaḇair ḇe I snar ”wakyar faro kakara mankun Bena ḇa ke”? (Amsal 3:5, 6) Waswarepen, Yahwe disiplin Ḇyena ima fasasna ro sawarwar Ḇyena faro ko. Koḇefnder awer snar ḇyuk Rumkun Ḇyedi kwar faro snonkaku syakam ma romawa koḇedi kako. Allah imarisen kokame kokenem fyoro. (Wasya 2 Petrus 3:9.) Inja, mkokyar kaku farkarkor ma farkankin Yahwe Ḇyena nkakubos ḇeri. Mkosouser faro Yahwe I pdef rofyor roi anna nafrur sne mkoḇena naduf. Mkorower Allah disiplin Ḇyena, ma mkopampum awerna.

RO SIDANG YADORI

14. Rosai faindaya rofyor kosouser akurfasna Yahwe ḇyuk ḇeko roro ’manfamyan ḇesouser sya’?

¹⁴ Yahwe ḇyeasas nari myam faduru ma ifarkor sidang Kristen. Yahwe ifrur roi nane kuker nyan nabore. Imnis raris, Yahwe ryem Rumkun ḇyedi fa ḇyebukor ro sidang Kristen, ramnai Yesus ḇyuk fararur faro ’manfamyan ḇesouser’ fa sfasos anan rur ro fafisu ḇemnis. (Lukas 12:42) Manfamyan ansya sḇuk akurfasna ḇeko ḇaido farkarkor ḇefandun faro ko. Bisa kwara kuker faya oso imbude warowerna ḇaido artikel ro majalah koḇena wawasya kwarna, ḇefnoḇek Au kwar fa fadwer kakara ḇaido kenem Bedi. Ḇaḇir rarirya ido, nari wamarisen kaku snar waso kwar Yahwe farkarkor Ḇyena.​—Amsal 2:1-5.

15, 16. (a) Fainda rosai kosma ro fararur marḇak penatua sya sifrurna? (b) Rariso kofnoḇek fararur penatua sya?

¹⁵ Kristus i kako ḇyuk ’roi ḇeḇor ḇeḇye faro snonkaku’ isoine penatua ḇeḇefarkin sidang sya. (Efesus 4:8, 11-13) Rariso kosma fainda ro fararur marḇak sena? Bisa kakfasnai kakyar ma soasuser raris si ma koso ananun ḇeḇeknam ro Refo sḇukna. (Wasya Ibrani 13:7, 17.) Penatua ansya siswar ko ma simarisen insama kofanam syadi ḇe Yahwe I. Rofyor smam koso fananjur yawer ḇa ḇaido koraryaḇ werḇa nari sifnoḇek ko ḇeri. Nari srowerpyum ko ma sisambraḇser ko kuker ananun ḇemnis ro Refo. Wamam fafnoḇek sḇuk nane ḇe fasasna Yahwe saswar Ḇyedi faro Au ke?

¹⁶ Waswarepen, napyan ḇe penatua sya ḇa fa sḇuk wos ananun ḇeko. Kwarapan, rariso nabi Natan sneḇaḇir ḇyedi rofyor ḇyuk wos anun ḇepakrek faro Raja Daud rofyor ḇyensewar fa iyokef sasar ḇeba ḇyedi? (2 Samuel 12:1-14) Kwarapan kako Manwawan Paulus sneḇaḇir ḇyeja, rofyor isonek Petrus, oser ro manwawan ri 12 ansi ḇemamfarfir naek srar Yahudi ḇa sya. Paulus fandun fa imkak ḇa. (Galatia 2:11-14) Inja, rariso wafnoḇek penatua sya? Fasna sne ḇerun, napyan fa sawos ḇe Au ma fasnaḇair waḇesyowi kaku si. Wamam fafnoḇek sena ḇefasasna Allah saswar Ḇyedi. Wafrur rarirya ido, nari wasma fainda ma penatua sya nari simarisen sifrur fararur sena.

17. Rariso penatua sya sifnoḇek imbesrar oso?

¹⁷ Imbesrar oso fyawar roi ḇeḇyeḇa isma ro fafisu iwara, nafnai fa samswen ḇe i fa iswar Yahwe I. Inja ine nafrur fa ḇyestres. Doḇe, ”Fandun fa yawos ḇe penatua sya. Simsor ḇaido sḇuk sasar ḇe aya ḇa, ḇape sisambraḇser ma sḇuk sneprei ḇe aya. Fananjur imnai, sna fararur nabor raryano nari oso rofandu si ryama ifuken abar yedi. Snar kenem yedi rofafisu iwara, yaḇaḇir Allah na iswar ayaḇa. Ḇape, Yahwe ḇyuk fafnoḇek ro sidang ma roro penatua sya insama fyasnaḇair iswar kaku aya. Yaḇenadi insama yabur awer Yahwe I.”

ROI OSO ḆEFRURDUF SYADI RO KOSMA DISIPLIN

18, 19. Rosai ḇefrurduf syadi ro kosma disiplin? Fawar contoh oso.

¹⁸ Kosma disiplin nari nafrur fa koduf kaku, ḇape kopampum disiplin ro Allah bisa nun ḇe roi ḇefrurduf syadi. (Ibrani 12:11) Bisa kofarkor ro contoh ḇeḇyeḇa ro Kain ma Raja Zedekia su. Rofyor Allah myam Kain dayin kaku kasun ḇyedi ma imbe myuni, Allah ḇyuk swarapepen ḇe Kain i, ”Rosai ḇefnai wamsor fafaya ma fafkondi? Fadwer kenem beja ma wafur pyum ido, nari yakarem au wer. Mboi roba ido, sasari fyair fanam au kwar ma ibe poik au kaku. Mun kaku i. (Kejadian 4:6, 7) Kain pyampum Yahwe disiplin Ḇyena ma myun kasun ḇyedi, inja isma samswen ro kankenem ḇyedi ḇesiper. (Kejadian 4:11, 12) Kain ryower Allah ido, nari ḇyekandera ḇa.

¹⁹ Zedekia ima raja ḇeryarḇa ma ḇeḇarḇor. Rofyor ḇyepoik ya, fafisu ḇero Yerusalem naḇyeḇa kaku. Nabi Yeremia ḇyuk swarapepen ker ḇe i insama fyadwer kenem ḇyeja. Ḇape, raja ani pyampum Yahwe disiplin Ḇyena ma isma bon ḇeḇyeḇa. (Yeremia 52:8-11) Kakuḇae, Yahwe imewer kombran sasar ma ḇarpurya koḇekandera!​—Wasya Yesaya 48:17, 18.

20. Snonkaku ḇerower Allah disiplin Ḇyena ma snonkaku ḇepampumna rosai na sismana?

²⁰ Baboine snonkaku ḇebor skoryae ma simewer srower Allah farkarkor Ḇyena. Ḇape, kerower snonkaku ḇepampum Allah farkarkor Ḇyena nari sḇekandera kaku. (Amsal 1:24-31) Inja, mkorama ’kowower ananun ma nari kofawinanem’. Imnis raris Amsal 4:13 ikofen, ”wuf nako faro farkarkorya; rwir awerna. Faduru pdefna snaro iso kankenem ḇedirya”.