Disiplin Iso Nyan Yahwe Fyasnai Iswar Ko

Disiplin ḇaido wos aprer knam ḇyena iso farkarkor ma akurfasnai, ḇoi ine kako faro sbuk wos sonek ma aprer. Yahwe byuk wos aprer ḇe ko insama kosyom I imnis marisen Ḇyedi. (Rm 12:1; Ibr 12:10, 11) Fyorno ido, wos aprer imbude nafrur koduf kaku, ḇape nari nun koḇe nyan ḇekaku ma kosmai payamyum. (Ams 10:7) Ḇebuk wos aprer ma ḇesmai wos aprer rosai siswarepen kaku na?

Ḇebuk wos aprer. Penatua sya, sinan, ma snonggaku ḇesesya sḇesewar marmar kaku fa sbuk aprer imnis kuker parkara raris Yahwe ifrur na. (Yer 46:28) Ma aprer ḇepakrek fandun fa neḇebuk imnis kuker fandun ro ḇesmai ani ma neknam ro saswar ya.​—Tit 1:13.

Ḇesmai wos aprer. Wos aprer risai monda kosmai na, kopok kosampum awer na ḇoi koḇesewar fa kosouser na. (Ams 3:11, 12) Snar koma snonggaku ḇenapes ḇa si ko, inja kofandun wos aprer, ḇaido anun. Bisa kosmai na rofyor kowasya Refo ḇaido ro fananjur na. Ḇaido kosmai na ro panitia pengadilan. Kosouser faro wos aprer sbuk na ido, nari kokenem pyum ma kosmai kankenem ḇekain fyoro ya.​—Ams 10:17.

MAM VIDIO ”YAHWE ḆYUK DISIPLIN FARO SNONGGAKU ISWAR SYA KAM,” RAMNAI KWAREM FAKFUKEN-FAKFUKEN NANE:

• Canon kenem ḇyedi ro randak ya ryaiso ma moḇsa nefararwei rai?

• Imnis rariso wos aprer ḇefo saswar ismai ro Yahwe I?

• Ro fawar ḇyedine farkarkor risai kun ro na?