Ḇyepoik Syadi Mboi Kyarauser Pyum Ko

1, 2. (a) Rariso Yahwe fyasnai nyan ifrur pyum snonkaku sya iḇese ro snonkaku ḇena papoik sya rai? (b) Rosai nari kawos ro artikel inena?

SNONKAKU ḇena papoik sya fyorno ido sḇepoik ḇesesya ḇaido sifrur pyum si ḇa. (Matius 20:25; Pengkhotbah 8:9) Yahwe ima ipok dakfrur rarirya ḇa! Ima Manḇepoik Syadi ro supswan ma farsyos ḇeba ine, mboi kyarauser pyum snonkaku ḇenapes ḇa koine. Ifrur pyum ko ma fyandun kaku faro rosai koḇaḇir ma roi kofandun na. Iswarepen koine konapes ḇa ma ifawi raryar ḇa koḇena, inja dor ko ḇa fa kofrur roi kopok kofrur ḇa na.​—Mazmur 103:13, 14.

² Ro Refoya, kofarkor Yahwe kyarauser pyum kaku kawasa Ḇyesya. Mkorama kawos roi rikyor. Randak ya, kuker sne ḇenaḇye Yahwe ifnoḇek Samuel ḇebaḇa kaker ani fa ikofenḇair anun samamyai faro Imam Ḇeba Eli. Ḇesuru ya, Yahwe ikḇaḇ kaku faro Moses i fafisu ḇyaḇir ipok ḇa fa fyarkin er Israel fa sisasyarbur Masir. Ḇekyor ya, Yahwe kyarauser pyum er Israel sya fyor sibur sup Masir. Rosai kofarkor ro Yahwe ro farfyar nane, ma rariso kakfrur raris I rai?

KYARAUSER PYUM ROMAWA OSO

3. Rosai ḇeḇesya ḇekur Samuel ḇebaḇa kaker ro roḇ oso, ma fakfuken rosai imbude kofuken ya? (Mam sonin ro randak artikel ine.)

³ Samuel fyarmyan ro tabernakel rofyor ibaḇa kaker. (1 Samuel 3:1) Ro roḇ oso, fyor denef, roi ḇefnak ḇa oso ḇeḇesyandi.a (Mam fasfas kasun ro sop.) (Wasya 1 Samuel 3:2-10.) Samuel ryower snonkaku oso dor snonsnon ḇyedi. Doḇerada ḇeyor i iso Imam Ḇeba Eli ḇemansar kwar ani. Inja, ikḇok ḇeri ma ifrar fa isrow Eli i ḇo doḇe, ”Aya isoine, wor aya ke?” Ḇape Eli ikofen yoḇ i, ”Yor au ba.” Roi ḇeḇesyana ndarirya rawo rarwan risuru syadi raposa, insape Eli fyawi Allah iso ḇeyor Samuel i. Inja, Eli ikofenḇair ḇe Samuel i rosai fandun fa kyarem ya, ma Samuel ifrur raris moḇ Eli ikofen ndraya. Rosai ḇefnai fa ro randak ya, Yahwe ikofenḇair ḇepon ḇa ḇe Samuel i snar mankundi iso ḇeyor Samuel i? Refo ikofenḇair roi ine ḇa. Mboi, imbude Yahwe ifrur rarirya snar kyarauser pyum Samuel sneḇaḇir ḇyedi.

4, 5. (a) Rosai Samuel ifrur rofyor Yahwe iwan i fa ikofenḇair anun ḇe Eli i? (b) Rosai kofarkor ro Yahwe roro farfyar ine?

⁴ Wasya 1 Samuel 3:11-18. Ro Yahwe Sasoser Ḇyena, iwan romawa sya fa sesyowi snonkaku ḇesinan kwar sya, iba syadi snonkaku ḇena papoik sya. (Keluaran 22:28; Imamat 19:32) Inja, na samswen ḇe ko fa kowasenkara moḇsa romawa kasun raris Samuel i rya fa isrow Eli ro arwo ya, ma imkak ḇa fa ikofenḇair anun samamyai ro Allah. Refo ikofenḇair ḇe ko Samuel ”imkak fa ikofenḇair ḇe Eli fasasna ani”. Imbape, Allah fyasnaiḇairbos ḇe Eli snar iso ḇeyor Samuel i. Inja, Eli dor Samuel i fa iyokef awer rosai Yahwe ikofen kwar anna. Samuel isouser faro Eli ma ”fyawar roi nakam ḇe i”.

⁵ Anun ine insape ryower randak na ḇa, snaro ḇepon ya ”Allah manfamyan Ḇyedi oso” ikofenḇair kwar anun ḇeradine ḇe Eli i. (1 Samuel 2:27-36) Farfyar ine fyarkor ko snar Yahwe ima kyarauser pyum ko ma fyawinanem kaku.

6. Farkarkor rosai kun ro nyan Allah ifnoḇek Samuel ḇebaḇa kaker ani?

⁶ Auma romawa babo disau ke? Rarirya ido, farfyar ḇekur Samuel ḇebaḇa kaker ine fyasnaiḇair Yahwe ifawi pyum kaku samswen Bena ma rosai ḇaḇiri. Imbude wamai ma samswen fa ḇaryas ḇe snonkaku ḇeba sya ḇaido wasnai ḇese ro bati ḇena umur ḇemnis kuker Au. Mboi wakyar Yahwe ima imarisen ifnoḇek Au. Inja, ḇenadi yoḇ I ma wakofenḇadir rosai ḇaḇir kaku na. (Mazmur 62:8) Kwarauser farfyar ḇero Refo ḇekur romawa babo sya raris Samuel i. Ma wawos ḇe naek srar ḇena umur ḇemnis Au ḇaido ḇeumur syadi ḇena samswen raris Au mboi sifrur mnis na kwar. Na sfawar ḇe Au fafisu Yahwe ifnoḇek si, imbude kuker nyan skara na ḇaḇeri.

KYARAUSER PYUM MOSES I

7, 8. Rariso Yahwe fyasnai fyandun kaku Moses sneḇaḇir ḇyedi rai?

⁷ Rofyor Moses ḇyeumur taun ri 80, Yahwe ḇyuk ḇe i fararur ḇesamswen kaku. Isoine fyaspar er Israel sya ro ḇaḇewomen ro Masir. (Keluaran 3:10) Fararur ine ifrur kanandor ḇe Moses i, snaro ḇye manfarandows ro Midian ro swaf taun ri 40 kwar. Moses doḇe, ”Manseiso manyaine inja na yaraḇe Firaun ḇarpon ḇyedi ma yun snonkaku Israel sya fa sisasyarbur Masir ya?” Yahwe ḇyuk kakyar ḇe Moses i, ”Nari yarous au.” (Keluaran 3:11, 12) Yahwe ḇyeasas kako manfarkin ro Israel sya nari ”simarisen kaku fa srower” rosai ikofen na. Mboi Moses ifuken, ”Ḇape rariso rofyor sikyar aya ḇa ma simewer srower ayandi?” (Keluaran 3:18; 4:1) Ine nfasnai Moses ikofen Yahwe ima kyara sasar! Mboi Yahwe kyaḇaḇ faro Moses i. Yahwe ḇyuk ḇe i papoik fa ifrur mujisat. Kaku ya, Moses iso snonkaku ḇerandak Refo dap ḇe snonkaku ḇesmai papoik ḇeradine.​—Keluaran 4:2-9, 21.

⁸ Imbape, Moses ḇyuk sano ḇese wer. Doḇe ima dawoskir ḇa. Inja Allah ikofen yoḇ i, ”Nari yafnoḇek au. Nari yafarkor au insama wafawi rosai fandun fa wakofen na.” Moses nya kakyar kwar ke? Oroḇa, mboi dor Allah I fa iwan snonkaku oso ḇese! Mura, Yahwe imsor. Mboi fyasnai fyandun kaku faro rosai na Moses ḇyaḇiri, inja iwan Harun i fa dawos pyan ḇe Moses i.​—Keluaran 4:10-16.

9. Rariso Yahwe kaḇaḇab ma frur pyum Ḇyena nafnoḇek Moses i fa ḇyemanfarkin ḇepyum?

⁹ Rosai kofarkor ro Yahwe I ro farfyar ine? Snar Yahwe ima Ḇyepoik Syadi, inja na ḇyuk papoik Ḇyedi fa syambraḇser Moses i ma ifrur i fa isouser. Ḇape, Yahwe kyaḇaḇ ma fyasnai frur pyum, ma ḇyuk kakyar ḇe manfamyan Ḇyedi ḇefasnai sne ḇerun ine snar nari ryous i. Ine nun bon ḇepyum ke? Imbo! Moses, ḇyemanfarkin ḇeba faro Allah kawasa Ḇyesi. Ḇyensewar kaku fa dakfasnai mayaryaren ma kyarauser pyum snonkaku ḇesesya, imnis raris moḇ Yahwe fyasnai ḇe i ndraya.​—Bilangan 12:3.

10. Fainda rosai na kosmai rofyor kokarauser pyum ḇesesya raris Yahwe I?

¹⁰ Farkarkor rosai kosmai ro farfyar ine ro baboine? Auma snonswa, sinan, ḇaido penatua disau ido, nwa papoik faro snonkaku ḇese. Iso ḇefnai fa, fandun kaku waso pyum Yahwe nyan Ḇyena kuker kwarauser pyum, fasnai frur pyum, ma kaḇaḇab faro swambri, romawa Bansi, ma naek srar ro sidang sya. (Kolose 3:19-21; 1 Petrus 5:1-3) Wakfrur raris Allah Yahwe, Yesus Kristus i, ma Moses Ḇeba Syadi sko ido, nari napyan faro ḇesesya fa sfanam ḇe Au, ma nari swambraḇser si. (Matius 11:28, 29) Nari buk kako nyan kenem ḇepyum fa sakso na.​—Ibrani 13:7.

ḆYEPOIK FA ḆYUK FASASPAR MBOI KYARAUSER PYUM SI

11, 12. Moḇsa Yahwe myam kawasa Ḇyansi fa sismai payamyum rai rofyor dun si fa sisasyarbur sup Masir?

¹¹ Imbude snonkaku Israel ḇesasyarbur Masir ro taun 1513 SM sya sisyadi ro yuta rikyor. Ro raryur ine, romawa, ḇesinan kwar, ma sino ḇeduf ḇaido ḇeryar ḇa sya sisya. Raryur ḇeba ine fyandun Manfarkin ḇefandun si ma ḇeyakfawi si. Yahwe iso Manfarkin ḇeradirya, ma kyinfir Moses i fa ḇyefaker I. Bon ya, kawasa Israel sibur kuker payamyum ro moḇ sḇarek fyoro kwar ro dianya.​—Mazmur 78:52, 53.

¹² Moḇsa Yahwe myam kawasa Ḇyansi fa sismai payamyum rai? Fyasos mnis er Israel sya ”kuker awnos, raris sordade sya” fa sisasyarbur Masir. (Keluaran 13:18) Snar seḇefasos awnos kaku ro nyan ine, inja sikyar Allah iso ḇefara marandan sena. Yahwe ḇyuk kako faro si ”mandep ro arkok” ma ”for ḇe sananai” ro roḇ ya insama siswarepen isya ryous si, fyarkin si, ma kyadaunwarek si. (Mazmur 78:14) Er Israel sya sfandun roi ḇeḇuk kakakyar nane snaro rosai nari kero nkur si wer.

13, 14. (a) Rariso Yahwe fyaspar kawasa Israel ro Soren Ḇerik ya rai? (b) Rariso Yahwe fyasnaiḇair ima ḇyepoik syadi ro snonkaku Masir sya?

¹³ Wasya Keluaran 14:19-22. Kwarapan Ausya wakro fandu kawasa Israel sya. Wawarai kwar. Sordade Masir sisya sro ḇarpur Bedi, ma Soren Ḇerik isya ro ḇarpon Bedi. Mura, Allah ifrur roi oso. Adir mandep ḇero ḇarpon kyandenbur ḇe moḇ mkoḇarek ya ḇarpuri, dores rofandu mko ma snonkaku Masir sya. Sro pampan ya, mboi moḇ mkoḇarek na nasnai kaku! Mura, mam Moses ikanow ankyon ḇyedi ḇe soren ya, ma wam doḇer ḇero wamurem ya iso, nafnai fa soren ya irwas ḇesuru, inja sampak ḇeba isya fa mkombran ro na. Rarirya, Au ma kina Bedi, rofanfan sya, mkombranuk kuker awnos ro soren ya ropukdi fnoḇek snonkaku Israel ḇesesya. Kwandor kaku snar saprop ya ḇyemarser ḇa ma dakyuk ḇa. Saprop ya idok ḇa ma pyakrek, inja napyan fa mkombran ro bori. Inja, snonkaku ḇembran fasaw ḇa kako na simbranuk ḇe ḇar ya kuker payamyum.

¹⁴ Wasya Keluaran 14:23, 26-30. Rofyor roi ḇeḇesya nane raposa, Firaun snon ḇeararer ma ḇefawi royoḇa iyawuser Au ma snonkaku Israel ḇesesya. Mura, Moses ikanow wer ankyon ḇyeja ḇe soren, ma war ḇeyores ro ḇar raku ma rasar ansuya subrasnepen Firaun ma sordade ḇyesya rawo simsawer. Simar kam!​—Keluaran 15:8-10.

15. Rosai kofarkor wer ro Yahwe I roro farfyar ine?

¹⁵ Kun farkarkor ḇese ro Yahwe I roro farfyar ine. Ima Allah ḇe awnos, ma ine ifnoḇek ko fa komkak ḇa. (1 Korintus 14:33) Raris manfarandows oso iswar ma myamwarek domba ḇyesi, Yahwe myamuser fandun ro kawasa Ḇyesi. Myamwarek ma kyadaunwarek si ro mbroḇ sesi. Nane nsambraḇser ma nun sneprei ḇe ko snar kofanam syadi ro papupes dunya ine.​—Amsal 1:33.

16. Rariso na kosmai fainda ro kofarkor wer nyan Yahwe fyaspar snonkaku Israel sya rai?

¹⁶ Baboine kako, Yahwe myam kaker fandun ro kawasa Ḇyesi ḇe raryur oser. Ifnoḇek si fa sna wis ḇepyum kuker I ma kyadaunwarek si ro mbroḇ sesi. Ma nari ifrur rarirya ḇesya kwar ro fafisu kandera ḇeba, kerower na ryama. (Fasasna 7:9, 10) Inja, sbabo kaker ḇaido sḇe mansar binsar kwar ke, siprei ḇaido siduf ke, Allah kawasa Ḇyesi na siboryae ḇa ḇaido simkak ḇa fyor kandera ḇeba ya ryama.b (Mam fasfas kasun ro sop.) Inja, nari sifrur roi oso kuker makak ḇa! Na siswarepen Yesus wos ḇyena, ”Mkores nako ma mkokanow ḇukor mkoḇena, snar kniko monda mkosmai makakei.” (Lukas 21:28, NWT) Iba syadi wer rofyor Gog, isoine raryur er-er ḇesambraḇ syadi ro Firaun, imbe smun Allah kawasa Ḇyesi ido, sikyar kaku Yahwe nari kyadaunwarek si. (Yehezkiel 38:2, 14-16) Rosai ḇefnai ya? Sifawi Yahwe ima ipok fyadwer I ḇa. Na fyasnai wer iso Manfaspar ḇesaswar ma fyandun faro kawasa Ḇyesi.​—Yesaya 26:3, 20.

17. (a) Fainda rosai kosmai ro kofarkor farfyar ḇero Refo ḇefasnai nyan Yahwe myamwarek kawasa Ḇyesya? (b) Rosai nari kofarkor ro artikel ḇerama ya?

¹⁷ Ro artikel ine, kawos kwar nyan rikyor moḇsa Yahwe kyarauser pyum, fyasnai frur pyum fa myamwarek, fyarkin, ma fyaspar kawasa Ḇyesi. Rofyor wawasenkara farfyar nane, swewar fa wasmai farkarkor ḇebabo ḇekur ḇe Yahwe I kuker mam mnis farkarkor ḇepon ya kofawi mnis ḇaim na. Wafarkor nabor syadi Yahwe rari-rari Ḇyena wer ido, nari waswar syadi ma wakyar syadi faro I. Ro artikel ḇerama ya, nari kofarkor moḇsariso koso Yahwe nyan Ḇyena kuker kokarauser pyum kina koḇesya, naek srar ro sidang, ma ro ḇaḇeḇaryas.