Kokarauser ma Kofrur Pyum Ḇesesya Raris Yahwe I

1. Rariso Yahwe kawasa Ḇyesi sfasnai siswaryae si?

YAHWE kawasa Ḇyesi ro supswan ḇesiper ine sḇekina oser. Siso mambekanaek ḇeswaryae si. (1 Yohanes 4:16, 21) Fyorno ido sisewar kaku fa sifrur roi ḇeba insama sifnoḇek naek srar sesi, mboi ro swaf ḇebor sfasnai saswar kuker sifrur roi kasun na. Imnis raris, sḇuk wos sandik ḇe si ḇaido sifrur pyum si. Kokarauser pyum snonkaku ḇesesya ido, ine kyurfasnai kakfrur raris Kma koḇedi ro nanki moḇ ifrur ndraya.​—Efesus 5:1.

2. Moḇsa Yesus iso mnis kaku Kmari saswar Ḇyena rai?

² Yesus iso mnis kaku Kmari. Ifrur pyum snonkaku ḇesesya ḇesya kwar. Doḇe, ”Mkoramuma faro Aya, mkokam ḇemor ma ḇembrus ma ḇeḇekandera, nari Yaḇuk mananai faro mko.” (Matius 11:28, 29) Kakfrur raris Yesus i ma ’kokarauser snonkaku ḇeryar ḇa sya’ ido, na Yahwe imarisen ma kakḇeaski kako. (Mazmur 41:1) Ro artikel ine nari kawos moḇsariso kokarauser pyum kina koḇesi, naek srar ḇero sidang, ma snonkaku kosrow ro ḇaḇeḇaryas sya rai.

KOKARAUSER PYUM KINA KOḆESI

3. Rariso snonswa oso kyarauser pyum swari sneḇaḇir ḇyedi rai? (Mam sonin ro randak artikel ine.)

³ Snonswa sya fandun fa sfasnai nyan ma sfasnai sfandun kina sesya. (Efesus 5:25; 6:4) Refoya doḇe snonswa sya fandun fa sikenem kuker fawawi ma skarauser pyum swa sesi. (1 Petrus 3:7) Snonswa ḇena fawawi, fyawi ima iḇese ro roi ḇebor ro swari, mboi ima ipyum syadi ro swari ḇa. (Kejadian 2:18) Kyarauser pyum swari sneḇaḇir ḇyedi ma ifrur pyum i kuker syowi. Binswa oso ro Kanada dakfawar swari, ”Ima ipok fa myampampum sneḇaḇir ayena ḇa ḇaido dakkofen, ’Kwara radirya awer.’ Ryower pyum aya. Imbe isonek aya ido, ifrur na kuker mayaryaren.”

4. Snonswa ḇekarauser pyum swari sneḇaḇir ḇyedi, rosai na ifrur na ḇa?

⁴ Snonswa ḇekarauser pyum swari sneḇaḇir ḇyedi, nari ipok dembuk ḇaido myam bin oso ḇese ḇa. Ine ifrur na ḇeri ke, ro media sosial ke oroḇaido ro Internet. (Ayub 31:1) Na ḇyuk media sosial fa dembuk bin ḇese ḇa ma myam situs ḇeḇyeḇa na ḇa. Kaku, isouser swari snar iswar kaku i, iswar Yahwe I, ma dayin roi ḇeḇyeḇa na.​—Wasya Mazmur 19:14; 97:10.

5. Rariso binswa oso na kyarauser pyum swari rai?

⁵ Snonswa dakso ḇeḇeḇukor ro i isoine Yesus Kristus nyan ḇyena ido, nari napyan ḇe swari fa ”ḇyesyowi” kaku i. (Efesus 5:22-25, 33) Ma rofyor binswa ya ḇyesyowi swari ido, na syewar fa ifawi mnis swari sneḇaḇir ḇyedi ma ifrur pyum i fafisu nya fararur nabor ḇaido myam samswen oso ro sidang. Snonswa oso ro Inggris doḇe, ”Fafisu ono ido, rofyor swa yedi myam mboi yasnai ḇese, ifawi samswen oso isya yakara na. Mura, iso mnis wos farkin ro Amsal 20:5. Roi anna nekankunes ḇa ido, na iwaf rawo ismai fafisu ḇesrow insape ’dun’ roi ḇero swaruser yedi, isoine dawos kuker aya.”

6. Moḇsa kokame na kofnoḇek romawa sya fa skara snonkaku ḇesesya ma sifrur pyum rai, ma fainda rosai na sismai na?

⁶ Fafisu sinan sya skarauser pyumyae si ido, na sfasnai nyan ḇepyum faro romawa sesya. Sfarkor romawa sesya kako fa skara snonkaku ḇesesya ma sifrur pyum. Imnis raris, sfarkor si insama sifrar mura-muma awer ro Balai Karajan. Ḇaido rofyor sanan kayame, na sikofenḇair ḇe romawa sesya fa siwaf isof ḇesinan kwar sya sun ḇepon roḇean sena. Kakuḇae, ḇero sidang syakam na sifnoḇek sinan sya. Inja, fandun fa koḇuk wos sandik faro romawa oso rofyor ifrur roi ḇepyum raris iseḇen kedwa ya faro ko. Romawa ani na imarisen, ma dakfarkor fa ifawi koḇuk ido nari koḇeaski syadi ḇardibur ro kosmai ya.​—Farfyar 20:35.

KOKARAUSER PYUM NAEK SRAR ḆERO SIDANG

7. Moḇsa Yesus kyarauser pyum snon ḇepro oso rai, ma farkarkor rosai kun ro Yesus i?

⁷ Ro ras oso, fafisu Yesus isya ro sup Dekapolis, kawasa sya ”ssun snon ḇepro ma ḇewos kir ḇa”. (Markus 7:31-35) Yesus ḇyuk pararei ḇe i, mboi ro ḇarpon snonkaku sya ḇa. Rosai ḇefnai ya? Snaro imbude snon ḇepro ani imai dores ro ḇarpon kawasa ḇebor sya. Yesus ifawi pyum kaku rosai ḇyaḇiri, inja ”dun snon anya fa subur kawasa ḇeḇor ansya” ḇe moḇ oso ma ḇyuk pararei ḇe i fyor suyemire. Kakuḇae, na kakfrur mujisat oḇa, mboi fandun fa kokarauser pyum sneḇaḇir ma fandandun naek srar koḇesya ma kofrur pyum si. Manwawan Paulus fyas, ”Mkorama kokarayaye insa kodifyae ko, insa kofrur roi ḇeḇye ma kofasna saswarya.” (Ibrani 10:24) Yesus ifawi pyum rosai snon ḇepro ani ḇyaḇiri ma ifrur pyum i. Inema nyan ḇepyum kaku fa kakfrur na!

8, 9. Moḇsa na kofasnai kofandun naek srar ḇesinan kwar ma ḇena baken ḇemnis ḇa sya rai? Fasnaiḇairpan.

⁸ Kokarauser pyum ḇesinan kwar ma ḇena baken ḇemnis ḇa sya. Roi ḇefandun kaku ro sidang Kristen iso kofasnai saswar, mboi sasewar fa kofrur roi nabor ro swaf kawan ḇa risyaḇa. (Yohanes 13:34, 35) Snar saswarya, kosewar kaku fa kofnoḇek naek srar ḇesinan kwar ḇaido ḇena baken ḇemnis ḇa sya fa sakso ro fananjur ma ḇaḇeḇaryas. Imbude napyan ḇe ko ḇa ḇaido mankunsi sisambraḇ werḇa fa sifrur nabor syadi, mboi komarisen pdef fa kofnoḇek si. (Matius 13:23) Michael, ḇekain monda ro kursi roda, ikofen kasumasa kaku faro kina ḇyedi ma naek srar ro sidang snar fafnoḇek sena. Doḇe, ”Snar fafnoḇek sena, yakso fananjur ma ḇaḇeḇaryas ya ḇesya kwar. Yamarisen syadi yaḇaryas ro moḇ kawasa kam.”

⁹ Ro Betel ḇebor, naek srar ḇesinan kwar ḇaido ḇena baken ḇemnis ḇa sya sisya. Penatua ḇefasnai saswar sya sfasos pyum insama naek srar ansine sakḇaryas roro sfas surat ma telfon. Bill, ḇyeumur taun ri 86, fyas surat faro snonkaku ḇeḇarek ḇinkwan sya. Doḇe, ”Nkokofen kasumasa kaku snar nkona syowi ḇeba fa nkakfas surat.” Nancy, ḇeumur fanam taun ri 90, doḇe, ”Yamam fararur inema koser surat ḇe amplop ya monda ḇa. Inema fararur ḇaḇeḇaryas diri. Snonkaku sya fandun fa sakfawi kakaku ya.” Ethel, ḇeḇeaḇen ro 1921, doḇe, ”Ras ḇe ras yaduf ker. Fyorno ido, samswen fa yasun sansun.” Rarirya ido, imarisen ḇyaryas kuker telfon ma snonkaku ḇeḇeso simarisen sfarkor kuker i. Barbara, ḇeumur taun ri 85, fyasnaiḇadir, ”Snar yadafduf ker, yakso ro ḇaḇeḇaryas ya ḇa. Mboi bisa yawos yoḇ snonkaku sya roro telfon. Kasumasa, Yahwe!” Fanam swaf taun oser monda, naek srar ḇesinan kwar ansine ma ḇesesya ḇeḇarek kayam ro Betel oser, sḇuk oras ri 1.228 ro ḇaḇeḇaryas, ma sfas surat ri 6.265, sawos roro telfon rarwan ri 2.000, ma sirwas publikasi ri 6.315! Kokyar kaku Yahwe nari imarisen faro sasewar naek srar koswar kaku ansine!​—Amsal 27:11.

10. Rariso kofnoḇek naek srar sya fa sismai fainda nabor syadi ro fananjur ya rai?

¹⁰ Kokarauser pyum naek srar koḇesi ro fananjur ya. Kokarauser pyum naek srar koḇesi ido, na nafnoḇek si fa sismai fainda nabor syadi ro fananjur ya. Nyan ya rariso? Oser ya iso korama ro oras ḇemnis insama nawyae snonkaku ḇesesya awer. Fyorno ido, roi ono nafnai fa korama fasaw ḇa. Ḇape, koyaryar ker ido, fandun fa kokara rariso nane na nawyae naek srar koḇesya rai. Fandun kako fa kokara fararwei rosai na kofrur insama kofasnai koma kofandun si. Koswarepen kako, Yahwe ma Yesus suiso ḇeyor ko fa koso fananjur na. (Matius 18:20) Fandun fa kofasnai koḇesyowi kaku su!

11. Rosai ḇefnai fa naek ḇeḇuk farkarkor ro fananjur ya fandun fa siso pyum wos farkin ḇero 1 Korintus 14:40?

¹¹ Kokarauser pyum naek srar koḇesya ido, na koso wos farkin ḇero Refo ine, ”Nakam iḇye neḇefrur kuker syowi ma awnos.” (1 Korintus 14:40) Naek ḇeḇuk farkarkor ro fananjur siso mnis wos farkin ine kuker sun farkarkor sena imnis oras ḇeḇeyap kwar na. Sifrur rarirya ido, skarauser pyum naek ḇeyun farkarkor ḇeuser ya wer ma ḇerama syakam kako. Kokarapan rosai na ḇejadi rofyor fananjur ya imnai fasaw ḇa. Naek srar sino sisya sḇarek ḇinkwan. Ḇesesya wer, fandun fa siso taksi ḇaido simbrane. Ono wer ido sisya sna swa ḇena kakyar oser kuker si ḇa ma sor si fa sibur fasaw ḇe rum.

12. Rosai ḇefnai fandun fa koḇesyowi ma koswar penatua sya? (Mam kotak ”Kokarauser Pyum Snonkaku Ḇefarkin Konsya”.)

¹² Penatua sya sfararur marḇak ro sidang ma ro ḇaḇeḇaryas, inja fandun fa koḇesyowi ma koswar si. (Wasya 1 Tesalonika 5:12, 13.) Kakuḇae, na wakofen kasumasa faro rosai sifrur yoḇ Au na. Wakfasnai na kuker wamarisen wasouser ma wasaramper si, snaro ’siwaren ḇesya kwar faro rur koḇedi ma skarem faro Allah’.​—Ibrani 13:7, 17.

KOKARAUSER PYUM SNONKAKU KOSROW RO ḆAḆEḆARYAS SYA

13. Rosai kofarkor ro nyan Yesus ifrur pyum snonkaku ḇesesya?

¹³ Yesaya ḇyardi ḇekur Yesus i, ”Ajumek ḇesawayom nari pyankar i ba, ma marom ḇepaw nari fyasye i ḇa. Kuker soasuser nari dun nanapes ya.” (Yesaya 42:3) Yesus iswar snonkaku sya inja kyarauser pyum si. Ifawi mnis sneḇaḇir ro snonkaku ḇesanekar ma ḇeryar ḇa ḇemnis ”ajumek ḇesawayom” ma ”marom ḇepaw”. Inja, ifrur pyum ma ḇyekaḇaḇaḇ faro si. Romawa sya kako simarisen sfanam ḇe Yesus i. (Markus 10:14) Kakuḇae, kona samambraḇ fa kofawi ma kofarkor snonkaku sya raris Yesus i ḇa! Ḇape bisa kofasnai kokarauser pyum snonkaku kosrow sya roro moḇ kawos raya, fafisu risai, ma swaf riḇeso kokainus si.

14. Rosai ḇefnai fandun fa kokara moḇsa kawos ḇe snonkaku sya rai?

¹⁴ Rariso kawos ḇe snonkaku sya rai? Snonkaku riyuta ro baboine ’simor ma sisoninyan’ snar ḇefarḇaḇyan, manfarkin polotik, ma manfarkin agama sya siḇarḇor ma sirarmomen kaku. (Matius 9:36) Ine nafnai fa snonkaku sibor sikyar faro ḇesesya ḇa ma siḇor sḇerari. Iso ḇefnai fa wos ma mkarem koḇena fandun fa nfasnai kofrur pyum ma koḇefandun si! Snonkaku ḇebor simarisen srower ankinem koḇaryas na snaro naine ndramuma ro Refo monda ḇa mboi snar kofasnai koḇefandun kaku si ma koḇesyowi si.

15. Ro nyan risai monda kofasnai kokarauser pyum snonkaku ḇero moḇ koḇedi?

¹⁵ Na kofasnai kokarauser pyum snonkaku ḇero moḇ koḇedi roro nyan nabor. Fandun fa koḇuk fakfuken kuker nyan ḇepyum ma syowi. Perintis oso fyarmyan ro moḇ snonkaku ḇero diansya simamyai. Inja, na dakfuken ḇa fakfuken nari ḇefrur fa simai snar sifawi kankarem ḇyena ḇa, raris: ”Wakfawi Allah snonsnon ḇyedi ke?” ḇaido ”Wafawi Karajan Allah ido rosairirya?” Imbape na ikofen, ”Yafarkor kwar ro Refo snar Allah nya snonsnon. Yamarisen yafasnaiḇair snonsnon Ḇyedi, bisa ke?” Kakuḇae, nyan ḇeradine isrow ro moḇ nakam ḇa, snar snonkaku ma budaya sena neḇesisye. Mboi fandun fa kofrur pyum ma koḇesyowi snonkaku ḇero moḇ koḇedi ḇesya kwar. Komambir pyum si kada, bisa kofrur roi ine.

16, 17. Moḇsa na kofasnai frur pyum koḇena rofyor kokinfir (a) fafisu risai kora yoḇ si? (b) swaf riḇeso nari kawos kuker si?

¹⁶ Fafisu risai fandun fa kora yoḇ si? Ro fararur ḇaḇeḇaryas ro rum ḇe rum, snonkaku sya sifawi ko ḇa ḇesyaḇo korama yoḇ si. Inja, ipyum ya kora yoḇ si ro oras ḇesrow faro si. (Matius 7:12) Imnis raris, snonkaku ḇero moḇ Bedi simarisen senef syadi ro papupes minggu ya ke? Rarirya ido, ḇaryas ḇepon ro sampak na, ro moḇ kawasa kam, ḇaido rwama kaḇer ḇe snonkaku ḇemarisen wawos yoḇ si.

¹⁷ Ipyum ya swaf riḇeso kokainus si? Kofawi kwar snar snonkaku ḇebor sya fararur sena nabore. Inja ipyum ya rarama koḇedi kawan awer, iba syadi rofyor insape korama randak ya. Ḇepyum syadi ya iso kawos fasaw monda ḇo koḇekawanwan awer. (1 Korintus 9:20-23) Rofyor snonkaku sya smam mboi koma kofawi mnis fafisu sena ido, nari simarisen syadi sisrow ko rofyor korama ro rarama ḇesena wer. Kofasnai rari-rari ro Allah rur ḇesren Ḇyedi ido, ima nfasnaiḇair kaku koḇe ’min ḇefararur kayam fnoḇek Allah’. Iba syadi wer, Yahwe na ikyar ko fa kofnoḇek snonkaku oso fa dakfawi kakaku ya!

18. Kokarauser pyum ḇesesya ido, barakas risai nari kosmai na?

¹⁸ Rarirya, fandun fa kokarauser pyum kina koḇedi, naek srar ḇero sidang sya, ma snonkaku kosrow ro ḇaḇeḇaryas sya. Kofrur rarirya kada, nari kosmai barakas nabor ro fafisu ine kako ma ro ras ḇarpon iyama. Mazmur 41:1, 2 ikofen ḇo doḇe, ”Aski faro snonkaku ḇekarauser snonkaku ḇeryar ḇa sya. Nari Yahwe myamfaduru i ro fafisu ḇesamswen na. Nari Yahwe myamwarek i insama ikenem pdef. Nari sap i ḇe snonkaku ḇeaski ro supswan ine.”