Fararur Farḇuk ro Swadon Ima Fararur Farḇuk Dirya Kako Ke?

Pusat Pengendalian dan Pencegahan Penyakit ro Amerika Serikat sifuken roma inai babo ḇeumur taun ri 15 isof 19 ḇekur fararur farḇuk ro swadon ine. Rosai sismai ya? Sibor ro si sakfrur fararur farḇuk ro swadon ine kwar. Sharlene Azam ḇefrur syap Oral Sex Is the New Goodnight Kiss ikofen ḇo doḇe, ”Kawos [ḇekur fararur farḇuk ro swadon] ḇe roma inai babo sya ido, na skara ima sasar oḇa, ma soḇe ima fararur farḇuk risyaḇa.”

• Kakara ḇedi ido rarso?

• Rosai ḇekaku ya?

• Rosai ḇefnai fa ine iḇye ḇa kaku?

Kakara ḇedi ido rarso?

Kwarem fakfuken ḇeuser nane:

1. Bin sya bisa sfadores snar sifrur fararur farḇuk ro swadon ine ke?

   1. Imbo

   2. Oroba

2. Fararur farḇuk ro swadon ine nafnai dafduf ke?

   1. Imbo

   2. Oroḇa

3. Fararur farḇuk ro swadon ima fararur farḇuk dirya kako ke?

   1. Imbo

   2. Aroḇa

Rosai ḇekaku ya?

Mam rosai kwarem ya kuker roi ḇekaku ya.

1. Bin sya bisa sfadores snar sifrur fararur farḇuk ro swadon ine ke?

   Kankarem: Oroba. Iso ḇefnai fa snonggaku sya sna kakara ḇesasar bo soḇe fararur farḇuk sifrur ro swadon nama sasar risyaḇa.

2. Fararur farḇuk ro swadon ine nafnai dafduf ke?

   Kankarem: Imbo. Snonggaku ḇefrur fararur farḇuk ḇeradine nari iduf dafduf hepatitis (A ḇaido B), mor ḇesur ro rofmar sena, gonore (kencing nanah), herpes, HIV, ma sifilis.

3. Fararur farḇuk ro swadon ima fararur farḇuk dirya kako ke?

   Kankarem: Imbo. Fararur rosai monda ḇefesepen kuker snonggaku ḇese rofmar sena, imnis ra anenef fasfus, fararur farḇuk ro swadon ma kodon, ma sifnak rofmar snonggaku ḇese insa nafsu sena neke, nama fararur farḇuk nairi.

Rosai ḇefnai fa ine iḇye ḇa kaku?

Kwarapan mnuk ḇeḇeso ro Refo nane:

Refo doḇe, ”Snar Allah marisen ḇyedi isoine . . . mkofrur farḇuk awer.”​—⁠1 Tesalonika 4:​3.

Wos Yunani sefararwei na ḇe ’fararur farḇuk’ kyur ḇe fararur farḇuk nakam sifrur na rofandu snonggaku ḇefarḇuk ḇaim sya, anenef fasfus, fararur farḇuk ro swadon ma kodon, ma sifnak snonggaku ḇese rofmar sena insama nafsu ya deke. Snonggaku ḇefrur roi ine nari ismai roi ḇeḇye ḇa. Ḇesyadi ya iso wis ḇyena kuker Allah namuk.​—⁠1 Petrus 3:⁠12.

Refo doḇe, ”Snonkaku ḇefrur farbuk, irya ifrur sasar faro mankundi baken ḇyedi ḇardi.”​—⁠1 Korintus 6:⁠18.

Roi ine bisa nafrur fa snonggaku iduf ma wis ḇyena kuker Allah naḇye ḇa monda ḇa, imbape fararur farḇuk ro swadon ine kako nafrur fa iknon ḇa. Imnis ḇefas ro syap Talking Sex With Your Kids, ”Snonggaku ḇefrur fararur farḇuk ḇemnis ḇa fyorno ido kyara ḇesesya sun marisen ro i monda, fyafko, ma imai manggundi.” Syap ani fyas kako, ”Snonggaku ḇefrur fararur farḇuk ḇemnis ḇa nakam nari saksmai roi ḇeradirya kako.” Syap ani ikofenbos nyan risai monda sifrur na nama fararur farḇuk nairi.

Refo doḇe, ”Aya, Yahwe, iso Allah mgoḇedi, ḇefarkor mgo faro payamyum mgoḇena.”​—⁠Yesaya 48:​17.

Kwara ido, Manseren Allah sasoser Ḇyena ḇekur fararur farḇuk nun payamyum ḇe Au ke? Ḇaido nadwarek Au fa wafrur roi wamarisen na? Kwarapan roi ine. Ro sampak ḇeba na, rambu lalu lintas naisya, rupa ra, kakop ḇeḇair raruren ro oto na ma kakop ḇeḇair simnai awer. Rambu-rambu annane nadwarek Au ke ḇaido nun ḇaḇye ḇe Au? Rosai na ḇeḇesya ya fafisu Au ma ḇeyun oto ḇesesya simewer smam na?

Allah sasoser Ḇyena kako radirya. Waso na ḇa ido na wasmai roi ḇeḇye ḇa. (Galatia 6:7) Syap Sex Smart ikofen, ”Wafrur roi wakyar kaku na ḇa ma wafrur roi wafawi nama nsasar ido, nari ḇesyowi manggundaw ḇa syadi wer.” Imbape, wasouser Allah sasoser Ḇyena ido, fasnaiḇair nwa kenem ḇepyum. Ḇesyadi bisa nwa sneuser ḇesren.​—⁠1 Petrus 3:⁠16.