Manseren Allah Ima Isya ro Moḇ Nakam Ke?
Kankarem ro Refo
Manseren Allah nya papoik fa myam roi nakam ma ifrur roi imarisen na ro moḇ risai monda. (Amsal 15:3; Ibrani 4:13) Fama, Refo ya ikofenḇair ḇa snar Manseren Allah isya kyain ro moḇ nakam, ḇaido isnim ker. Imbape, Refo ikofenḇair snar Manseren Allah dakna moḇ fa ḇyarek kako.
Moḇ Allah isnai raya: Manseren Allah ima rur dirya. (Yohanes 4:24) Snonggaku koine kopok komam Allah ḇa. (Yohanes 1:18) Fafisu Refo ikofenḇair fawar ḇekur mamam ḇeḇair rarama ro Manseren Allah ḇe supswan ine, fyasnai Manseren Allah ryo moḇ nakam ḇeri ḇa ḇoi ryo moḇ oser monda.—Yesaya 6:1, 2; Fasasna 4:2, 3, 8.
Moḇ Allah ḇyarek ro ya: Manseren Allah ḇyarek ro moḇ kopok komam na ḇa. Moḇ anya kyain ḇinggwan kaku ro supswan moḇ snonggaku koine koḇarek ine. Moḇ Manseren Allah ḇyarek anya iso kofawi na ḇe nanggi. (1 Raja 8:30) Refo isya doḇe ḇekenem ḇe rur sya srama sisrow Yahwe I ro ḇarpon Ḇyedi.a Inja imbe kokara na kada, Manseren Allah dakna moḇ fa ḇyarek ḇae.—Ayub 1:6.
Manseren Allah ryo moḇ nakam oḇa ido, bisa myam ma isaramper aya ke?
Imbo. Manseren Allah iswar kaku ko oser-oser. Ima isya ro moḇ kopok komam ḇa, mboi myam snonggaku ḇesewar kaku fa bebati kuker I. Nari isaramper si. (1 Raja 8:39; 2 Tawarikh 16:9) Rosai monda ḇefasnai Allah Yahwe iswar kawasa Ḇyesi?
Fafisu koḇenadi: Rofyor koḇenadi, Yahwe ryower na ḇeri.—2 Tawarikh 18:31.
Fafisu koḇor famfnom: ”Yahwe fyanam kuker snonggaku ḇesanekar; snonggaku ḇena raryaḇ ḇa kwar fyaspar si.”—Mazmur 34:18.
Fafisu kokmom: Yahwe nari ifrur ko fa kona fawawi ma fyarkor ko ro Wos Ḇyena, Refo ya.—Mazmur 32:8.
Kakara ḇesasar ḇeyoḇe Manseren Allah isya ro moḇ nakam
Kakara ḇesasar: Manseren Allah isya ro roi ḇekenem nakam.
Roi ḇekaku: Manseren Allah ima ḇyarek ro supswan ine ḇa ḇaido ro moḇ ḇese ro farsyos sansoren moḇ komam ine ḇa. (1 Raja 8:27) Imbo, Refo doḇe mak ma Allah fararur Ḇyena eḇesesya ’sfasnai Allah baba Ḇyena’ ḇae. (Mazmur 19:1) Imbape, rupa ra manfasfas ḇefas sonin ḇepyum, na ipok syun fa ḇyarek ro sonin fyas anya ḇa. Rarirya kako, Manseren Allah ipok ḇyarek ro ḇraur ḇramin Ḇyena dori ḇa. Fama, fafisu komam sonin ḇepyum anya, na kokara mura ro snonggaku ḇefas sonin anya ḇae. Manseren Allah fararur Ḇyena fyasnaiḇair ḇe ko ’rari ḇyena komam ro komgasna ḇa’, raris papoik, fawawinanem, ma saswar.—Roma 1:20.
Kakara ḇesasar: Ipyum ya Manseren Allah isya ro moḇ nakam insama fyawi roi ḇejadi nakam ma bisa ifrur roi ḇepyum ḇa nakam fa napyum.
Roi ḇekaku: Rur ḇesren ima papoik ḇaido samambraḇ ro Allah. Rur ḇesren Ḇyenane naiso eḇedari ifawi roi nakam, ifrur roi nakam, ro moḇ nakam, ma fafisu nakam ḇo rya mura-muma ḇa.—Mazmur 139:7.
Kakara ḇesasar: Mazmur 139:8 fyasnai kaku Manseren Allah ima isya ro moḇ nakam. Mnuk ani doḇe, ”Yek muryas ḇe farsyos iyaswa ido, Ausya rwo diwa, ma yenef ro Kubir ido, Ausya rwo diwa kako.”
Roi ḇekaku: Mnuk ine dawosḇair moḇ Manseren Allah ḇyarek ro ya ḇa. Mboi, mnuk ine dawos kuker wos peper fa fyasnaiḇair snar Manseren Allah imbe isaramper ko ido, roi oso ḇaḇeri na nadwarek I fa isaramper ko.
a Yahwe iso Allah snonsnon Ḇyedi ro Refo ya.