Refo iḇesebur kaku kuker syap agama ḇesena. Syap ḇesena nḇuk fainda ḇa ḇe kankenem snonkaku ḇebor ro fafisu ḇekwan kaku. Osower ido, syap oso ḇaḇeri ḇemnis Refoya, sisewar fa sfarkor ker na ma sawos ninyan na.

Imnis raris, manfawinanem ḇeḇeso sikyar ḇa kaker snar roi ḇero Refona ro kirine namnis kuker fasfas ḇekaku ya. Profesor agama oso ikofen, ”Kofawiḇa na kofararwei mnis fasfas ḇekakuya ke oroḇa. Ḇekakuya, terjemahan kosmana nafo kuker sasarya. Ma ḇar ḇebaya sifrurna taun syaran utin naiwara rofyor fasfas ḇekakuya sifas na ma roi ḇebor ḇeḇesebur nasya.”

Ḇese sya sikyar ḇa kaker Refoya namnis kuker fasfas ḇekakuya snaro agama ḇepon sena. Imnis raris snon oso benir ḇe Faizal. Kina ḇyedi ḇeḇe Kristenḇa sya sfarkor i snar Refo iso syap ḇesren ḇape nefararwei kwar. Ikofen, ”Yaḇaḇir yakyarḇa rofyor snonkaku ono sisya imbe sawos ḇe aya kuker Refoya, snaro sna Refo ḇekakuya ḇa. Sefararweina kwar!”

Na nun samswen ke, rofyor Refo ine sifadwer na ke roḇa? Kwara kada: Na wakyar ke faro asas ḇero Refo kuker fafisu naiwama rofyor wafawi ḇa snar asas ani isya ro fasfas ḇekakuya? (Roma 15:4) Na wamarisen ke waso wos ḇefarkin ro Refo rofyor wafrur snemuk ḇefandun kaku kuker fararur, kina, ḇaido ḇaḇesamsyom, rofyor roi ḇero Refo sifadwer na kwar?

Imḇape syap-syap ḇekaku Refo napromes kwar, na komam kaku fasfas kaḇer ḇyena, ma fasfas Refo syaran ma syaran na kako. Roi sḇuki fas Refoya nari naḇyeḇa, snonkaku ḇebor sidwarekna, ma sḇensewar fa sifadwer roi ḇero dona, ḇape rariso fasfas nane nasya kaker? Snaro Refoya isya pdef, na wakyar kaku snar roi ḇero Refo namnis kuker fasfas ḇekaku ya ke roḇa? Mkorama komam rariso syap ine ismai roi ḇedwarek nabor.

SAMSWEN YA: Papirus ma perkamen iso roiebor manfasfas ma ḇefas kaḇer Refoya sḇuki fas.a (2 Timotius 4:13) Rariso roi sḇuki fas ani nḇuk samswen ḇe Refoya rai?

Papirus napyan fa namsawek, sananai ḇyedi nefadwer, ma na napokem. Richard Parkinson ma Stephen Quirke, manfawinanem Masir ḇekwar, sukofen, ”Papirus ani nari napokem fa nḇe rares ma fafen. Rofyor sikram na, syap ḇeniw ani na ḇyemankukef ḇaido nasnarem snar moḇ ḇepnunek ma na anir ḇaido as sya sanna rofyor siḇayekna.” Rofyor sisrowna, papirus ḇeḇeso napokem fasaw snaro sananai ya isyo kerna ḇaido ndoro moḇ ḇepnunek.

Perkamen ipokem fasaw ḇa ḇuro papirusna, ḇape na naḇyeḇa rofyor sifaduruna ḇa ḇaido ndoro moḇ ḇesam ḇaido ḇepnunek kaku, moḇ ḇedok, ḇaido sananai ya isyo kerna.b Perkamen ya kako na naḇyeḇa snar anir sya sanna. Inja, syap Everyday Writing in the Graeco-Roman East fyasnaḇair snar ”fasfas ḇekwar nabor ḇa fa nasya pdef”. Refoya napromes kwar ido, roi ḇero donna kako na napromes.

RARISO REFOYA ISYA PDEF: Sasoser Taurat iwan fa raja oser-oser ”fyas ro syap oso faro mankundi fasfas kaḇer ro sasoser ine”, iso syap ririm ḇerandak ro Refoya. (Ulangan 17:18) Osower ido, manḇekir ro fasfas kaḇer ine sifrur fasfas naḇor kaku ro abad randak Masehi, ma nasya nabor ro sinagoga ḇero Israel isof ro moḇ ḇebinkwan ro Makedonia! (Lukas 4:16, 17; Farfyar Ro Manwawansya 17:11) Rariso fasfas ḇekwar ḇeḇeso anna nasya kaker isof ro kirine?

Philip W. Comfort, manfawinanem Ḇaḇeasas Babo, ikofen, ”Snonkaku Yahudi sya srir Syap Ḇesren ḇeniw ro fyom ḇaido rosaser insama napyum pdef.” Snonkaku Kristen sifrur pdef nyan ani. Inja, fasfas Refo ḇeḇeso ro fafisu ḇerandak sisrow na kwar ro rosaser, ro sim ḇepampan ma aḇyaḇ kako, ma ro moḇ ḇesyor kaku.

BON YA: Syaran ma syaran ro ḇar fasfas Refo nasya, ḇeḇesoya ḇeumur syadi ro 2.000 taun, nasya pdef isof ro kirine. Fasfas ḇekwar oso ḇaḇeri ḇena fasfas ḇebor ḇerama ro fafisu ḇepon iwara.

SAMSWEN YA: Ḇebukor ro politik ma agama sya fararur sena neḇesebur kuker anun ḇero Refo. Sḇuk ker papoik sena fa sidwarek snonkaku sya fa sna, sifrur, ḇaido sefararwei Refo ḇe wos ḇesena. Mam contoh risuru ine:

• Taun 167 SM: Raja Antiokhus Epifanes ro dinasti Seleukus, ḇyedif snonkaku Yahudi sya fa siso agama Yunani, iwan insama Syap-Syap Ibrani nane sifrur nafa napromes. Sejarawan ḇenir ḇe Heinrich Graetz fyas snar ḇebarara ro Antiokhus ”sipansawek ma srap Sasoser ḇeniw nakam ro moḇ sairirya sismaina ma smun mansei sisrow ḇesewar wos ḇeyun samambraḇ ma sneprei ro wawasya Refo”.

• Abad Faduri: Manfarkin agama Katolik ḇeḇeso sya simsor snar snonkaku ḇena fawawi ḇekaki ḇa sḇaryas rosai Refo fyakorna, ḇape fakarkor ḇero Katolik ḇa. Skara kako snonkaku ḇena syap-syap Refo, siso snonkaku ḇeyankarkar, sine siḇesebur kuker ḇena syap Mazmur ro wos Latin. Oso ro dewan gereja iwan snon ḇeḇeso ”sikyar sya fa sisewar kuker myaren ma pyum kaku snonkaku ḇeyankarkar sya . . . srama sisun ḇe rum nakam ma sim ḇero ḇaḇ ya moḇ siwarki kwar na. . . . Sisrow Refo ro rum anya ido nari simkok rum ani”.

Rofyor mbroḇ sya sifrur Refoya ipromes ido, roi ḇero donna nari napromes.

RARISO REFOYA ISYA PDEF: Raja Antiokhus ifrur ker aw ḇyena ro Israel, mḇoi snonkaku Yahudi sya sifrur kwar raryur sena ro sup ḇese na. Kaku ya manfawinanem sya sikofen, ro abad randak Masehi syadi ro 60 persen snonkaku Yahudi sya siḇarek ro bandi sup Israel. Ro sinagoga, snonkaku Yahudi sikram fasfas kaḇer Refoya na kpu sesi ma snonkaku Kristen sya kako nari siwasya na.​—Farfyar Ro Manwawansya 15:21.

Ro Abad Faduri, ḇeswar kaku Refo sya kuker bri simarisen sismai ḇaḇewayam, ma sifrur pdef fasfas kaḇer Refoya ma sefararweina ḇe wos ḇesena. Syap-syap Refo imbude nasya kwar ro wos ri 33 ro abad 15 ya faduri rofyor mesin cetak ḇena huruf ḇeḇefadwer sisrow na ḇaim. Ramnai, Refoya sefararwei wosna ma sifrurna samberen syadi wer.

BON YA: Raja ḇeḇepoik ma manfarkin agama ḇeyankarkar sya sidwarek Refoya, ḇape ro sarisa kankenem snonkaku sya Refo iso syap oso sefararweina ro wos ḇebor ma sirwas nabor kaku. Refoya nbuk fainda faro sasoser ro sup ḇeḇeso, wos ma kankenem snonkaku ri yuta ma yuta.

SAMSWEN YA: Samswen ro bandi raris roi ḇefrur fasfas ya naḇyeḇa ma roi ḇedwarekna pok fa nafrur Refoya ipromes ḇa. Ḇape, manḇefas kaḇer ma penerjemah ḇeḇeso sisewar kaku fa sefararwe roi ḇero Refoya. Fafisu ono, simewer farkarkor sena namnis kuker Refoya ḇape sisewar fa sifrur Refoya isonem farkarkor sena. Komam contoh ḇeḇeso:

• Moḇ fa senadi: Ro fandu abad ḇeḇefyak ma suru SM, manfasfas Pentateukh Samaria sisunwer wos ro Keluaran 20:17 isoine ”ro Bon Gerizim. Ma rodia fandun fa waḇawes rokef farsarser oso”. Snonkaku Samaria simarisen insama mnuk ani ḇyesonem ḇaḇawes bait ro Bon Gerizim.

• Farkarkor Tritunggal: Nasyadi ḇa ro 300 taun rofyor Refoya sfasna ramnai, manfasfas ḇekyar Tritunggal oso isunwer wos ro 1 Yohanes 5:7 isoine ”ro boiyaswa: Kmaya, Wosya ma Rur Ḇesrenya; sko kam skoḇeoser”. Wos nane nasya ḇa ro fasfas ḇekaku ya. Bruce Metzger, manfawinanem Refo oso ikofen, ”Ro randak abad ḇeḇewonem ma ḇeḇepon wer, wos nane sisrow kerna ro fasfas Latin Ḇekwar ma [Latin] Vulgata.”

• Allah Snonsnon Ḇyedi: Penerjemah Refo ḇebor ssun fawar sinan Yahudi ma sun snemuk fa sipyos Allah snonsnon ḇyedi ro Refoya. Sfadwer Allah snonsnon ḇyedi kuker nasan ḇemnis raris ”Allah” ḇaido ”Tuan”, apap sḇuk na faro Manḇedaw monda ḇa ḇape faro snonkaku, amfyanir, ma faro Ibiris ya kako.​—Yohanes 10:34, 35; 1 Korintus 8:5, 6; 2 Korintus 4:4.a

RARISO REFOYA ISYA PDEF: Randakya, manfasfas Refo ono sisya sesasor si ḇa ma sinapes ḇa rariryano, ḇebor sya kako sḇekir ma sfas kuker awnos. Rofandu abad ḇeḇe wonem ma samfur snonkaku Masoret sifas kaḇer Syap-Syap Ibrani sifawina ḇe fasfas Masoret. Ono ḇekofen, sikor barbor wos ma hurufna insama sifawi mnis kaku sifrur sasar noḇa ro rosai sfasna. Sikako sḇuk fasfas ro andir ram ya fa sikofenḇair fararwe rosai sifrur kwarna ro fasfas sena. Snonkaku Masoret ansine simewer sefararwe fasfas ḇero Refoya. Profesor Moshe Goshen-Gottstein ikofen, ”Faro snonkaku Masoret ansine, sefararwe ḇeri fasfas ya ima roi ḇeḇarḇor kaku.”

Ḇeḇesuru ya, fasfas ḇebor naisya kaker ro kirine bisa fa nafnoḇek manfawinanem Refo sya fa sisrow sasarya. Imnis raris, ro taun utin ma utin manfarkin agama sya skara snar Refo terjemahan wos Latin sena namnis kuker fasfas ḇekaku ya. Ḇape, ro 1 Yohanes 5:7, sisun wos ḇesasar imnis ḇeḇeyap ro randak artikel ine. Sasar ani dawyaye kako King James Version wos Inggris! Ḇape rofyor sisrow fasfas ḇesena, rosai ḇefasnabos kaku ya? Bruce Metzger fyas, ”Ḇar [ro 1 Yohanes 5:7] naisya ḇa ro fasfas ḇekwar nakam (Siria, Koptik, Armenia, Etiopia, Arab, Slavia), naisya ro wos Latin monda.” Inja, edisi revisi King James Version ma Refo ḇesena sipyos bur wos ḇesasar anna.

Fasfas ḇekwar kaku fyasnaḇair snar roi ḇero Refoya namnis pyum kaker ke? Rofyor sisrow Syap Ḇeniw Soren Ḇemar ro 1947, nafnoḇek manfawinanem sya fa sḇuki mam fasfas Masoret Ibrani kuker syap ḇeniw Refo ḇeḇefas ro taun syaran oser ḇepon iwara. Oser ro tim Syap Ḇeniw Soren Ḇemar ikofenḇair snar syap ḇeniw oser monda ”ḇyefasnabos kaku snar fasfas kaḇer Refo ro manfasfas Yahudi ro swaf taun syaran oser ima nasrow ma namnis kaku”.

The Chester Beatty Library ro Dublin, Irlandia, fyasna papirus Syap-Syap Yunani Kristen ḇebor. Ma kako fasfas ro abad ḇeḇesuru M ḇeḇefrur ro taun ri 100 rofyor ḇeḇefas Refoya imnai. The Anchor Bible Dictionary ikofen, ”Ḇyuk informasi ḇebabo kuker ḇaḇeaunos fasfas monda ḇa, ḇape papirus ine kako fyasnabos snar ḇaḇefas kaḇer fasfas Refoya namnis kaku.”

BON YA: Fasfas ḇekwarna nfadwer roi ḇero Refoyaḇa, ḇape fasfas ḇebor anna nbuk kakakyar snar roi ḇero donna nkaku. Sir Frederic Kenyon fyas kuker Syap-Syap Yunani Kristen, ”Syap ḇekwar oso ḇa ro randakya sna bukti nabor kaku nsonem fasfas ḇyena, ma manfawinanem ḇenapes nari sifamyun ḇa snar fasfas anna nasya nabor kwar ḇe ko.” Faro Syap-Syap Ibrani, manfawinanem oso ḇenir ḇe William Henry Green ikofen, ”Kokofen kada braur osoḇaḇeri ro fafisu naiwara sifrurna kuker kakaku nasya kaker ma namnis kaku.”

Refoya isya pdef. Bon ya, na bisa fa wasma ma wawasya na ro kirine. Ma rofyor kwinfir terjemahan Refo ḇepyum kaku, wakyar snar ausya wawasya fasfas ḇemnis kuker fasfas ḇekakuya.a Fasfas Refo sfasna ro roi ḇepyan fa namsawek, sidwarekna, ma sefararwe roi ḇero dona kuker farfyar ḇefrur komanen, ḇape rosai ḇefnai fa Refo isya pdef? Rosai ḇefrur fa syap ine ipyum kaku?

Ḇefarkor Refo sya sna kakara ḇemnis kuker rosai manwawan Paulus fyasna, ”Fasfas ḇeḇor ḇeramuma ro Allah.” (2 Timotius 3:16) Sikyar Refoya isya pdef snaro iso Wos Allah Ḇyena ma snar Allah myamfaduru na insama syap ani isya pdef isof ro kirine. Faizal, iso ḇeḇeyap ḇepon ya, ḇarpur ya dun snemuk fa myam ro mankundi wos anna nkaku kuker fyarkor Refo. Ikandor kaku faro rosai fyarkor na. Ifawi fasaw snar farkarkor ḇero gereja na neknam ro Refoya ḇa. Osower ido, Allah asas ḇyena ro Refo kuker fafisu iyama ro supswan ine, nasun ro sne ḇyedi.

Ikofen, ”Kirine yakyar kaku snar Refo yasmana ima roi ḇepyum kaku ḇerama ro Allah. Snar Allah ifrur supswan ma farsyos ḇeba ine, kakuya nya samambraḇ fa ḇyuk syap oso ḇeko ma myamfaduru syap ani insama isya pdef. Kofamyun na ido, kyurfasna kokyar ḇa faro Allah Ḇepoik Syadi. Mansei siko inja kofrur radirya?”​—Yesaya 40:8.