Rosai Refo Ikofen ḇekur Snon ma Bin Ḇeḇarek Kayam Imboi Suḇe Imbeswa Ḇaim?

Kankarem ro Refo

Refo ya doḇe Manseren Allah imarisen insama snonggaku sya ’sifrur fararur farḇuk famfnom awer’. (1 Tesalonika 4:3) Rosaiso fararur farḇuk famfnom ya? Ro Refo ine kyur kako ḇe fararur farḇuk sifrur kuker snon ḇaido bin sna ḇe siswasi ḇa ma rofandu snon kuker snon ḇaido bin kuker bin. Ine kako fararur farḇuk rofandu snon ma bin ḇeḇe imbeswa ḇaime.

• Rosai ḇefnai fa Allah imarisen aneffasfus inema rofandu snonggaku ḇefarbuk kwar sya monda?

• Rariso rofyor snon ma bin suḇe imbeswa ḇaim bo suḇarek kayam insa sufawi ḇepon suma susrow ke roḇa?

• Rariso insama imbeswa susmai payamyum ro farḇakḇuk suḇena?

Rosai ḇefnai fa Allah imarisen aneffasfus inema rofandu snonggaku ḇefarbuk kwar sya monda?

• Farḇakḇuk ine ryama ro Allah. Manseren Allah irandak farḇakḇuk ya rofyor ḇye snon ma bin ḇerandak ansu fa suḇeoser. (Kejadian 2:22-24) Inja, Allah imarisen ḇa rofyor snon ma bin oso suḇarek kayam boi sufakawin ḇaime.

• Manseren Allah fyawi roi ḇepyum syadi faro snonggaku. Manseren Allah imarisen insama farḇakḇuk nakain isof fyoro. Sai ḇefnai ya? Kukro Imarisen fa kyadaunwarek ḇero kina ansyakam. Farḇakḇuk ima imnis ra kofasos meja oso. Imbe kosmai meja ḇepyum ido, fandun fa koso akurfasnai ro pabrik ḇefrur ya. Rarirya kako, farḇakḇuk na nun payamyum fyor koso akurfasnai ro Allah. Anun ro Allah nḇefainda faro ko. Koso pyum na ido, na kosmai fainda ḇyena.​—Yesaya 48:17, 18.

  

• Fararur farḇuk rofandu snonggaku ḇeḇe imbeswa ḇaim nun roi ḇeḇye ḇa. Imnis raris, ono sna romawa boi sfakawin ḇaime, siduf dafduf ḇefarpampam snar fararur farḇuk ya, ḇaido kenem sena nasmai aksi ḇa.

• Aneffasfus ḇaido seks ima samambraḇ Allah byuk ḇe imbeswa oso insama suna romawa. Kokofen kada, suyun kankenem ḇebabo oso. Kankenem ima ḇyemaeja kaku ḇe Manseren Allah. Inja, aneffasfus ine fandun fa imnis Allah marisen Ḇyena. Imarisen insama koḇesyowi samambraḇ anine isoine kofakawin ḇepon insape kofrur aneffasfus ya.​—Ibrani 13:4.

Rariso rofyor snon ma bin suḇe imbeswa ḇaim bo suḇarek kayam insa sufawi ḇepon suma susrow ke roḇa?

Snon ma bin ono sisya suḇarek kayam mboi suḇe imbeswa ḇaim insa sufawi suma susrow ke roḇa. Sumam susrow yae ḇa ido, na napyan fa suḇesisye wer. Ḇape, inema nyan fa kosmai payamyum ro farḇaḇuk ya ḇa. Imbeswa oso na susmai payamyum ro farḇakḇuk ya rofyor susoasuser pdef ma sufararur kayam fa sumam samswen susmai na.a Snon ma bin suḇe imbeswa kwar ido nari suna wos oser fa susoasuser pdef.​—Matius 19:6.

Rariso insama imbeswa susmai payamyum ro farḇakḇuk suḇena?

Farḇakḇuk ḇemnis kaku ono ḇa. Ḇape, imbeswa oso suso wos anun ro Refo ya ido, farḇakḇuk suḇena nari nun payamyum. Imnis raris, mam wos anun riḇeso nane:

• Mam ḇepon fandun ro swambri.​—1 Korintus 7:3-5; Filipi 2:3, 4.

• Fasnai pdef saswar ma syowi ya.​—Efesus 5:25, 33.

• Wakofen awer roi ḇeyun sneprei ḇa.​—Amsal 12:18.

• Ḇekaḇaḇaḇ pdef ma buk ampun.​—Kolose 3:13, 14.