Rariso Insama Ḇebati Kuker Allah?

1. Na Allah Ryower Nadi nakame ke?

Allah dor faro snonkakusya kam fa senadi ḇe I. (Mazmur 65:2) Ḇape, ryower nadi nakam ḇa. Imnis radine, rofyor snon oso ifrurmnis swa ḇyeja ḇa nari nadi ḇyeja Allah ryower na ḇa. (1 Petrus 3:7) Osower, rofyor iwara Allah ryower nadi snonkaku Israel sya ḇa snar sifrur roi ḇeḇarḇor. Ḇape, rofyor kombror ro sasar ḇeba kofrur na, nari Allah ryower nadi koḇena. Inja, nadi yama roi ḇepyum kaku Allah ḇyuk ḇe ko.​—Wasya Yesaya 1:15; 55:7.

Mam vidio Allah Ryower Nadi Nakam Ke?

2. Nadi ḇerariso Allah ryower kaku ya?

Nadi ima ḇar oser ḇefandun kaku ro farsamsyom koḇena. Inja, koḇenadi monda faro Yahwe, snaro iso ḇefrur ko. (Matius 4:10; 6:9) Osower ido, snaro Yesus ḇyefaspar sasar koḇena kwar, inja fandun kaku fa konadi kuker snonsnon Ḇyeja. (Yohanes 14:6) Yahwe imewer fa nadi koḇena kofas ma kowasya na, ḇape Imarisen koḇenadi kuker sne ḇesiper.​—Wasya Matius 6:7; Filipi 4:6, 7.

Rofyor koḇenadi ro sne koḇena Allah ryower na kako. (1 Samuel 1:12, 13) Allah imarisen koḇenadi ḇe I ro fafisu sarirya kam, imnis raris ro arwo ḇaido roḇ, rofyor konan ḇaim, ma rofyor kosmai roi ḇesamswen.​—Wasya 1 Petrus 5:7; Matius 15:36.

3. Rosai ḇefnai fa snonkaku Kristen sya sfanjur kayam?

Koḇarek rofandu snonkaku ḇena kakyarḇa ḇe Allah, ma sikyar faro asas Ḇyena ḇa fa ifrur kankenem ḇepyum ro supswan ine, inja koḇebati kuker Allah ima roi ḇesamswen kaku. (2 Timotius 3:1, 4; 2 Petrus 3:3, 13) Inja, kofandun kaku saramper ro naek ma srar koḇesya snar sikako sifandun ko.​—Wasya Ibrani 10:24, 25.

Rofyor koḇebati kuker snonkaku ḇeswar Allah nari ko kako kofanam kaku ḇe Allah. Ro fananjur Saksi-Saksi Yahwe sena na koman snonkaku ḇena kakyar sya ma na nun samamḇrab ḇe ko.​—Wasya Roma 1:11, 12.

4. Rariso insama koḇebati kuker Allah?

Rofyor kowasen rosai kofarkor kwarna ro Refo, na koḇebati kuker Allah. Kokara kuker sne ḇesiper fararur ḇyena, farkankin ḇyena, ma asas ḇyena faro ko. Rofyor koḇenadi ma kowasen rosai ifrur na nari ko ḇe syowi kaku saswar ma fawawinamem Ḇyena.​—Wasya Yosua 1:8; Mazmur 1:1-3.

Kokyar faro Allah ido na kofanam kaku ḇe I ma kokyar faro I. Imnis raris rokaker kofaduru pyum na ido nasur pyum, rarirya kako kuker kakyar koḇena. Insama kakyar koḇena sambraḇ pdef, fandun kaku fa kowasen napnapes kofarkor kwar na.​—Wasya Matius 4:4; Ibrani 11:1, 6.

5. Rosai fainda kosmai snar koḇebati kuker Allah

Yahwe myamfaduru snonkaku ḇeswar kaku I sya. Na ḇyekadaun si ro roi ḇedwarek ma ḇefrur samswen kakyar sena ma saneraro faro kankenem fioro. (Mazmur 91:1, 2, 7-10) Yahwe fyarkorko ma ḇyuk swarapepen ḇe ko fa koḇinkwanbur roi ḇeḇyeḇa ro kankenem koḇena, ma ḇyuk nyan insama kosmai aski ro kankenem koḇena.​—Wasya Mazmur 73:27, 28; Yakobus 4:4, 8.