FARKARKOR 28
Fasnai Syowi Kasumasa faro Rosai Yahwe ma Yesus Sufrur Kwar ḇe Au Na
Bati Bedi byuk roi ḇepyum ḇe Au ido, moḇsa na ḇaḇir rai? Na wamarisen ḇae, ma wamarisen fa wakfasnai kasumasa ḇe i kukro byuk na ḇe Au kwar. Yahwe ma Yesus subuk roi ḇepyum kaku ḇe ko, isoine farsarser ḇaḇyak faro fasaspar ya. Moḇsa kofasnai syowi kasumasa koḇena faro roi subuk kwar nane rai?
1. Nyan oser minsai kobukifasnai syowi kasumasa faro Yahwe ma Yesus roi sufrur kwar ḇe ko na?
Refo ya doḇe ’snonggaku ḇekyar faro [Yesus] i sya’ nari sikenem fyoro. (Yohanes 3:16) Kofasnai kakyar koḇena ro rosai kokinfir ma rosai kofrur ro kenem koḇena. (Yakobus 2:17) Kofasnai kakyar ro rosai kofrur na ma rosai kokofen na kada, nari wis koḇena kuker Yesus ma Kmari, Yahwe I, nsambraḇ syadi.—Kowasya Yohanes 14:21.
2. Munara saiso na koso insama kofasnai syowi kasumasa faro rosai Yahwe ma Yesus sufrur kwar na?
Ro roḇ fafisu Manseren Yesus imar ḇaim, ikofen ḇe manfamyan ḇyesi nyan oso wer fa sfasnai syowi kasumasa kukro imarwarek si kwar. Iwan manfamyan ḇyesi insama sfanjur kayam fa sifrur munara sor ḇe ”Anan ro Roḇ kuker Tuan”, kofawi na kako ḇe munara Swarapepen Kristus marmar ḇyedi. (1 Korintus 11:20) Yesus imarisen fa manfamyan ḇyesi ma snonggaku Kristen ḇekaku sya siswarepen roi ifrur fa imarwarek ko kwar. Inja ikofen yoḇ si radine, ”Mkofrur radine fa mkoswarepen aya.” (Lukas 22:19) Wakso ro munara Swarapepen ine kada, ima wafasnai kasumasa kaku faro saswar ḇeba Yahwe ma Yesus sufasnai ḇe ko na.
SWEWAR KAKU WER
Nari kawos rosai monda wafrur fa wakfasnai syowi kasumasa faro saswar ḇeba Yahwe ma Yesus sufasnai kwar na. Nari kawos kako roi ḇefnai fa munara Swarapepen Yesus marmar ḇyedi ima munara ḇefandun kaku.
3. Kofasnai syowi ro rosai kofrur na
Kwarapan Ausya wabe wamsar ro soren, mura snonggaku oso ryama isaramper Au fa wamsar ḇa. Na fasaw monda befnder roi ifrur kwar ḇe Au nane ke? Oroḇa ido, na swewar fa wakofen kasumasa faro i ke?
Yahwe iswar ko, inja byuk swaf fa kosmai kankenem fyoro ya. Kowasya 1 Yohanes 4:8-10, raimnai kawos fakfuken suine:
Rosai ḇefnai fa farsarser ḇaḇyak Yesus byuk nanema roi ḇepyum kaku?
Wafawi rosai Yahwe ma Yesus sufrur kwar ḇe Au na, inja moḇsa ḇaḇir rai?
Rariso kofasnai syowi faro Yahwe ma Yesus roi sufrur kwar ḇe ko na? Kowasya 2 Korintus 5:15 ma 1 Yohanes 4:11; 5:3, raimnai kawos fakfuken ine:
Raris mnuk ine, rosai na kofrur kaku fa kofasnai syowi kasumasa?
4. Koso Yesus nyan ḇyena
Nyan ḇese wer kofasnai syowi kasumasa iso kakfrur raris moḇ Yesus ifrur raya. Kowasya 1 Petrus 2:21, raimnai kawos fakfuken ine:
Moḇsa na wakfrur raris moḇ Yesus ifrur raya?
Yesus imarisen faro Allah Wos Ḇyena, byaryas abar ḇepyum, ma isaramper snonggaku ḇesesya
5. Koso ro munara Swarapepen Yesus marmar ḇyedi
Moḇsa kofrur munara Swarapepen Yesus marmar ḇyedi rai? Kowasya Lukas 22:14, 19, 20. Raimnai kawos fakfuken suine:
Rariso Yesus ma manfamyan ḇyesi sifrur randak munara ine rai?
Mamami ma anggur suḇeḇair ḇe rosai?—Mam mnuk ḇe 19 ma 20.
Yesus imarisen manfamyan ḇyesi sifrur munara Swarapepen ro taun oser rarwan oser, ma sifrur na ro tanggal imar anya. Saksi-Saksi Yahwe siso Yesus parenta ḇyenane. Rarirya, sfanjur kayam fa sifrur munara Swarapepen Yesus marmar ḇyedine ro taun ḇe taun. Imbe wafawi syadi munara ḇefandun kaku ine wer ido, komam VIDIO. Raimnai kawos fakfuken ine.
Rosai ḇefnai fa munara Swarapepen inema roi ḇefandun kaku fa koso na?
Mamami ma anggur suma kakop monda nairya. Mamami ḇyeḇair ḇe Yesus baken ḇemnis kaku ḇyeja, byuk na faro fandun koḇena. Anggur ḇyeḇair ḇe rik ḇyena
SIA SOḆE: ”Kokyar monda faro Manseren Yesus ido nari kosmai slamat.”
Rariso buk Yakobus 2:17 fa fasnaiḇair yoḇ si snar kokyar monda nama nasrow ḇaime?
FARKARKOR ḆYENA
Kofasnai koḇesyowi rosai Yesus ifrur kwar ḇe ko na kuker kokyar faro i ma koso ro munara Swarapepen marmar ḇyedi.
Waswarepen Kaḇer
Kokyar faro Yesus ido, rosai na kofrur kaku ya?
Rariso besyowi kaku Yahwe ma Yesus roi sufrur kwar ḇe Au na?
Rosai ḇefnai fa koso ro munara Swarapepen Yesus marmar ḇyedi ima roi ḇefandun kaku?
SWEWAR NABOR WER
Yesus Kristus imarwarek ko kwar, inja rosai kobe kakfrur ya?
Farkor ine fa wafawi rosai sor ḇe kakyar ya, ma moḇsa kofasnai kakyar ya rai.
”Fasnabair Kakyar Bedi faro Yahwe Asas Byena” (Syap Baryas paik Oktober 2016)
Ḇeyakso ro munara Swarapepen syakam na san mamami ma sinem anggur ke?