FARKARKOR 38
Kofasnai Syowi Kasumasa faro Kenem Ine
Kofrur roi ḇepyum nabore ma kosmai marasrisen kukro koisya kokenem. Ro fafisu kosmai samswen kako, bisa kosmai kaker roi ḇepyum ro kenem ine. Inja, moḇsa na kofasnai syowi kasumasa faro kenem ine rai? Ma rosai ḇefnai kaku fa kofasnai syowi kasumasa faro kenem ine?
1. Rosai ḇefnai kaku fa kofasnai syowi kasumasa faro kenem ine?
Kofasnai syowi kasumasa kaku faro kenem ine kukro ine iso roi ḇepyum kaku Kma ḇesawarwar koḇedi, Yahwe I, byuk ḇe ko na. Refo ya doḇe Yahwe iso ḇebuk kankenem ine. Ine ḇyeḇair Yahwe iso ḇefrur roi nakam fa nakenem. (Mazmur 36:9) ”Iso ḇeḇuk kenem ma knaref ma roi ḇeḇor kam” faro snonggaku koine. (Farfyar 17:25, 28) Yahwe byuk roi kofandun ro kenem koḇena insama kokenem pdef. Irya monda ḇa, byuk roi ḇepyum nabor wer fa kosmai marasrisen ro kankenem koḇena.—Kowasya Farfyar 14:17.
2. Moḇsa kofasnai syowi kasumasa ḇe Yahwe I snar byuk kankenem ḇe ko?
Fafisu Ausya rwo snami sneri kaker, Yahwe myamwarek Au kwar. Yahwe manfamyan Ḇyedi, Daud i, ḇyenadi bo doḇe, ”Yaḇe war kaker yo mgamsi myam aya.” (Mazmur 139:16) Yahwe myam kankenem Bedi ḇe roi ḇefarfnak ḇa. (Kowasya Matius 10:29-31.) Inja, rofyor Yahwe myam oso imbe myun snonggaku ḇese ḇaido myun manggundi, na ḇyesneso fafaya ḇa.a (Keluaran 20:13) Yahwe nari dakḇesneso kako fafisu kosasor ko ḇa bo kofrur samswen kenem koḇena ḇaido snonggaku ḇese. Komam pyum kenem koḇena ma koḇesyowi snonggaku ḇese kankenem sena kada, ima kofasnai koḇesyowi kaku kankenem Yahwe byuk ine.
SWEWAR KAKU WER
Nari kawos nyan fa wafasnai syowi kasumasa faro kankenem Yahwe byuk kwar ḇe Au na.
3. Mam pyum manggundaw insama wadafduf ḇa
Kokofen ḇe Yahwe I fa kofrur marisen Ḇyena ḇesya kwar. Inja, na kobuk kankenem koḇena ḇesiper fa kofrur marisen Ḇyena. Ine imnis ra, kobuk baken koḇena ḇe farsarser faro Manseren Allah. Kowasya Roma 12:1, 2, raimnai kawos fakfuken suine:
Rosai ḇefnai kaku fa mam pyum manggundaw insama waduf ker ḇa?
Rosai na wafrur kaku insama wadafduf ḇa?
4. Wasasor Au insama wafrur awer roi na ḇefnai dafduf ḇaido marmar faro snonggaku ḇesesya
Refo ya danun kaku ḇe ko fa koḇinggwanbur rosai nari ḇeyun roi ḇemun ḇe ko. Komam VIDIO fa kokfawi rosai na kofrur kaku insama koḇye.
Kowasya Amsal 22:3, raimnai kawos rosai na kofrur insama koḇye ro . . .
rum koḇena.
moḇ kofararur ya.
fafisu kofnak olahraga.
fafisu kun oto ḇaido koso oto na.
5. Besyowi kankenem ro kapira ḇero snekapar
Daud doḇe Yahwe ima myam kaku rosai ḇejadi fafisu kapira oso isya kaker ro snari snekapar ḇyedi. Kowasya Mazmur 139:13-17, raimnai kawos fakfuken ine:
Raris moḇ Yahwe myam raya, snonggaku oso kankenem ḇyeja irandak ro fafisu isya kaker ro snari snekapar ḇyedi ke rofyor snari kyapar i kwar?
Yahwe byuk sasoser faro snonggaku ḇepon siwara fa nakadaunwarek bin ḇefadores ma kapira sesya. Kowasya Keluaran 21:22, 23, raimnai kawos fakfuken nane:
Bin oso kyara ḇa bo kapira ḇero snekapar ḇyedi kyapaf ro manggundi ido, moḇsa Yahwe myam i rai?
Bin oso kyara kwar mura ifrur fa kapira ḇero snekapar ḇyedi kyapaf ido, moḇsa Yahwe myam i rai?b
Wafawi kwar Manseren Allah moḇ myam roi ine, inja moḇsa ḇaḇir rai?
Bin ḇefarmyan ḇe Yahwe kwar kako, imbude bisa kyara myun kapira ro sneri ima nyan oser monda fa ifrur na. Kowasya Yesaya 41:10, raimnai kawos fakfuken suine:
Bin oso ismai dafdifer fa myun kapira ro sneri ido, mansei na dor fafnoḇek ro ya? Rosai ḇefnai ya?
SIA SOḆE: ”Bin oso na kyara fa myun kapira ro sneri insama kyapaf kukro imai.”
Rosai ḇefrur fa wakyar Yahwe ima ḇyesyowi kaku bin ani ma kapira ḇyedi kankenem suḇena?
FARKARKOR ḆYENA
Refo fyarkor ko fa koswar, koḇesyowi, ma komamwarek kankenem Yahwe byuk kwar ḇe ko na. Isoine kenem koḇena ma snonggaku ḇesesya kenem sena kako.
Waswarepen Kaḇer
Rosai ḇefnai fa Yahwe myam snonggaku koine kankenem koḇena ḇe roi ḇefarfnak ḇa?
Yahwe myam snonggaku oso imbe ifrur roi na ḇemun snonggaku ḇese ido, moḇsa na ḇyaḇir rai?
Rosai ḇefnai fa wakfasnai syowi kasumasa faro kankenem Manseren Allah byuk ḇe Au na?
SWEWAR NABOR WER
Rariso kofasnai syowi kasumasa faro kankenem Yahwe byuk kwar ḇe ko na?
Fafisu iwara bin oso myun kapira ro snekapar ḇyedi ido, nari Manseren Allah byuk ampun kaker ḇe I ke?
”Rosai Refo Ikofen ḇekur Snonggaku Ḇemun Kapira ro Snekapar ya?” (Fasfas ro situs jw.org)
Wos Refo na nafnoḇek snonggaku oso ḇekara fa imbe myun manggundi.
”Yakara Iḇye Yamar Mura—Wos Refo Bisa Nafnoḇek Aya Ke?” (Fasfas ro situs jw.org)
a Yahwe iswar kaku snonggaku ḇesanekar sya. (Mazmur 34:18) Imarisen isaramper si kukro ifawi sanekar sena nari nafnai ra skara imbe smun manggunsi. Wawasya rariso Yahwe byuk fafnoḇek faro snonggaku oso, rarirya isawen kakara ḇeḇye ḇa ḇefnai fa imbe myun manggundi. Wawasya fawar ḇero bar ”Swewar Nabor Wer” ro farkarkor ine: ”Yakara Iḇye Yamar Mura—Wos Refo Bisa Nafnoḇek Aya Ke?”
b Bin ḇemun kapira ḇyeja ro ḇepon iwara byuk sasar ker ḇe manggundi awer kukro Yahwe na byuk ampun ḇe i. Imbe wafawi syadi roi ine wer ido, mam fasfas ro bar ”Swewar Nabor Wer” ḇero farkarkor ine: ”Rosai Refo Ikofen ḇekur Snonggaku Ḇemun Kapira ro Snekapar ya?”