Kofrur ma Kawos Roi Ḇekaku Ḇesya Kwar

Bati koḇesya sikofen roi ḇekaku ḇe ko ido, na komarisen ḇae. Yahwe I kako imarisen fa bati Ḇyesya sikofen roi ḇekaku ya. Fama, inema roi ḇepyan risya ḇa kukro snonggaku ḇebor sya sifrur ma sawos roi ḇekaku ḇa. Imboi, payamyum rosai nari kosmai snar kofrur ma kawos roi ḇekaku ya ḇesya kwar?

1. Rosai ḇefnai kaku fa kofrur ma kawos roi ḇekaku ya?

Kawos roi ḇekaku ḇe snonggaku ḇese ido, kofasnai koswar ma koḇesyowi Yahwe I. Kokara roi ine: Rosai kokara ma kofrur na, nakame Yahwe ifawi na. (Ibrani 4:13) Yahwe isya myam ko rofyor kokinfir fa kokofen roi ḇekaku faro snonggaku ḇese, ma roi nane nafrur fa imarisen kaku. Refo ya doḇe, ”Yahwe dayin snonggaku ḇefarawrowes, ḇape ima fyanam faro snonggaku ḇena sne ḇenapes.”​—Amsal 3:32.

2. Moḇsa kanggarkar ḇa ro kenem koḇena ro ras ḇe ras rai?

Yahwe imarisen fa ’kokofen roi ḇekaku faro oso ma ḇesesya’. (Efesus 4:25) Inja rosai na kofrur ya? Rofyor kawos ḇe kina kobansi ke, min ro moḇ kofararur ke, naek srar ro kakyar oser koḇesi ke, ḇefararur ro pamarenta sya ke, nari kanggar si ḇa ḇaido na kokofen awer roi ḇekaku ḇa na. Snonggaku ḇefrur roi ḇekaku nari kyaraw ḇa ḇaido ifrowes snonggaku ḇese ḇa. (Kowasya Amsal 24:28 ma Efesus 4:28.) Rofyor sor som ido, nari ḇyak na. (Roma 13:5-7) Inja ’komarisen kofrur roi ḇenapes ḇesya kwar’ ro roi ḇeradine ma roi ḇesena.​—Ibrani 13:18.

3. Payamyum rosai nari kosmai snar kofrur ma kawos roi ḇekaku ya?

Sifawi ko ḇe snonggaku ḇefrur ma ḇeyawos roi ḇekaku kada, nari sikyar ko. Ro sidang ya dori, na naek srar koḇesya skain kuker payamyum raris kina oser. Rarirya, nari kosnesna nasren. Oso wer ido, kofrur ma kawos roi ḇekaku ya kada, nari snonggaku ḇese ’sisandik Allah ḇebuk fasaspar farkarkor ḇyena’, ma nari simarisen sakmambir Yahwe I kako.​—Titus 2:10.

SWEWAR KAKU WER

4. Kofrur ma kawos roi ḇekaku ido na Yahwe imarisen

Kowasya Mazmur 44:21 ma Maleakhi 3:16, raimnai kawos fakfuken suine:

• Rosai ḇefnai fa kopok kokara awer bisa kokram roi oso ro Yahwe I?

• Samswen mboi kokinfir fa kawos roi ḇekaku ido, moḇsa na Yahwe ḇyaḇir rai?

5. Kofrur ma kawos roi ḇekaku ya ḇesya kwar

VIDIO: Rosai Na Ḇeyun Raryaḇ?​—Sneuser Ḇesren (2:32)

Kowasya Ibrani 13:18, raimnai kawos rariso na kofrur ma kawos roi ḇekaku . . .

• faro kina koḇesi.

• ro moḇ kofararur ḇaido ro rumfarkor.

• ro fafisu ḇesena.

6. Kosmai payamyum snar kawos roi ḇekaku ya

Imbude randak ya kwara wafrur ma wawos roi ḇekaku ido, nari wasmai samswen. Ḇape ḇekaku ya, inema roi ḇepyum syadi fa wafrur nairya. Kowasya 1 Petrus 3:10-12, raimnai kawos fakfuken ine:

• Payamyum rosai manggundaw waksmai kwar snar wafrur ma wawos roi ḇekaku ya?

1. Mambeswa imbeswa suyawos roi ḇekaku ido nari farḇakḇuk suḇena nsambraḇ

2. Ḇefararur kaku sya nari sikyar si

3. Snonggaku ḇeyawos roi ḇekaku, nari pamarenta sya smam si ḇe kawasa ḇefrur pyum

FARKARKOR ḆYENA

Yahwe imarisen bati Ḇyesya sawos ma sifrur roi ḇekaku ya ḇesya kwar.

Waswarepen Kaḇer

• Moḇsa kanggarkar ḇa ro kenem koḇena ro ras ḇe ras rai?

• Rosai ḇefnai fa kokara awer bisa kokram roi oso ro Yahwe I?

• Rosai ḇefnai fa wamarisen wawos roi ḇekaku ya ḇesya kwar?

SWEWAR NABOR WER

Moḇsa sinan sya sfarkor romawa sesi fa sawos roi ḇekaku?

Wanggarkar Awer (1:44)

Kofrur kaku raris rosai kokofen kwar ido payamyum rosai na kosmai ya?

Wufepen Wos Bena, Wasmai Barakas (9:09)

Kwarapan nyan koḇak som na.

”Fandun fa Koḇak Som Ke?” (Syap Baryas 1 September 2011)

Rosai ḇefnoḇek snon oso fa fyadwer kenem ḇyeja ma danggar snonggaku ḇese wer ḇa?

”Yafawi Yahwe Ima Ifrur Pyum ma Imarisen Byuk Ampun” (Syap Baryas 1 Mei 2015)