FARKARKOR 52
Roi Ḇefnai fa Kokara Pyum Sansun Koḇena ma Moḇ Kosnai Raya
Manggunko oser-oser na komarisen kokinfir sansun minsai imbe kosun na ma komam moḇ kosnai raya. Refo isya iser wos anun ḇekur roi anine. Kosouser na kada, koisya kofasnai koso marisen manggun koḇena ḇa mboi koso Yahwe marisen Ḇyena. Rwama kawos wos anun ḇeḇeso nane.
1. Rosai ḇefnoḇek ko fa kokinfir sansun ma moḇ kosnai raya?
Kokinfir sansun ḇemnis, ḇesyadadi ḇa, ma ḇefasnai swaruser ḇepyum, ma komam moḇ kosnai raya fa nasren insama sifawi koma kosyom faro Manseren Allah. (1 Timotius 2:9, 10) Kokarapan wos anun nane: (1) Fandun fa kosun sansun ḇemnis. Rupa ra komam ro fananjur ari ya, Saksi-Saksi Yahwe oser-oser moḇ sisansun si ma moḇ sisnai raya naḇesisye. Fama, kosewar fa moḇ kosansun ko ma moḇ kosnai raya nfasnai koḇesyowi Manseren Allah kosyom ya. (2) Kosun sansun ḇesyadadi ḇa ido, nari kosun sansun ḇefrur fa snonggaku sya skara sasar ko ḇa ḇaido nafrur fa siknower ker ko ḇa. (3) Kofasnai swaruser ḇepyum kada, nari komewer kosowanan snonggaku sya moḇ sisansun si ma moḇ sisnai raya. (4) Iḇye kada moḇ kosnai raya nfasnai koma kosyom Manseren Allah. Rarirya, na napyan fa snonggaku ḇese sifawi samsyom faro Manseren Allah ḇekaku ya.—1 Korintus 10:31.
2. Rariso nyan kosansun ko raya na nawyae naek srar koḇesya rai?
Ko oser-oser na kokinfir ro manggunko sansun imbe kosun na ḇae. Imbape, fandun fa kokara pyum moḇ kosansun ko raya nari nawyae snonggaku ḇese ke roḇa. Kosewar kaku insama ’kofrur marisen naek srar koḇesi faro ḇaḇye sena’.—Kowasya Roma 15:1, 2.
3. Rosai ḇefnai fa kosansun pyum ko ido na snonggaku sya simarisen sakfawi Yahwe I?
Na kosewar fa kosansun pyum ko ro fafisu nakam, ḇefandun syadi na kosansun pyum ko rofyor kora koso fananjur ari ma koso ro ḇaḇebaryas. Komewer moḇ kosnai raya nafrur fa snonggaku ḇese smam anun kun na ḇe roi ḇefandun manggenem ḇa. Imbape komarisen moḇ kosansun ko raya nafrur fa snonggaku ḇese simarisen sakfawi Manseren Allah kosyom ya ma ’sisandik Allah farkarkor ḇyena ḇebuk fasaspar ya ḇe ko’.—Titus 2:10.
SWEWAR KAKU WER
Nari kofarkor fa komam pyum moḇ kosansun ko raya ma moḇ kosnai raya nafnoḇek snonggaku ḇese fa smam koinema snonggaku Kristen ḇekaku siko.
Moḇ kosnai raya nfasnai koḇesyowi ḇeyuf papoik sya ke roḇa. Kofawi Yahwe myam ro bondi ḇa bo myam kosnesna, mboi moḇ kosnai raya kako nfasnai koisya koḇesyowi I
4. Komam fa kosnai pyum ido koisya koḇesyowi Yahwe I
Rosai ḇefnai kaku fa komam pyum moḇ kosnai raya? Kowasya Mazmur 47:2, raimnai kawos fakfuken nane:
Kofawi koinema Yahwe manfamyan Ḇyesiko, inja rariso roi nane nafnoḇek ko fa kokara pyum moḇ kosansun ko raya?
Kokara pyum moḇ kosnai raya ro fananjur ari ma ro ḇaḇebaryas ya ima roi ḇefandun kaku ke? Kwarem rarirya kukro?
5. Nyan fa kokinfir pyum sansun koḇena ma moḇ kosnai raya
Sansun koḇena kokowes na fa nek ke roḇa yo, fandun fa nasren ma nasrow fa kosun na ro ras nakam. Kowasya 1 Korintus 10:24 ma 1 Timotius 2:9, 10. Raimnai, kawos rosai ḇefnai fa kosun awer sansun . . .
ḇefamfnom.
ḇefyos manggenem ḇefnai fa snonggaku ḇese skara sasar ko.
Snonggaku Kristen sima sisouser Sasoser Moses wer ḇa, ḇape sasoser anna nfasnaiḇair Yahwe kakara Ḇyena. Kowasya Ulangan 22:5, raimnai kawos fakfuken ine:
Rosai ḇefnai fa komam pyum insama moḇ kosansun ko raya ma moḇ kosnai raya nafnai awer fa snonggaku ḇese skara sasar snon ko ḇe bin ḇaido bin ko ḇe snon?
Kowasya 1 Korintus 10:32, 33 ma 1 Yohanes 2:15, 16, raimnai kawos fakfuken nane:
Rosai ḇefnai fa kokara pyum moḇ kosansun ko raya nari nafrur fa snonggaku ḇero moḇ koḇarek ya ḇaido ro sidang skarkar ke roḇa?
Snonggaku ḇero moḇ Bedi moḇsa sisansun si ma moḇsa sisnai rai?
Kwara ido, moḇ sisansun si raya ono naisya nasrow ḇa faro snonggaku Kristen sya ke? Kwarem rarirya kukro?
Nyan kosansun ko ma moḇ kosnai raya naḇesisye, mboi nafrur fa Yahwe imarisen
SIA SOḆE: ”Yabe yasun sansun minsai yamarisen na, manggundaya.”
Wakkara rarirya kako ke? Kukro?
FARKARKOR ḆYENA
Kokinfir pyum sansun koḇena ma kosnai pyum ido, koisya koḇesyowi Yahwe I ma snonggaku ḇesesya.
Waswarepen Kaḇer
Rosai ḇefnai fa Yahwe na imarisen ko ke roḇa, ine ryamuma ro moḇ kosansun ko ma moḇ kosnai raya?
Wos anun rosai na ḇefnoḇek ko fa kokinfir sansun koḇena ma moḇ kosnai raya?
Rosai ḇefnai fa moḇ kosansun ko raya na nafrur fa snonggaku sya simarisen sakfawi Yahwe I?
SWEWAR NABOR WER
Wawasya fa wafawi snonggaku ḇese moḇ skara ko ine ryamuma ro moḇ kosansun ko raya.
Roi ḇefnai fa kwara pyum resari fyor wafrur tato ro baken Beja ḇaim.
Kwarapan wos anun ḇese ine wer na ḇefnoḇek ko fa kokinfir pyum sansun koḇena.
”Nyan Wasansun Au Rai Nun Sanandik be Allah I Ke?” (Syap Baryas paik September 2016)