FARKARKOR 55

Waksaramper Sidang Jemaat Moḇ Waryur ro ya

Ḇesnai ra Syap

Snonggaku riyuta ḇeryur ro sidang jemaat risyaran ro supswan ine ḇesiper, simarisen kaku fa sfarmyan ḇe Yahwe I. Sikofen kasumasa faro akurfasnai ma farkankin sismai ro sidang ya dori, ma siryaḇ kaku fa sisaramper sidang sedi ro nyan ḇebor. Wakḇaḇir rarirya ma wamarisen waksaramper sidang Bedi raris si ke?

1. Ro nyan risai na fasos oras ma samambraḇ Bena fa bukisaramper sidang waryur ro ya?

Kokame bisa kobuk fafnoḇek faro sidang jemaat koryur ro ya. Mam ro sidang Bedi naek ma srar eḇe mansar binsar kwar ḇaido ḇesambraḇ ḇa kwar sisya ke? Bisa wun pyan si ḇe fananjur ya ke? Ḇaido wafnoḇek si fa wakowes pyan roi sfandun na oroḇaido wafrur sren rum sena ke? (Kowasya Yakobus 1:27.) Oso wer ido, na kakso fa kofrur sren ma komamwarek Balai Kerajaan koḇedi. Ono ḇedif ko fa kofrur fararur nane ḇa. Saswar faro Manseren Allah ma naek srar koḇesya naiso ḇewar fa kofrur roi nane ’kuker sne ḇemarisen’.—Mazmur 110:3.

Saksi Yahwe ḇebaptis kwar sya, na sisaramper sidang kuker nyan ḇesena wer. Mambesrar ḇeso kwar akurfasnai ro Refo ya, bisa suffarmyan ḇe hamba pelayanan, mura nari sakḇe penatua. Naek ḇaido srar ḇese wer na sifrur nabor syadi ro fararur ḇaḇebaryas kuker suffarmyan ḇe perintis. Naek srar ono wer sifnoḇek ro fararur ḇaḇawes Balai Kerajaan ḇaido sra ḇe sidang ḇese ḇefandun fafnoḇek ya.

2. Moḇsa kobuk nana koḇena fa kobukisaramper sidang jemaat ya rai?

Refo ya doḇe ’koḇesyowi Yahwe I kuker nana ḇekakur koḇena’. (Amsal 3:9) Na kobuk pipi koḇena ma nana ḇesena ḇe farsarser fa koksaramper sidang koḇedi ma fararur ḇaḇebaryas ro supswan ine ḇesiper. Inema syowi ḇeba kaku nairi. (Kowasya 2 Korintus 9:7.) Farsarser kumpan koḇena sbuk na kako fa siksaramper naek srar ḇesmai roi ḇemun sya. Naek srar ḇebor sya sfasos ḇepon pipi sena insama bisa sbuk farsarser pdef. (Kowasya 1 Korintus 16:2.) Farsarser kumpan koḇena bisa koser na ro rosaser srir kwar ro rum ari ya ḇaido roro Internet ro donate.jw.org. Ine iso nyan Yahwe byuk ḇe ko fa kakfasnai saswar koḇena faro I.

SWEWAR KAKU WER

Nari kawos nyan riḇeso bisa wafrur fa waksaramper sidang ya.

3. Kobuk nana koḇena

Manseren Yahwe ma Yesus suswar snonggaku ḇebuk kuker sne ḇemarisen sya. Rupa ra, Yesus myanen kabom oso ḇena roi oḇa mboi syewar fa byuk farsarser kumpan ḇe Yahwe I. Kowasya Lukas 21:1-4, raimnai kawos fakfuken suine:

Insama Yahwe imarisen, fandun fa kobuk kumpan nabor ḇe farsarser ke?
Kobuk farsarser kuker sne ḇemarisen ido, moḇsa na Yahwe ma Yesus suḇerai?

Moḇsa sepake farsarser kumpan koḇena rai? Komam VIDIO, raimnai kawos fakfuken ine:

VIDIO: ’Farsarser faro Yahwe I’ (4:47)

Moḇsa sepake farsarser koḇena fa siksaramper sidang jemaat ḇero supswan ine ḇesiper rai?

Imbesrar ḇesinan oso iser pipi ḇyena ḇe rosaser faro farsarser.

4. Kosaramper kuker kobuk manggunko

Ro fafisu naiwara, Yahwe kawasa Ḇyesi siryaḇ kaku fa smamwarek moḇ seari ro ya. Sifrur roi ine kuker sbuk pipi monda ḇa. Kowasya 2 Tawarikh 34:9-11, raimnai kawos fakfuken ine:

Rosai snonggaku Israel oser-oser sifrur fa smamwarek Yahwe rum Ḇyedi, ḇaido moḇ seari ro ya?

Saksi-Saksi Yahwe sakfrur raris snonggaku Israel ḇepon siwara. Komam VIDIO, raimnai kawos fakfuken suine:

VIDIO: Komamwarek Moḇ Koḇenadi ro Na (3:31)

Sonin ḇero vidio ’Komamwarek Moḇ Koḇenadi ro Na’. Snon, bin, ma romawa sya sifrur sren Balai Kerajaan bandum ya.

Rosai ḇefnai fa komamwarek Balai Kerajaan koḇena fa nasren ma nasnai pyum?
Rosai monda na wakfrur fa wakbuk fafnoḇek?

Saksi ḇeḇeso sifnoḇek ro fararur ḇaḇawes Balai Kerajaan.

5. Mambesrar sya sisewar fa suf fararur nabor syadi

Refo danunepen snon Kristen sya insama sisewar kaku fa sisaramper sidang jemaat. Inja rosai nari sifrur ya? Komam VIDIO, raimnai kawos fakfuken na.

VIDIO: Mambesrar Mgoya—Mgosewar Kaku fa Mguf Fararur Ḇepyum (5:19)

Ro vidio insanja, rosai Ryan ifrur fa daksaramper sidang jemaat ya?

Faro mambesrar ḇemarisen ḇeyuffarmyan ḇe hamba pelayanan ma penatua, Refo fyasḇair akurfasnai fa siso na. Kowasya 1 Timotius 3:1-13, raimnai kawos fakfuken nane:

Mambesrar ḇemarisen ḇeyuffarmyan ḇe hamba pelayanan ma penatua, rosai Refo dor ro si fa sifrur na?
Rosai Refo dor ro kina sesi fa sifrur na?—Mam mnuk ḇe 4 ma 11.
Mambesrar sya sisewar fa sisouser akurfasnai ani kada, payamyum rosai nari naek srar ro sidang sya sismai na?