FARKARKOR 56
Komam fa Koḇeoser Pdef ro Sidang Jemaat ya Dori
Fafisu kokainus naek srar koḇesya, na koḇaḇir raris Raja Daud moḇ ḇyaḇir raya. Ikofen bo doḇe, ”Napyum kaku ma nafrur marisen rofyor naek srar sḇeoser bo sḇarek kayamyam.” (Mazmur 133:1) Ḇaḇeoser koḇedine ryama ro manggundi ḇa, ko oser-oser fandun fa kosewar kaku na.
1. Roi ḇepyum kaku rosai Allah kawasa Ḇyesi sismai na?
Rofyor waso ari ro sup ḇese, imbude na wafawi manggun wos seja ḇa. Imbape na wamarisen kaku kukro siser pyum Au ma siswar Au. Rosai ḇefnai ya? Kukro ro moḇ sairirya kam, syap kokfarkor Refo ya nakam namnis. Oso wer ido, kosewar fa kofasnai koswaryae ko. Ro moḇ risai koḇarek ro ya, kokame ’kor faro snonsnon Yahwe fa koḇeoser kosyom I’.—Zefanya 3:9, fasfas kasun.
2. Rosai na wakfrur insama koḇeoser pdef?
Refo ya doḇe, ”Mkoswaryae mko kuker sne ḇesiper.” (1 Petrus 1:22) Moḇsa na wasouser wos anun ine rai? Mam mura awer faro naek srar sya rari ḇepyum ḇa sena, imboi mam rari ḇepyum sena. Oso wer ido, bebati monda awer kuker snonggaku ḇemnis ra Au ma ḇena marisen raris Au. Swewar kako fa mambir naek srar ḇesnai ḇese ro Au. Kosewar kako fa kosawen kakara ḇesasar ro swaruser ma sne koḇena ḇekur snonggaku ḇesesya.—Kowasya 1 Petrus 2:17.a
3. Nwa wos oser ḇa kuker min Kristen oso ido rosai na wafrur ya?
Komam kada koma koḇeoser kwar, ḇape koinema snonggaku ḇenapes ḇa kaker siko. Inja ras ono ido, na kofrur fa snonggaku oso fyafko ḇaido sneri iduf. Inja Refo ya danunepen ko fa ’kobuk ampunyae, imnis raris Yahwe ipyos sasar koḇena kwar ko kako kakfrur rarirya’. (Kowasya Kolose 3:13.) Kofrur fa Yahwe sneri iduf ker, fama byuk ampun kaker ḇe ko. Inja dor fa kakbuk ampun faro naek srar koḇesya. Wafawi Ausya wafrur fa snonggaku oso sneri iduf ido, swewar ḇepon fa mam na insama mukain pyum kaḇer.—Kowasya Matius 5:23, 24.b
SWEWAR KAKU WER
Nari kawos nyan fa wakfrur na insama wafnoḇek naek srar ro sidang fa sḇeoser ma skain pyum.
Rosai na wakfrur insama kwain pyum kuker snonggaku ḇesesya?
4. Kosawen kakara ḇesasar ḇekur snonggaku ḇese
Komarisen koswar naek srar koḇesya kam. Ḇape imbude samswen fa kofanam kuker snonggaku ḇesrow kuker ko ḇa. Rosai na ḇefnoḇek koni? Kowasya Farfyar 10:34, 35, raimnai kawos fakfuken suine:
Yahwe imarisen kaku myam snonggaku ḇeraker er sairirya kam sakḇe Saksi ḇe I. Moḇsa na wakfrur raris Yahwe I fa mam snonggaku ḇese ḇemnis kuker Au ḇa?
Kakara ḇesasar rosai snonggaku ḇebor ḇero moḇ Beja sna kaker ḇekur snonggaku ḇese?
Kowasya 2 Korintus 6:11-13, raimnai kawos fakfuken ine:
Rosai na wakfrur insama bisa fanam syadi kuker naek srar ḇemnis kuker Au ḇa?
5. Kobuk ampun kuker sne ḇesiper ma kokain pyum kuker ḇesesya
Yahwe ima dakfrur sasar yoḇ ko ḇa, inja fyandun ampun ro ko ḇa. Iso ḇebuk ampun ḇe ko kuker sne ḇesiper ḇesya kwar. Kowasya Mazmur 86:5, raimnai kawos fakfuken nane:
Ro mnuk ine, rosai wafarkor ro nyan Yahwe byuk ampun faro snonggaku koine?
Rosai ḇefnai fa wakofen kasumasa kaku kukro Yahwe byuk ampun ḇe ko kwar?
Ro fafisu ḇerariso na samswen fa kokain pyum kuker snonggaku ḇese?
Moḇsa na koso Yahwe nyan Ḇyena fa koḇeoser pdef kuker naek srar koḇesya rai? Kowasya Amsal 19:11, raimnai kawos fakfuken ine:
Fafisu snonggaku oso ifrur fa wamsor ido, rosai na wafrur fa kwain pyum kaḇer kuker i?
Ras ono ido, na kofrur fa snonggaku ḇese simsore. Rarirya ido, rosai na kofrur ya? Komam VIDIO, raimnai kawos fakfuken na.
Ro vidio insanja, rosai imbesrar ani ifrur fa kyain pyum kaḇer kuker imbesrar sumin ya?
6. Mam mura ḇe naek srar sya rari ḇepyum sena
Kofanam syadi faro naek srar koḇesya kada, na komambir rari ḇepyum ma rari ḇepyum ḇa sena. Inja moḇsa na komam monda faro rari ḇepyum sena rai? Komam VIDIO, raimnai kawos fakfuken na.
Rosai na ḇefnoḇek Au fa mam monda faro naek srar sya rari ḇepyum sena?
Manseren Yahwe myam monda faro rari ḇepyum koḇena. Kowasya 2 Tawarikh 16:9a, raimnai kawos fakfuken ine:
Moḇsa ḇaḇir rai rofyor wafawi Yahwe myam monda faro rari ḇepyum Bena?
Komam kada roi ḇero berlian dori rya napakpef kero, mboi naiso ḇefrur fa berlian ani isnai pduk ma ḇyekakur. Rarirya kako, naek srar koḇesya sinapes ḇa kaker, mboi Yahwe myam sima semaeja kaku
SIA SOḆE: ”Dor maf epon ḇe aya sape na yakbuk maf ḇe i.”
Rosai ḇefnai fa kobuk ampun ḇe snonggaku ḇese kuker sne ḇesiper?
FARKARKOR ḆYENA
Roi na wakfrur insama sidang ḇyeoser pdef iso buk ampun ma fasnai saswar faro naek srar syakam.
Waswarepen Kaḇer
Rosai na wakfrur fa wasawen kakara ḇesasar ḇekur snonggaku ḇese?
Rosai nari wakfrur fafisu nwa wos oser ḇa kuker min Kristen oso?
Rosai ḇefnai fa wamarisen wakfrur raris Yahwe I fa buk ampun ḇe snonggaku ḇesesya?
SWEWAR NABOR WER
Mam rariso Yesus wos sarḇer oso ḇyena nafnoḇek ko fa koḇemankara famfnom awer snonggaku ḇese.
Snon ri suru suba ro moḇ snonggaku sya sayin ḇena kif ḇesnai ḇese. Mam rosai ḇefnoḇek su fa suswaryae su.
Johny ma Gideon: Randak Iwara Suḇembroḇ Su, Fafisu Ine Suḇe Mambekanaek (6:42)
Kwara rosai bisa wakfrur insama famfaḇri na nakyaren awer ḇaḇeoser ro sidang.
”Kawos Mnis Famfabri Kuker Nyan Saswar ya” (Syap Baryas paik Mei 2016)
a Snonggaku Kristen sima siswar snonggaku ḇese, inja na sisasor si insama dafduf ḇepampam na nakren awer ḇe snonggaku ḇese. Mam roi ine ro Fasfas Ḇewarpu 6.
b Fasfas Ḇewarpu 7 dawosḇair nyan fa kokain pyum kaḇer fafisu kona samswen kuker naek srar koḇesi ḇekur sasewar ma parkara hukum na.