Benadi Ḇesya Kwar fa Wasmai Barakas ro Manseren Allah

Manseren Allah ḇyuk roi ḇepyum kofandun kaku, isoine swaf fa kawawos yoḇ I ro nadi. Inja, kona nyan fa kokofenḇair kakara koḇena faro I ro nadi koḇena. Daud ḇyenadi radine, ”Sye Manḇerower nadi, snonggaku sairirya kam nari srama faro Au.” (Mazmur 65:⁠2) Imbape, rariso insama Manseren Allah ryower nadi koḇena ma kosmai barakas ro I?

KOḆENADI KAKU KUKER SNE ḆESIPER

Rofyor koisya koḇenadi, kokofenḇair roi ko­kram ro kosnesna ro ḇarpon Manseren Allah. (Mazmur 62:⁠8) Ine ḇyeḇair Sinan imarisen kofawar roi kokara kaku na yoḇ I. Allah Ḇepoik Syadi imarisen ryower nadi koḇena rofyor kor kuker sne ḇesiper.

KAP MANSEREN ALLAH SNONSNON ḆYEDI FYOR KOḆENADI

Manseren Allah nya nasan nabore, raris Mami, Sinan, ma Knam Saswar. Imbape nya snonsnon oser monda. Ikofenḇair na ḇe ko radine, ”Ayaine Yahwe. Iso snonsnon Ayedi.” (Yesaya 42:⁠8) Sfas snonsnon ine ro Refo nasyadi ro 7.000. Nabi ḇebor ro fafisu naiwara sap Manseren snonsnon Ḇyedine ro nadi sena kako. Imnis ra Abraham i, doḇe, ”Yahwe yo, wamsor awer, imbe yafuken wer.” (Kejadian 18:30) Fafisu koḇenadi, fandun kaku fa kap Manseren snonsnon Ḇyedi, Yahwe.

KOḆENADI RO WOS KOḆEJA

Wos risai monda koḇukidawos na, Manseren Allah ifawi roi kokara ma koḇaḇir na. Refo ya doḇe, ’Allah myam rarwas snonggaku ḇa. Snonggaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si.’​—⁠Farfyar 10:34, 35.

Imbape, konadi ḇesya kwar insama ko­smai barakas ro Manseren I. Farkarkor ḇerama ine, nari ikofenḇair nyan fa kofrur roi ine.