Jajes
8 Be biaen ol laen blong Efrem oli askem long Gideon se: “?Yu yu mekem wanem fasin ya? ?From wanem yu no singaot mifala taem yu go faet agensem ol man Midian?”+ Nao oli stap rao long hem.+ 2 Be hem i talem long olgeta se: “?Olsem wanem samting we mi mekem i gud moa long samting we yufala i mekem? ?Yufala i no ting se wok blong pikimap ol bale mo wit we Efrem i mekem,+ hem i gud moa i winim wok blong havestem ol grep, we Abiesa i mekem?+ 3 God i putum tufala prins blong Midian, hemia Oreb mo Seheb long han blong yufala,+ taswe ?wanem wok nao we mi mi mekem we i sem mak long yufala?” Taem hem i toktok olsem long olgeta, oli no moa kros.*
4 Nao Gideon i godaon long Jodan Reva, i krosem i go narasaed. Hem wetem ol 300 soldia we oli stap wetem hem oli taed, be oli gohed nomo blong ronem ol enemi blong olgeta. 5 Nao taem oli kamtru long Sukot, Gideon i talem long ol man ples ya se: “Plis, yufala i givim sam bred long ol man we oli stap folem mi from we oli taed, mo mifala i stap ronem Sebaha mo Jalmuna, tufala king blong Midian.” 6 Be ol prins blong Sukot oli talem se: “?From wanem bambae mifala i givim bred long soldia blong yu? Yufala i no holem Sebaha mo Jalmuna yet.” 7 Nao Gideon i talem se: “From we yufala i talem olsem, taem Jehova i putum Sebaha mo Jalmuna long han blong mi, bambae mi tekem ol ropnil mo ol plant we oli gat nil long draeples, mi wipim yufala.”+ 8 Nao hem i aot long ples ya i go long Penuel, mo i askem sem samting long olgeta, be ol man Penuel oli talem sem tok olsem ol man Sukot. 9 Ale hem i talem long ol man Penuel se: “Taem mi winim tufala ya, nao mi kambak, bambae mi pulumdaon taoa ya.”+
10 Sebaha wetem Jalmuna, mo samwe 15,000 ami blong olgeta oli stap long Kakoro. Hemia nomo ol ami blong olgeta long Is+ we oli stap yet, from we 120,000 ami we oli holem naef blong faet, oli ded finis. 11 Nao Gideon i gohed, i folem rod we i pas long ples blong ol man we oli stap laef long tent, long is blong Noba mo Jogbeha,+ nao i kamtru long kamp blong ol enemi, i faet agensem olgeta, be ol enemi ya oli no rere nating. 12 Taem tufala king blong Midian, Sebaha mo Jalmuna tufala i ronwe, hem i ronem tufala gogo i holem tufala, mo hem i mekem evriwan long kamp ya oli fraet we oli no moa save wanem blong mekem.
13 Taem faet i finis, Gideon boe blong Joas i pas long rod we i go antap long Heres blong i gobak. 14 Long rod hem i holem wan yangfala man Sukot, mo i askem sam kwestin long hem. Nao yangfala ya i raetemdaon nem blong ol prins mo ol elda blong Sukot mo i givim long hem. Olgeta evriwan 77. 15 Nao Gideon i go luk ol man Sukot mo i talem long olgeta se: “Hemia Sebaha mo Jalmuna we yufala i bin tok nogud long mi from, yufala i se: ‘?From wanem bambae mifala i givim bred long ol man blong yu we oli taed tumas? Yufala i no holem Sebaha mo Jalmuna yet.’”+ 16 Nao hem i tekem ol elda blong taon ya, mo i yusum ol ropnil mo ol plant we oli gat nil long draeples, i tijim wan lesen long olgeta.+ 17 Nao hem i pulumdaon taoa blong Penuel+ mo i kilim olgeta man blong taon ya oli ded.
18 Hem i askem long Sebaha mo Jalmuna se: “?Ol man we yufala i kilim olgeta long Taboro, oli olsem hu?” Nao tufala i ansa se: “Oli olsem yu, olgeta wanwan oli olsem pikinini blong king.” 19 Ale hem i talem se: “Olgeta ya oli brata blong mi, oli pikinini blong mama blong mi. Jehova i laef i stap, mo long fes blong hem mi mi talem tru long yufala se sipos yufala i no bin kilim olgeta, bambae mi no save kilim yufala.” 20 Nao hem i talem long Jeta we i fasbon blong hem se: “Yu girap, yu kilim tufala.” Be Jeta i no tekemaot naef blong faet blong hem, from we hem i fraet mo hem i wan yangfala nomo. 21 Ale Sebaha mo Jalmuna, tufala i talem se: “Yu girap, yu soemaot paoa blong yu, yu kam kilim mitufala i ded.” Nao Gideon i girap i kilim Sebaha mo Jalmuna i ded.+ Mo hem i tekemaot ol flas samting* we oli hang blong nek blong ol kamel blong tufala.
22 Samtaem biaen, ol man Isrel oli talem long Gideon se: “I gud yu mo ol boe blong yu, mo ol smol bubu blong yu, yufala i rul long mifala, from we yu yu tekemaot mifala long han blong ol man Midian.”+ 23 Be Gideon i talem long olgeta se: “Mi bambae mi no rul long yufala, mo ol boe blong mi tu bambae oli no rul long yufala. Jehova nao bambae i rul long yufala.”+ 24 Gideon i gohed i se: “Be mi wantem askem wan samting long yufala. Mi wantem se yufala wanwan i givim long mi, wan ring blong nus we yufala i karem long ol ples we yufala i winim.” Olgeta ya oli laen blong Ismael, taswe oli gat ol gol ring long nus blong olgeta.+ 25 Nao oli ansa se: “Bambae mifala i givim ol ring ya long yu.” Ale oli openem wan kaliko, nao olgeta wanwan oli kam sakem wanwan ring blong nus we oli winim long taem blong faet, long kaliko ya. 26 Nao hevi blong ol gol ring blong nus we oli givim long Gideon i kasem 1,700 gol sekel,* mo tu i gat ol flas samting we oli luk olsem niu mun, mo i gat ol flas samting we oli hang long ol jen, mo ol pepol klos we king blong Midian i stap werem we oli wokem long wul, mo ol nekles long nek blong ol kamel.+
27 Nao Gideon i yusum ol gol ya blong mekem wan efod,+ mo i stanemap long Ofraha we i taon blong hem.+ Be olgeta man Isrel oli mekem olsem ol prostitut,+ oli lego God blong olgeta nao oli go wosipim efod ya. Nao samting ya i kam olsem wan trap blong Gideon mo olgeta long haos blong hem.+
28 Long fasin ya, ol laen blong Isrel oli winim ol man Midian.+ Mo ol man Midian oli no moa go faet agensem olgeta bakegen.* Mo long taem blong Gideon, kantri ya i spel* blong 40 yia.+
29 Ale Jerubal+ we i boe blong Joas, i gobak long haos blong hem, mo i stap long ples ya.
30 Gideon i gat 70 boe from we hem i gat plante waef. 31 Narafala woman blong hem we i stap long Sekem, hem tu i bonem wan boe blong Gideon, nao Gideon i putum nem blong hem se Abimelek.+ 32 Gideon boe blong Joas i olfala we i olfala gud nao hem i ded, mo oli berem hem long tomb blong papa blong hem Joas long Ofraha, long graon blong ol laen blong Abiesa.+
33 Stret afta we Gideon i ded, ol laen blong Isrel oli mekem olsem ol prostitut, oli lego God blong olgeta bakegen nao oli go wosipim ol Bal,+ mo oli putumap Balberit blong i kam olsem god blong olgeta.+ 34 Ol laen blong Isrel oli no tingbaot Jehova we i God blong olgeta,+ we i bin tekemaot olgeta long han blong ol enemi we oli stap raonabaot long olgeta.+ 35 Mo oli fogetem ol gudfala samting we Jerubal, hemia Gideon, i mekem long ol laen blong Isrel, mo oli no soemaot lav long olgeta long haos blong hem.+