Ol Yangfala Oli Askem . . .

?Bambae Mi Talem Long Narafala Se Tingting Blong Mi i Foldaon?

“Taem tingting blong mi i foldaon, mi harem se mi no wantem tokbaot, from we ol narafala oli save ting se mi stap mekem tumas trabol. Be biaen, mi luksave se mi nidim blong toktok wetem wan narafala, blong hem i save givhan long mi.”—Alejandro, we i gat 13 yia blong hem.

“Taem tingting blong mi i foldaon, mi no save talem long ol fren blong mi, from we mi mi no ting se oli save givhan long mi. Bambae oli laf long mi nomo.”—Arturo, we i gat 13 yia blong hem.

SAM samtaem, yumi evriwan i save harem nogud.a Be yu we yu yangfala nomo mo yu no gat fulap save, ol trabol long laef oli save daonem yu isi nomo. Maet papa mama blong yu, ol fren, mo ol tija, oli askem long yu blong mekem plante samting. Bodi blong yu mo ol filing tu oli stap jenis long yangtaem blong yu. Maet yu mestem long wan smol samting, nao yu harem se yu gud blong nating nomo. Olgeta samting ya oli save mekem yu yu harem nogud mo yu no moa glad.

Taem samting ya i hapen, i gud we yu tokbaot trabol ya wetem narafala. Beatriz we hem i gat 17 yia blong hem, i talem se: “Sipos mi no save tokbaot ol trabol blong mi wetem narafala, ating bambae mi bosta.” Be sore tumas, plante yangfala oli no wantem tokbaot ol trabol blong olgeta, nao plante taem tingting i foldaon bitim mak. María de Jesús Mardomingo, we hem i tija long wan skul blong ol Dokta long Madrid, i talem se plante yangfala we oli rere blong kilim i ded olgeta wan bakegen, oli harem se oli stap olgeta nomo, oli no gat fren. Plante yangfala we oli bin traem blong kilim i ded olgeta bakegen, oli talem se oli no bin faenem wan man no woman we oli save trastem hem naf, blong oli tokbaot ol trabol blong olgeta long hem.

?Olsem wanem long yu? ?I gat wan i stap we yu yu save toktok wetem hem taem yu harem nogud? ?Sipos no, yu save go luk hu?

Toktok Wetem Papa Mama Blong Yu

Alejandro, we yumi tokbaot finis, i talem wanem we hem i mekem taem tingting blong hem i foldaon, i se: “Mi storian long mama blong mi, from we taem mi mi bon kam kasem naoia, hem i stap givhan long mi, mo hem i save mekem se tingting blong mi i kam strong bakegen. Mi stap toktok wetem papa blong mi tu from we, long laef blong hem, hem i bin kasem ol semfala trabol olsem mi. Sipos mi harem nogud be mi no talemaot, filing blong mi bambae i kam moa nogud.” Rodolfo we hem i gat 11 yia blong hem, i talem se: “Samtaem tija long skul i stap daonem mi mo i tok strong long mi, ale mi mi harem nogud. Mi stap go krae nomo long toelet. Be biaen, mi toktok wetem mama blong mi, mo hem i givhan long mi blong winim trabol ya. Sipos mi no storian long hem, bambae mi harem nogud moa.”

?Yu yu bin tingbaot se i gud blong talemaot evri samting we i stap long hat blong yu long papa mama blong yu? Maet yu ting se tufala i no save kasem save long trabol blong yu. ?Be tingting ya i stret? I tru, maet tufala i no kasem save fulwan long ol trabol we i stap kasem ol yangfala tede. Be ating tufala i save yu moa i bitim we ol narafala man long wol oli save yu. Alejandro i se: “Sam samtaem, i no isi long papa mama blong mi blong kasem save long filing blong mi mo soem sore.” Nating se i olsem, hem i se: “Be mi save se mi save toktok wetem tufala enitaem.” !Plante yangfala oli sapraes taem oli luk we papa mama blong olgeta oli kasem save long trabol blong olgeta! Oli olfala moa, mo oli gat moa save long laef, taswe plante taem oli save givim ol gudfala advaes. Samting ya i tru moa sipos oli bin folem ol rul blong Baebol plante yia finis.

Beatriz we yumi tokbaot finis i talem se: “Taem mi toktok wetem papa mama blong mi, tufala i leftemap tingting blong mi mo givim ol advaes we i stret long ol trabol blong mi.” Taswe, advaes blong Baebol i stret nomo taem hem i talem long ol yangfala se: “Pikinini blong mi. Yu mas mekem olsem we mi wetem mama blong yu i stap talem long yu, mo yu no mas fogetem ol samting ya we mitufala i stap tijim yu long hem. Mi mi papa blong yu. Yu mas lesin long mi, from we mi mi bonem yu. Mo taem mama blong yu i kam olfala, yu mas soemaot long hem, we yu yu stap tingbaot ol samting we hem i mekem long yu.”—Ol Proveb 6:20; 23:22.

Be i hadwok blong toktok wetem papa mama blong yu sipos yu no stap frengud wetem tufala. Dokta Catalina González Forteza i tokbaot wan stadi we samfala oli mekem long ol yangfala long haeskul. Olgeta we oli bin traem blong kilim i ded olgeta wan bakegen oli talem se oli ting nating long olgeta wanwan, mo se oli no stap frengud wetem papa mama blong olgeta. Be, ol yangfala we oli “frengud wetem papa mama blong olgeta,” oli no stap daonem olgeta bakegen.

Taswe, yu yu waes sipos yu traehad blong frengud wetem papa mama blong yu. Wokem fasin blong toktok wetem tufala oltaem. Talemaot long tufala ol samting we i stap hapen long laef blong yu. Askem sam kwestin long tufala. Ol isi toktok olsem i save mekem se i no had blong toktok wetem tufala taem yu gat wan bigfala trabol.

Toktok Wetem Wan Fren

?Yu ting se i isi moa blong toktok wetem wan yangfala fren blong yu long ol trabol we i kasem yu? I tru, i gud tumas blong gat ol fren we yu save trastem olgeta. Ol Proveb 18:24 i talem se, “[sam fren] oli save mekem i gud moa long yu, i winim ol brata blong yu.” Ol yangfala fren oli save sore long yu mo tekem saed blong yu, be maet oli no givim beswan advaes. Olgeta ya oli olsem yu, oli no laef longtaem yet. Tingbaot Rehoboam, wan king we Baebol i tokbaot. Hem i no wantem lesin long advaes we ol olfala man we oli laef longtaem oli talem long hem, be hem i girap, i lesin long ol yangfala fren blong hem. ?Wanem i kamaot from? !Trabol! Bighaf blong ol man blong hem oli ronwe long hem, mo God i no moa glad long hem tu.—1 King 12:8-19.

Wan narafala trabol we i save kamaot taem yu toktok wetem ol yangfala fren blong yu, hemia se oli no save holem toktok ya i blong olgeta nomo. Arturo we yumi tokbaot finis i talem se: “Plante boe we mi mi save olgeta oli toktok wetem ol fren blong olgeta taem oli harem nogud. Be biaen, ol fren ya oli talemaot evri samting long ol narafala fren blong olgeta mo jikim ol boe ya nomo.” Samting olsemia i kamaot long Gabriela we i gat 13 yia blong hem. Hem i se: “Wan dei, mi mi faenemaot se fren blong mi i talemaot ol bisnes blong mi long wan narafala fren blong hem. Ale, mi no moa talem ol bisnes blong mi long hem bakegen. Mi stap storian wetem ol yangfala, be mi traem blong no talem long olgeta ol samting we oli save talemaot long narafala, nao i save spolem filing blong mi.” Taswe, taem yu stap lukaot wan blong givhan long yu, i impoten blong faenem wan we hem i luksave se ‘bisnes ya we i no blong tokbaot, hem i no mas tokbaot bakegen.’ (Ol Proveb 25:9) Ating wan we i olsemia, hem i olfala moa long yu.

Ale, sipos wan samting i mekem se yu yu no save faenem wan long haos we i glad blong lesin long yu, yu save toktok long wan fren. Be meksua se hem i laef longtaem lelebet we i save samting long saed blong laef, mo hem i gat save long ol rul blong Baebol tu. Long kampani blong ol Witnes blong Jeova, i gat ol man olsem. Liliana we i gat 16 yia blong hem i se: “Mi mi bin talemaot ol trabol blong mi long sam Kristin sista blong mi, mo oli bin givhan gud long mi. Olgeta oli olfala moa long mi, taswe advaes blong olgeta i gud. Oli kam olsem ol gudfala fren blong mi.”

?Olsem wanem sipos tingting we i foldaon i mekem yu yu kam slak long saed blong bilif? Maet yu no moa prea plante mo ridim Baebol. Long Jemes 5:14, 15, Baebol i givim advaes ya: “?I gat wan long yufala we i sik? I gud hem i singaot ol elda blong [“kongregesen,” NW ] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong Masta blong yumi. Mo prea blong man we i bilif bambae i hilim sikman ya. Masta blong yumi bambae i mekem . . . hem i strong bakegen.” I gat ol elda blong ol Witnes blong Jeova long ples blong yu. Olgeta ya, oli bin givhan long plante man finis we tingting blong olgeta i foldaon no oli slak long saed blong bilif. Yu no mas fraet blong toktok wetem olgeta. Baebol i talem se ol man olsem oli save kam “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.”—Aesea 32:2.

“I Gud Yufala i Prea Long God From Evri Samting”

Beswan man blong halpem yumi, hemia “God we i stamba blong fasin blong givhan.” (2 Korin 1:3) Taem yu harem nogud mo tingting i foldaon, folem advaes blong Filipae 4:6, 7: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” Oltaem Jeova i rere blong lesin long yu. (Ol Sam 46:1; 77:1) Sam samtaem, i nidim nomo we yu prea blong mekem tingting blong yu i kam kwaet.

Sipos sam samtaem yu harem nogud no tingting i foldaon, yu mas tingbaot se plante narafala yangfala oli bin gat semfala filing ya. Bambae ol filing ya oli save lus. Be go kasem taem ya, yu no mas holem ol trabol ya i stap blong yu wan nomo. Talemaot long narafala se yu stap harem nogud. Ol Proveb 12:25 i talem se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.” ?Olsem wanem blong kasem “gudfala tok” ya we bambae i leftemap tingting? Yu mas talemaot filing blong yu long narafala, wan we i laef longtaem lelebet finis, i gat save, i gat waes blong God we i save givhan long yu mo leftemap tingting blong yu olsem yu nidim.

[Futnot]

[Tok blong makem poen pija long pej 14]

“Taem mi toktok wetem papa mama blong mi, tufala i leftemap tingting blong mi mo givim ol advaes we i stret long ol trabol blong mi”

[Tok blong pija long pej 15]

Blong kasem gudfala advaes, i moagud blong go luk papa mama blong yu we tufala i onagud long God, i bitim ol fren blong yu