Sam Nius Blong Wol
Plante Tumas Disasta Long Yia 2000
Long yia 2000, i gat moa disasta long wol i bitim eni yia bifo. Hemia ripot blong wan kampani blong insurens, nem blong hem, Munich Re. Oli kasem nius blong bitim 850 disasta we oli kilim i ded 10,000 man mo spolem ol samting we praes blong hem i bitim 3,000 bilian vatu. Nating se i gat moa disasta long yia 2000, be wan yia bifo, moa man oli ded mo moa mane i lus long ol disasta. Kampani ya i talem se bighaf blong ol disasta long yia 2000 oli kamaot long ol ples we i no gat plante man. Bighaf (73 pesen) blong ol mane we ol kampani blong insurens oli pemaot, i kavremap ol samting we i lus long hariken, mo smol haf (23 pesen) i kavremap ol samting we i lus taem bigfala wota i ron. Ripot i talem se “ol samting we i lus long ol disasta oli mas kam antap long fiuja,” from we i gat plante moa man long wol naoia, mo tu, praes blong graon i stap kam antap.
Mekemap Prapa Skul Blong Yu
Plante moa man long Franis oli no moa joen long wan skul. Wan niuspepa blong Katolik (La Vie) i talemaot samting ya afta we oli mekem wan stadi long saed ya. Oli givim wan lis long ol man we i talemaot 14 samting we maet oli impoten long tingting blong olgeta. Smol nomo (7 pesen) oli jusum “ol samting long saed blong bilif” olsem samting we i impoten. Bighaf oli jusum ol narafala samting, olsem spel, wan gudfala wok, fasin fri, kastom, seks, mane. Tufala man ya, Pierre Bréchon mo Gérard Mermet, tufala i stadi long fasin blong ol man blong joen wanples. Tufala i talem se ol man wanwan oli stap mekem skul i laenap wetem prapa laef blong olgeta. ?Oli mekem samting ya olsem wanem? Bréchon i talem se, oli “joejoenem” ol defdefren bilif, we olgeta nomo oli jusum “se oli stret long prapa fasin blong laef mo tingting blong olgeta.”
Ol Sugabag Oli Savegud Rod Blong Olgeta
Plante man oli savegud fasin blong ol sugabag, se oli waes blong faenem rod blong go long ol flaoa mo kambak long haos blong olgeta. Be ol sugabag blong Assam long not India oli spesel. !Oli save flae i go plante handred kilometa, mo biaen oli naf blong faenem bakegen semfala tri, mo semfala han blong tri ya, we ol famle blong olgeta oli bin mekem haos long hem tu yia bifo! Yumi sapraes moa long fasin ya taem yumi save se ol sugabag we oli wokman oli laef tri manis nomo no maet i no kasem tri manis. Taswe, ol sugabag we oli gobak oli ol smol bubu nomo blong ol sugabag we oli bin bildim haos blong olgeta fastaem long ol tri ya. Ol man oli no save olsem wanem oli faenem stret rod blong gobak. Niuspepa ya, The Sydney Morning Herald i talem se, maet oli harem smel blong stret rod blong olgeta. Wan narafala tingting se maet sugabag we i kwin i laef i stap yet, mo maet hem i mekem wan spesel danis blong soemaot long ol sugabag we oli go lukaot kakae, wanem rod we oli mas flae long hem.
Fasin Blong Toktok Mo Bren
Buk ya Science News i talem se, taem ol man oli toktok no lesin long narafala, oli yusum tu haf blong bren. Ol man we sora blong olgeta i fas oli yusum tufala haf ya tu blong toktok wetem han blong olgeta. Buk ya i talem se, ol foto we man i tekem long bren oli soem se “taem olgeta we sora i fas oli stat toktok wetem han blong olgeta, wantaem nomo, tufala ples ya long bren oli stat wok.” Laura-Ann Petitto we i wok blong McGill Yunivesiti long Montreal i lidim stadi ya. Hem i talem se ol save ya i soemaot se tufala haf ya blong bren oli bos long “ol stamba samting we i lidim yumi blong toktok wetem maot no wetem han blong yumi.” Save ya i makem tu se oli nidim blong stadi moa long fasin blong bren blong faenem rod blong givhan long yumi blong toktok. Science News i talem se: “Tufala haf blong bren we oli givhan long man blong toktok wetem maot no wetem han, oli mekem plante wok we oli sem mak nomo.”
Oli Talem Se Salem Bodi i Oraet Nomo
Niuspepa ya Frankfurter Allgemeine Zeitung, i tokbaot wan kot long Jemani we i talem se fasin ya we woman i salem bodi blong hem i “no rili rong,” sipos i no gat man i fosem hem blong mekem. Kot blong Berlin i tekem disisen se wan ples blong dring kofe long Berlin-Wilmersdorf i save gohed blong mekem bisnes, nating se ol woman blong rod oli yusum ples ya blong mitim ol man we oli slip wetem, mo oli rentem ol rum klosap. Ol jaj oli talem se disisen ya i soemaot se tingting blong ol man i stap jenis long saed blong ol woman blong rod. Samfala oli askem kwestin long 1,002 man, mo bitim stret haf (62 pesen) blong olgeta oli ting se ol woman blong rod oli olsem ol narafala wokman nomo we oli mekem wok blong olgeta. Ol jaj ya oli talem se taem samfala oli askem kwestin bakegen long plante man, bighaf blong olgeta oli ting se longtaem finis, “ol wok long saed blong seks i bin givhan [long Jemani] long saed blong mane.”
Slip Mo Fasin Blong Rimemba
Niuspepa blong London (The Independent) i tokbaot sam stadi we oli mekem long saed blong slip. Oli faenemaot se “blong rimemba ol samting long ol wik we oli kam,” man i mas slip blong plante aoa evri naet, i nogud we hem i stap wekap go kasem medel naet oltaem. Tija Robert Stickgold blong Skul blong Meresin long Harvard, i mekem tes long 24 man. Fastaem oli tijim olgeta long wan samting, nao long naet ya, 12 i slip blong plante aoa. Be ol 12 narafala oli wekap blong fulnaet. Long tufala naet biaen, olgeta evriwan oli slip gud, hemia blong givhan long 12 we oli no slip blong oli kasembak slip we oli mestem. Nao oli mekem wan tes blong luk sipos oli rimemba ol samting we oli bin lanem. Olgeta we oli bin slip long faswan naet, “evriwan oli moagud long fasin blong rimemba i bitim olgeta we oli no bin slip. Olgeta ya oli no save rimemba gud, nating se oli bin slip gud tu naet biaen blong traem kasem bak slip we oli mestem.” I luk olsem se slip i givhan long yumi blong makem ol samting i stap strong long tingting blong yumi. Taswe, man we i mestem slip blong hem from we i stap wekap blong stadi, bambae i no kasem gudfala samting from. Hemia i tru moa sipos hem i mestem ol aoa eli long naet, no slip we oli kolem “slo-wef.”
Loa i Agri Se Man i Kilim Hem Wan i Ded
Niuspepa blong Rotterdam (NRC Handelsblad) i talem se long Eprel las yia, Netalan i kam faswan kantri blong putumap wan loa we i letem dokta i givhan long man blong i kilim hem wan i ded. I gat 46 man long Senat blong Netalan we oli agri long loa ya, mo 28 we oli no agri. Loa ya i talem se ol dokta oli save givhan long sikman we i no moa save kamgud bakegen, no we i “safa” tumas, blong i finisim laef blong hem. Ol man blong putumap ol loa long Netalan oli talem se blong gat raet blong mekem olsem, oli mas folem sam rul: Sikman i mas talemaot se hem i wantem. Sikman mo dokta tufala i mas agri se i no gat narafala rod blong winim trabol ya. Wan narafala dokta we i no stret dokta blong sikman i mas jekem hem. Mo dokta i mas finisim laef blong sikman long fasin we i stret long tingting blong ol dokta mo hospital.
Fasin Blong Man Mo Woman Blong Lesin i Defdefren
Discovery.com News i talem se ol man blong stadi oli faenemaot se ol woman oli yusum tufala saed blong bren blong olgeta blong lesin, be ol man oli yusum wan saed nomo. Oli tekem foto blong bren blong 20 man mo 20 woman we oli stap lesin long kaset blong wan man we i ridim buk. Ol foto oli soem se ol man oli lesin moa wetem lef saed bren blong olgeta, hemia haf blong bren we i givhan long yumi blong lesin mo toktok. Be ol woman, oli yusum tufala saed blong bren. Dokta Joseph T. Lurito, we hem i givhan long wan tija long Yunivesiti Skul blong Meresin long Indiana i talem se: “Stadi we mifala i mekem i soemaot se bren blong man i defren long bren blong woman long fasin blong hem blong givhan long olgeta blong lesin. Be hemia i no minim se fasin blong wan blong lesin i moa gud i winim narawan.” Dokta Lurito i talem se, sam narafala stadi we oli mekem oli soemaot se ol woman “oli naf blong lesin long tu storian wantaem.”
Ol Envlop We Yumi Save Luk Tru Long Olgeta
Magasin ya, New Scientist i talem se wan kampani long Amerika i wokem wan sprei we i mekem se man i save luk tru long “ol envlop we oli no open.” Wan man blong kampani ya, Bob Schlagel, i talem se sprei ya i wok long enikaen kala, “i no denja klosap long lektrik, i no posen, mo i no spolem win no wota blong wol.” Schlagel i talem se, hemia nomo se smel blong sprei ya i stap blong 10 no 15 menet. “Sprei i no mekem ing long envlop no leta i ron olbaot, i no putum wan mak long leta, yumi no save luk wan samting we i defren.” Oli wokem sprei ya blong givhan long ol polis, blong oli save faenem ol bom mo ol narafala samting we oli denja, we samfala oli sanem insaed long ol leta. Be, ol man oli save yusum sprei ya blong ridim leta blong narafala tu. Taswe, wan bigman we i wok long saed blong raet blong ol man i talem se maet kwestin i stap se i rili stret blong yusum sprei ya no nogat.
Ol Narakaen Denja Blong Chernobyl
Niuspepa blong London (The Independent) i talem se: “Afta we niuklia enjin i bosta long taon ya Chernobyl long Yukren, ol flaoa we oli planem klosap long enjin ya oli sik bigwan, i 6 taem antap long enikaen sik we ol narafala flaoa oli gat.” Ol man blong stadi long bisnes ya we oli blong Swiselan, Briten, mo Yukren, oli planem sid blong wit long tu garen. Graon blong wan garen i gat posen blong niuklia long hem, be graon blong narawan we i stap 30 kilometa longwe, i gud nomo. Nao taem ol garen ya oli givim kakae, oli planem sid ya bakegen long semfala tufala garen ya. Wit long garen we i stap klosap long enjin blong niuklia i narakaen, nating se smol posen blong niuklia nomo i kasem hem. Taswe, ol sayentis oli givim woning se yumi no save yet wanem trabol bambae i kasem ol samting we i stap klosap long posen blong niuklia. Ol save ya i mekem ol man oli wari long fiuja blong ol flaoa, anamol, mo ol man, we oli bin kasem posen blong niuklia long Chernobyl.