Baebol i Talem Wanem
?‘Hed Blong Famle’ i Minim Wanem?
BAEBOL i talem se “man, hem i hed blong woman blong hem.” (1 Korin 11:3; Efesas 5:23) Be plante man we oli talem se oli bilif long Baebol, oli ting se rul ya i blong bifo nomo, mo tu, oli ting se i denja blong folem rul ya. Wan man wetem woman blong hem, tufala i talem olsem: “Sipos man i bitim mak blong folem tijing ya se woman i mas ‘glad blong obei’ [long hem], samting ya i save lidim hem blong spolemgud woman ya, long saed blong bodi mo filing tu.” Sore tumas, fulap man long evri ples oli yusum paoa blong olgeta olsem hed blong famle, long fasin we i nogud. Wan man blong raetem buk i talem se: “Long plante kantri, ol man oli ting nating long fasin blong kilim woman blong olgeta. Ol singsing, ol waes tok blong ol kantri ya, mo ol seremoni blong mared, oli leftemap fasin ya olsem wan samting we man i gat raet blong mekem.”
Samfala oli talem se rul blong Baebol we man i hed blong famle, hem nao i mekem se ol raf fasin ya oli kamaot. ?Be olsem wanem? ?Tijing ya blong Baebol i rili daonem ol woman? ?Tijing ya i pulum ol man blong kilim woman blong olgeta? ?Tok ya ‘hed blong famle’ i minim wanem?a
Hed i No Minim Bos Strong
Baebol i soem se plan ya we man i hed blong woman, i stanap long lav, mo i no minim se man i mekem bigfala bos long woman blong hem. Tingbaot se fasin blong no respektem God olsem hed fastaem, hemia nao samting we i mekem se plante man oli bos strong long woman blong olgeta mo oli kilim olgeta. (Jenesis 3:16) Stat long garen blong Iden, plante man oli bin yusum paoa blong olgeta long rong fasin. Oli mekem ol raf fasin blong spolem narafala, antap moa, ol woman mo ol pikinini.
Hemia i no laenap nating wetem faswan tingting blong God. Jeova i no laekem nating ol man we oli yusum paoa blong olgeta long nogud fasin. Hem i tok agens long ol man Isrel we oli “stap mekem i no stret” long woman blong olgeta. (Malakae 2:13-16, NW ) Mo tu, God i talem se “hem i no laekem nating olgeta we oli laekem tumas blong mekem faet.” (Ol Sam 11:5) Taswe ol man we oli kilim woman blong olgeta, no we oli mekem i nogud long olgeta long narafala rod, oli no save talem se tok blong Baebol nao i pulum olgeta blong mekem ol fasin ya.
?Long Wanem Fasin Man i Mas Hed Long Famle?
Blong mekem se i gat oda long heven mo wol, God i putumap plan ya se samfala bambae oli hed long ol narafala. Yumi evriwan i stap aninit long narafala, God nomo i no gat wan man antap long hem. Ol man oli mas obei long Kraes, ol pikinini oli mas obei long papa mama blong olgeta, mo ol Kristin oli mas obei long gavman. Jisas tu i mas obei long God.—Rom 13:1; 1 Korin 11:3; 15:28; Efesas 6:1.
Blong mekem se i gat oda long wol mo se laef blong ol man i no olbaot, i mas gat fasin ya we yumi stap aninit long sam narafala man. Sem mak insaed long famle. Ol memba blong famle oli mas obei long hed blong olgeta nao famle i save stanap strong, i save hapi, mo i gat pis. Samting ya i sem mak tu sipos i no gat wan hasban no papa long famle. Long ol famle olsem, mama nao i hed. Sipos i no gat papa mama tugeta, fasbon pikinini no wan narafala famle i mas mekem wok ya blong hed blong famle. Nating se i olsem wanem, famle i haremgud moa taem ol memba blong hem oli soem respek long hed blong olgeta.
Taswe i impoten blong kasem save long mining blong rul ya long saed blong hed blong famle, mo blong lanem blong mekemgud wok ya. I nogud blong sakemaot rul ya. Aposol Pol i talem long ol Kristin hasban se oli mas hed blong famle blong olgeta “olsem we Kraes i hed blong [kongregesen].” (Efesas 5:21-23) Taswe Pol i stap talem se fasin we Kraes i mekem blong hed long kongregesen, hemia nao fasin we i stretgud blong folem long famle. ?Ale Kraes i soem wanem eksampol?
God hem wan i givim haenem blong Mesaea mo King long Jisas. Mo tu, Jisas i gat moa save mo ekspiriens long laef, i bitim ol disaepol blong hem. Nating se i olsem, hem i soem lav, hem i kaen, mo i gat sore long olgeta. Hem i neva raf, strong tumas, mo i neva askem olgeta blong mekem samting we oli no naf blong mekem. Hem i no bos strong long olgeta, mo hem i no stap talem long olgeta oltaem se hem i hae moa long olgeta from we hem i Pikinini blong God. Nogat. Jisas i gat tingting daon, hem i wan kwaet man. From samting ya, ‘yok we hem i putum long olgeta, wok blong hem i isi nomo.’ (Matiu 11:28-30) Taswe, ol disaepol oli no fraet blong toktok wetem hem, mo hem i save lesin tu long tingting mo advaes blong olgeta. Yes, Pol i talem se Jisas i lavem tumas kongregesen, taswe “hem i letem laef blong hem, blong sevem” olgeta.—Efesas 5:25.
?Olsem Wanem Blong Folem Eksampol Blong Jisas?
?Olsem wanem ol hed blong famle oli save folem fasin blong Kraes? Wan gudfala hed i wantem we famle blong hem i haremgud long saed blong bodi mo spirit. Hem i livim samting we hem wan i wantem, nao i yusum taem ya blong givim samting we famle blong hem i nidim mo we wanwan memba blong famle i nidim. Hem i tingbaot woman blong hem mo ol pikinini blong hem fastaem, mo i tingbaot hem wan biaen.b (1 Korin 10:24; Filipae 2:4) Woman mo ol pikinini oli glad blong respektem mo givhangud long papa blong olgeta, taem oli luk we hem i folem ol rul mo tijing blong Baebol long laef blong hem. Aninit long hed blong olgeta we i gat bigfala lav, oli save joen tugeta blong fesem ol trabol blong laef. Taswe, sipos man i hed long fasin we i laenap wetem Baebol, hem i stap mekem wan hapi famle we i presem mo givim ona long God.
Hed blong famle we i waes, hem i gat tingting daon. Taem hem i mestem, maet i had long hem blong talemaot se hem i rong. Nating se i olsem, hem i rere blong talem sore long narafala. Baebol i talem se sipos i gat “plante man blong givim gudfala advaes,” janis blong win i bigwan moa. (Ol Proveb 24:6) Mo tu, tingting daon bambae i pulum hed blong famle blong lesin long woman blong hem mo ol pikinini blong hem, mo blong askem tingting blong olgeta, taem hem i luk se i stret blong mekem olsem. Kristin hed blong famle we i folem eksampol blong Jisas, bambae i meksua se hem i hed long fasin we i mekem famle blong hem i hapi, i harem se i sef, mo i leftemap nem blong Man ya we i stanemap famle fastaem, hemia Jeova God.—Efesas 3:14, 15.
[Futnot]
a Haf ya i tokbaot wok blong man no papa long famle, be ol advaes ya i save givhan tu long ol mama we oli no gat man blong olgeta mo ol pikinini we oli mas lukaot long ol smosmol brata sista blong olgeta from we papa mama tugeta i ded.
b Buk ya Spesel Rod Blong Mekem Famle i Hapi, we ol Witnes blong Jeova oli wokem, i givim plante gudfala advaes olsem wanem blong lukaot long famle wetem lav.
[Tok blong pija long pej 22]
Man we i gat kwaet fasin, hem i lesin long tingting blong woman blong hem mo ol pikinini blong hem