Stori 64
Solomon i Bildim Haos Blong God
BIFO we Deved i ded, hem i givim plan blong haos blong Jeova long Solomon, blong hem i save bildim haos ya. Long namba fo yia blong rul blong Solomon, hem i stat bildim haos ya, mo seven yia haf biaen, hem i finisim. I gat plante taosen man oli wok blong bildim haos blong God, mo oli spenem bigfala mane long hem. Hemia from we oli wokem plante haf blong hem long gol mo silva.
Haos ya i gat tu bigfala rum blong hem, olsem haos tapolen blong wosip bifo. Be tufala rum ya oli bigwan moa, oli dabolem saes blong tufala rum long haos tapolen. Solomon i karem bokis blong kontrak i go putum long rum we i stap insaed olgeta long haos blong God, mo ol narafala samting we i bin stap long haos tapolen, hem i putum long narafala rum.
Taem oli finisim haos blong God, oli mekem wan bigfala lafet. Solomon i nildaon long fored blong haos ya mo hem i prea, olsem yu luk long pija ya. Solomon i talem long Jeova se: ‘Heven i bigwan we i bigwan, be olgeta ples long hem i no naf long yu. Haos ya we mi wokem blong yu i smol we i smol, i no naf nating long yu. Be sipos ol man blong yu oli lukluk i kam long ples ya mo oli prea, plis yu harem prea blong olgeta.’
Taem Solomon i finisim prea blong hem, faea i kamaot long heven, i kamdaon, i bonem ol anamol we oli bin kilim olsem sakrefaes. Mo Jeova i mekem laet i kam fulap insaed long haos blong hem, i saen we i saen. Laet ya i soemaot se Jeova i stap lesin mo se hem i glad long haos we oli bildim mo long prea blong Solomon. Ale naoia, ol man oli no moa mekem wosip long haos tapolen, be oli kam long haos blong God blong mekem wosip.
Solomon i gohed longtaem blong rul long waes fasin, mo ol man oli haremgud tumas. Be biaen, hem i tekem plante woman blong ol narafala kantri we oli no mekem wosip long Jeova, oli kam ol woman blong hem. ?Yu luk wan long ol woman ya long pija ya? Hem i stap bodaon long wan aedol. Sloslo, ol woman ya oli pulum Solomon, blong hem tu i wosip long ol narafala god. ?Yu save wanem i hapen taem Solomon i mekem olsemia? Hem i no moa soem kaen fasin long ol man. Hem i mekem i strong tumas long olgeta, nao ol man oli no moa haremgud.
Taem Jeova i luk samting ya, hem i kros we i kros long Solomon, nao hem i talem long hem se: ‘Bambae mi tekemaot raet long yu blong yu no moa rul long ol man ya, nao bambae mi givim long wan narafala man. Be bambae mi no save mekem samting ya naoia, we yu yu stap laef yet. Bambae mi mekem long taem we pikinini blong yu i kam king. Be bambae mi no tekemaot olgeta laen blong Isrel evriwan.’ Bambae yumi luk olsem wanem samting ya i hapen.
1 Kronikel 28:9-21; 29:1-9; 1 King 5:1-18; 2 Kronikel 6:12-42; 7:1-5; 1 King 11:9-13.