Japta 129

Sam Moa Disaepol Oli Luk Hem

OL DISAEPOL oli stap harem nogud yet. Olgeta oli no kasem save from wanem gref i emti. Mo oli no bilivim ol store blong ol woman. Ale long sem dei nomo, hemia Sande, Kleopas mo wan narafala disaepol, tufala i aot long Jerusalem, tufala i stap wokbaot blong go long velej ya Emeas, samwe long leven kilomita long Jerusalem.

Tufala i wokbaot, i store long olgeta samting we i kamaot long dei ya. Nao wan man i kam kolosap long tufala, i wokbaot wetem tufala. Hem i askem long tufala, i se: “?Wanem samting ya we yutufala i stap store long hem, taem yutufala i stap wokbaot i go?”

Wantaem nomo, tufala i stop, i stanap long rod. Fes blong tufala i strong. Nao Kleopas i ansa long hem, i se: “?Ating yu yu wan strenja nomo we yu stap long Jerusalem, be yu no save ol samting ya we i kamaot long tri fo dei ya we i jes pas.” Man ya i talem se: “?Wanem ol samting ya?”

Tufala i ansa long hem se: “Ol samting ya blong Jisas, man Nasaret ya. . . . Ol jif pris mo ol lida blong yumi oli putum hem long han blong ol man Rom blong oli jajem hem se i mas ded. Mo olgeta ya oli nilim hem long [pos] blong kilim hem i ded. Be mifala i bin putum tingting blong mifala i stap strong long hem se hem bambae i save mekem yumi man Isrel yumi fri.”

Nao Kleopas mo fren blong hem tufala i eksplenem ol samting we i kamaot long dei ya. Tufala i talemaot we samfala oli bin luk tufala enjel mo gref we i emti nomo. Be tufala i talem long hem se tufala i no save mining blong ol samting ya. Strenja ya i tok long tufala, i se: “Man, yutufala i no gat hed ya. Yutufala i tektaem tumas blong bilif long ol tok blong ol profet. ?Yutufala i ting se God i no bin makemaot bifo, se ol man oli mas mekem Mesaea i harem nogud long bodi blong hem, blong biaen bambae hem i save go tekem hae nem blong hem long heven?” Nao man ya i storeyan long mining blong sam tok we oli bin raetem long Baebol bifo, blong talemaot Kraes ya.

Nao trifala i kam kolosap long velej ya Emeas. Mo strenja ya i mekem olsem we bambae hem i livim tufala, i wokbaot i go. Be tufala disaepol ya i wantem harem moa. Ale tufala i blokem hem, i se: “No, i gud yu stap wetem mitufala. Naoia i let finis ya. Bambae i no longtaem san i godaon.” Ale hem i go insaed, i sidaon blong kakae wetem tufala. Nao hem i talem tangkyu long God, i brekem bred, i givim long tufala. Nao tufala i luksave se man ya i rili Jisas we i tekem gyaman bodi we i olsem bodi blong man. Nao hem i lus, tufala i no moa luk hem.

!Nao tufala i kasem save from wanem strenja ya i save plante samting! Nao tufala i stap talem long tufala se: “Man, taem hem i stap tok long yumitufala long rod, i stap talemaot ol tok ya blong Baebol, tok blong hem i nambawan, i mekem yumi harem i gud tumas.” Nao wantaem nomo, tufala i girap, tufala i aot long ples ya, tufala i gobak olwe long Jerusalem. Long ples ya, tufala i faenem ol aposol blong Jisas mo sam man bakegen, oli stap wanples finis. Be Kleopas mo fren blong hem oli no save talem store blong tufala. Ol narafala oli tok fastaem, oli se: “I tru ya. Masta blong yumi i laef bakegen long ded. Saemon ya i luk hem finis.” Nao tufala tu i storeyan olsem wanem Jisas i kamtru long tufala. Hemia namba fo taem long dei ya we sam disaepol blong Jisas oli luk hem.

Nao wantaem nomo Jisas i kamtru bakegen, hemia namba faef taem. Ol disaepol oli stap wanples, insaed long wan haos. Mo oli lokem doa blong haos ya, from we oli fraet long ol lida blong ol man Isrel. Be Jisas i kamtru insaed, i kam stanap long medel blong olgeta. Hem i talem se: “Pis i stap wetem yufala.” Olgeta oli fraet tumas, oli ting se oli stap luk wan speret. Blong soemaot we i no tru, Jisas i talem se: “?From wanem tingting blong yufala i kam nogud olsem? ?From wanem tingting blong yufala i no strong blong bilif long mi? Yufala i luk han blong mi mo leg blong mi, nao yufala i luksave se mi nomo ya. Yufala i pusum han blong yufala, yufala i tajem mi, nao bambae yufala i haremsave. [Wan speret] i no gat mit mo bun blong hem, olsem we yufala i save luk we mi mi gat.” Hem i talem tok ya, be olgeta oli no save bilif gud yet.

Blong soemaot long olgeta se hem i Jisas tru, hem i askem long olgeta, i se: “?Yufala i gat sam kakae i stap long ples ya?” Ale, olgeta oli givim fis long hem we i kuk finis, nao hem i kakae. Nao hem i talem se: “Ol samting ya oli soemaot mining blong ol tok ya we mi stap talem long yufala, taem we mi stap wetem yufala yet [taem mi no ded yet]. Bifo mi mi stap talem se olgeta samting we oli bin raetem long buk blong Moses, mo long ol tok blong ol profet mo long Ol Sam, blong talem mi, bambae oli mas kamtru.”

I olsem we Jisas i stap mekem wan Baebol stadi long olgeta. Nao hem i tijim olgeta moa, i se: “Hemia tok we i stap long Baebol. Bambae ol man oli mekem Mesaea i harem nogud long bodi blong hem, gogo i ded. Mo long namba tri dei blong hem, bambae hem i laef bakegen. Mo long nem blong Mesaea ya, bambae ol man oli mas talemaot tok ya se man i mas tanem tingting blong hem from sin blong hem, nao bambae God i fogivim hem. Tok ya i mas go long olgeta man, i stat long Jerusalem ya, gogo i finisim wol. Yufala i luk ol samting ya, mo yufala i save talemaot stret tok blong hem.”

Long Sande aftenun ya, Tomas i no stap long impoten miting ya, be yumi no save from wanem. Long ol dei biaen, ol narafala disaepol oli glad tumas, oli talem long hem se: “Mifala i luk Masta blong yumi.”

Be Tomas i blokem tok blong olgeta, i se: “Sipos mi luk ol hol blong nil long han blong hem, mo mi putum fingga blong mi i go long ol hol ya, mo mi pusum han blong mi i go insaed long saed blong hem, bambae mi save bilif long hem. !Be sipos no, no gat!”

Eit dei i pas, nao ol disaepol oli stap wanples bakegen long wan haos, mo Tomas tu i stap wetem olgeta. Oli lokem doa finis, be wan moa taem bakegen Jisas i kam stanap long medel blong olgeta, i talem se: “Pis i stap wetem yufala.” Nao hem i tanem hem, i lukluk Tomas, mo i talem long hem se: “Yu luk, hemia han blong mi. Yu kam putum fingga blong yu long ples ya. Yu stretem han blong yu, yu kam pusum i go insaed long saed blong mi. Bambae yu no moa hafhaf long bilif blong yu, yu bilif long mi nao.”

Tomas i ansa long hem, i se: “!Masta blong mi, mo God blong mi!” (NW)

Nao Jisas i askem se: “?Yu yu bilif long mi from we yu luk mi nomo? Be olgeta ya we oli no luk mi, be oli bilif long mi, bambae oli save harem gud.” (NW) Luk 24:11, 13-48; Jon 20:19-29.

▪ ?Long rod we i go long Emeas, wan strenja i askem wanem long tu disaepol?

▪ ?Strenja ya i talem wanem long tufala we i mekem tufala i harem gud tumas?

▪ ?Olsem wanem tufala disaepol ya i luksave strenja ya?

▪ ?Taem Kleopas mo fren blong hem tufala i gobak long Jerusalem, tufala i harem wanem gudfala store?

▪ ?Olsem wanem Jisas i kamtru long ol disaepol blong hem long namba faef taem? ?Wanem i kamaot long taem ya?

▪ ?Eit dei biaen we Jisas i kamtru long namba faef taem ya, wanem i hapen? ?Wanem i mekem Tomas i bilif se Jisas i laef bakegen?