Paradaes Long Wol

Jehova bambae i stretem ol nogud samting we Setan i bin mekem. Jehova i putumap Jisas finis olsem King, blong rul long olgeta ples long wol. Aninit long rul blong hem, fulwol bambae i kam wan paradaes.—Daniel 7:13, 14; Luk 23:43.

Jehova i promes blong mekem ol samting ya:

• I GAT PLANTE KAKAE: “God i God blong yumi, mo hem i stap blesem yumi, i mekem we graon ya blong yumi i givim plante kakae long yumi.” “Yu mekem we bambae i gat plante kakae long ples ya, we bambae ol hil oli fulap gud long hem.”—Ol Sam 67:6; 72:16.

• I NO MOA GAT FAET: “Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:8, 9.

• I NO MOA GAT OL NOGUD MAN: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta . . . Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta.”—Ol Sam 37:9, 10.

• 

  I NO MOA GAT SIK, SORE, MO DED: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from. Long draeples, ol springwota bambae oli kamkamaot, nao i mekem we bambae i gat ol reva oli stap ron long hem.”—Aesea 35:5, 6.

  “God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

Fasin blong Jehova i defren long fasin blong Setan wetem ol rabis enjel blong hem. Jehova i no save giaman. Olgeta promes blong hem oli mas kamtru. (Luk 1:36, 37) Jehova i lavem yu mo hem i wantem se yu laef long Paradaes ya, we bambae hem i mekem. Taswe, i gud we yu luk ol Witnes blong Jehova blong oli givhan long yu, blong lanem ol nambawan trutok we oli stap long Baebol. Sipos yu mekem trutok ya i wok long laef blong yu, bambae yu yu fri long ol giaman tijing mo kastom, bambae yu no moa stap long tudak. Mo tu long fiuja, bambae yu fri long sin mo ded. Olsem Jisas i talem: “Bambae yufala i save trutok, mo trutok ya bambae i mekem yufala i fri man.”—Jon 8:32.