Lesen 5

Ol Fren Blong God Bambae Oli Laef Long Paradaes

Paradaes bambae i defren olgeta long wol ya we yumi laef long hem naoia. God i neva wantem se wol i fulap wetem trabol, fasin sore, soa, mo safa. Long fiuja, God bambae i mekem wol i kam wan paradaes. ?Paradaes bambae i olsem wanem? I gud yumi luk wanem we Baebol i talem:

Ol gudfala man. Paradaes bambae i wan hom blong olgeta fren blong God. Bambae oli stap mekem i gud long olgeta. Bambae oli laef folem ol stretfala rod blong God.—Ol Proveb 2:21.

Plante kakae. Long Paradaes, bambae i no gat man i hanggri. Baebol i talem se: “Bambae i gat plante kakae long ples ya.”—Ol Sam 72:16.

Ol nambawan haos mo wok we man i glad blong mekem. Long Paradaes long wol ya, evri famle bambae i gat wan haos we i blong olgeta. Evriwan bambae i mekem wok we i karem trufala glad.—Aesea 65:21-23.

Pis long ful wol. Ol man bambae oli no moa faet mo ded from ol faet. Tok blong God i talem se: “[God] i stap mekem ol faet i finis.”—Ol Sam 46:8, 9.

Gudfala helt. Baebol i promes se: “Bambae i no moa gat man olbaot long kantri ya [long Paradaes] we i save talem se hem i sik.” (Aesea 33:24) Mo tu, bambae i no moa gat man we leg blong hem i nogud, bambae i no moa gat blaen man no man we sora blong hem i fas, no man we i no save toktok.—Aesea 35:5, 6.

Soa, sore, mo ded, bambae oli no moa stap. Tok blong God i talem se: “Bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

Ol nogud man bambae oli lus. Jeova i promes se: “Ol man nogud . . . bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”—Ol Proveb 2:22.

Ol man bambae oli lavem mo respektem olgeta. Bambae i no moa gat man we i mekem i no stret long narafala. Bambae i no moa gat man we i yusum paoa blong hem blong bos strong long narafala man. Bambae i no moa gat man we i griri, no man we i no laekem nating narafala man. Olgeta man bambae oli joengud mo bambae oli laef gud folem ol stretfala rod blong God.—Aesea 26:9.