Kingdom We i Olsem Bigfala Tri

Wan naet, Nebukadnesa i luk wan drim we i mekem hem i fraet. Hem i singaot ol waes man blong oli talemaot mining blong drim ya. Be i no gat wan long olgeta we i save. Nao king i singaot Daniel.

Nebukadnesa i talem drim long Daniel i se: ‘Mi luk wan bigfala tri we i longfala, i kasem skae antap, mo olgeta man long wol oli save luk hem. Ol lif blong hem oli grin gud, mo ol frut blong hem i plante we plante. Ol animol oli stap spel long sed blong hem, mo ol pijin oli stap mekem nes blong olgeta long ol han blong hem. Afta, wan enjel i kamdaon mo i singaot se: ‘Yufala i katemdaon tri ya wetem ol han blong hem. Yufala i livim stamba mo ol rus blong hem i stap, mo yufala i fasem stamba ya wetem wan bigfala strap we oli wokem long aean mo kopa. Hat blong tri ya i no moa olsem hat blong man, be bae i jenis i kam hat blong animol, gogo seven taem i pas. Olgeta man oli mas save se God i Rula, mo i save givim kingdom ya long eni man we hem i wantem.’

Jehova i talemaot mining blong drim long Daniel. Taem Daniel i harem, hem i fraet we i fraet, i talem se: ‘O King, i gud sipos drim ya i i kamtru long ol enemi blong yu, be bigfala tri ya we oli katemdaon, hemia yu ya. Bae yu no moa rul long Kingdom blong yu. Bae yu go stap wetem ol wael animol mo yu kakae gras olsem buluk. Be from we stamba mo rus blong tri ya i stap, hemia i min se bae yu kam king bakegen.’

Wan yia biaen, Nebukadnesa i stap wokbaot antap long ruf blong haos blong hem, i stap lukluk taon ya Babilon, mo i tingbaot se i naes tumas. Hem i talem se: ‘!Maewad! Mi nao mi wokem naesfala taon ya. !Mi yes, mi gat paoa!’ Taem hem i stap toktok yet, wan voes i kamaot long heven i se: ‘!Nebukadnesa! Naoia yu lusum paoa mo kingdom blong yu.’

Wantaem nomo, hed blong Nebukadnesa i kam krangke, mo hem i kam olsem wan wael animol. Oli ronemaot hem long flas haos blong hem, mo i go stap long bus wetem ol wael animol. Hea blong hem i gru i kam longfala, olsem ol feta blong igel, mo ol selfingga blong hem oli kam longfala olsem blong ol pijin.

Afta we seven yia i pas, hed blong Nebukadnesa i kam gud, nao Jehova i mekem hem i kam king bakegen. Nao hem i talem se: ‘Mi mi presem Jehova we i King long heven. Naoia mi save se Jehova nomo i Rula. Hem i daonem ol man we oli flas, mo hem i givim kingdom i go long eni man we Hem i jusum.’