Raeting i Kamaot Long Wol

Biaen, Belsasa i kam king blong Babilon. Wan naet, hem i mekem wan bigfala lafet, mo i singaot wan taosen impoten man oli kam. Hem i talem long ol man blong hem blong oli go tekem ol kap we oli wokem long gol, we Nebukadnesa i bin tekemaot long haos blong Jehova. Belsasa mo ol impoten man ya oli yusum ol kap ya blong dring waen, mo oli presem ol god blong olgeta. Wantaem nomo, wan han blong man i kamaot, i stat blong raet long wol blong rum we oli stap mekem lafet long hem, be ol tok we hem i raetem oli narakaen.

Belsasa i fraet we i fraet, nao i singaot ol man blong mekem majik, mo i promes long olgeta se: ‘Man we i talemaot mining blong tok ya, bae mi putumap hem i kam namba tri haeman long Babilon.’ Be i no gat wan long olgeta we i save talemaot mining blong raeting ya. Nao kwin i kam talem se: ‘I gat wan man, nem blong hem Daniel, we bifo, hem i talem mining blong ol samting long Nebukadnesa. Hem nao i save talem mining blong ol tok ya.’

Daniel i kam luk Belsasa, nao king i talem se: ‘Sipos yu save ridim mo eksplenem raeting ya, bae mi givim wan gol jen long yu, mo putumap yu yu kam namba tri haeman long Babilon.’ Daniel i talem se: ‘Mi no wantem ol presen ya, be bae mi talem mining blong ol tok ya. Papa blong yu, Nebukadnesa, i flas tumas, nao Jehova i daonem flas blong hem. Yu save finis evri samting we i hapen long hem, be yu girap yu yusum ol kap blong haos blong God blong dring waen long olgeta. Yu no gat respek nating long Jehova. Taswe hem i raetem tok ya: Mene, Mene, Tekel, mo Parsin. Mining blong tok ya se ol ami blong Media mo Pesia bae oli winim Babilon, mo yu bae yu no moa king.’

Ol man oli ting se i no gat wan ami we i naf blong winim Babilon. Ol bigfala stonwol oli raonem taon ya, mo wan bigfala reva tu i raonem hem. Nating se i olsem, long sem naet ya nomo, ol ami blong Media mo Pesia oli kam agensem Babilon. King Saeras blong Pesia i blokem reva mo i mekem i ron long wan narafala rod. Nao ol soldia oli save krosem, mo oli go stret insaed long taon ya, from we long naet ya, ol bigfala get blong taon ya oli open nomo i stap. Saeras mo ol ami blong hem oli winim taon ya, oli kilim king i ded, nao Saeras i kam rula blong Babilon.

Bifo we wan yia i pas, Saeras i talem se: ‘Jehova i talem long mi blong mi wokem bakegen haos blong hem long Jerusalem. Ol man blong hem we oli wantem go mekem wok ya, oli save go.’ Ale, 70 yia afta we ol ami oli spolem Jerusalem, plante man Jiu oli gohom, olsem Jehova i promes finis. Saeras i sanembak ol gol mo silva kap mo ol narafala samting we Nebukadnesa i karemaot long haos blong God. ?Yu luk olsem wanem Jehova i yusum Saeras blong givhan long ol man blong hem?