Introdaksen

Buk ya Ol Vas Blong Givhan Long Kristin Laef bambae i mekem se i isi blong yu faenem ol vas mo ol stori long Baebol, we oli save givhan long yu blong winim ol defdefren samting we yu fesem long laef. Mo tu, bambae i givhan long yu blong faenem ol vas blong Baebol blong leftemap tingting blong ol narafala, mo halpem olgeta blong mekem ol desisen we i leftemap nem blong Jehova. Jusum topik we yu intres long hem mo go insaed blong ridim ol kwestin mo ol sot toktok we i eksplenem ol vas. (Yu luk bokis ya “?Olsem Wanem Blong Yusum Buk Ya?”) Bambae yu faenem plante gudfala vas blong Baebol we i save givim advaes long yu, lidim yu mo leftemap tingting blong yu. Mo tu, bambae yu faenem ol nambawan vas blong halpem ol narafala blong winim ol problem.

?Olsem Wanem Blong Yusum Buk Ya?

Blong faenem wan topik, yu save taepem topik ya long bokis blong lukaotem o yu save luk tru long ol defdefren seksen blong buk ya. Long buk ya Ol Vas Blong Givhan Long Kristin Laef, i gat seven seksen: Ol Jalens, Ol Aksen, Kongregesen, Evri Dei Laef, Famle, Wosip, mo Ol Fasin. Jusum wan long ol seksen ya, mo faenem topik we yu stap lukaotem. Be sipos yu no save se topik we yu intres long hem i stap long wanem seksen, go long Evri Topik mo luk tru long lis blong ol topik blong faenem hemia we yu wantem. Long wanwan topik i gat ol kwestin o toktok long blak raeting, mo aninit long olgeta i gat ol vas blong Baebol. Tingting dip long ol vas ya blong kasem save olsem wanem oli joen wetem kwestin o toktok ya. Long sam topik, i gat ol smol stamba tok we i save halpem yu blong faenem kwiktaem ol save we yu stap lukaotem. Samtaem oli ademap sam moa vas we oli putum se “Yu save luk,” blong givim sam moa save we i joen wetem topik ya. Plante taem i gat haf ya “Ol stori long Baebol,” mo aninit long hem i gat ol vas mo ol sot toktok blong eksplenem impoten poen long ol vas ya.

Buk ya i no tokbaot evri vas we i joen wetem wan topik. Be i wan gudfala tul we yu save yusum blong statem risej blong yu. (Pro 2:1-6) Blong faenemaot moa, jekem ol refrens long Baebol Long Niu Wol Translesen mo ol stadi not long wan lanwis we yu kasem save long hem. Sipos yu wantem stadi moa long wan vas, yu save go long haf ya “Ol Vas” long Buk Blong Mekem Risej. Long haf ya i gat plante refrens blong ol buk, be blong faenem ol niufala save, ridim ol refrens we oli kamaot i no longtaem.

Mifala i hop se Ol Vas Blong Givhan Long Kristin Laef bambae i halpem yu blong faenem plante waestok mo ol nambawan save we i stap long Baebol. Taem yu yusum buk ya, bambae yu luksave olsem wanem “Tok blong God i laef i stap mo paoa blong hem i stap wok.”—Hib 4:12.