!Trabol i Agensem Famle!
“FAMLE i wan samting we i olfala moa bitim ol narafala kastom. Mo long plante fasin, hem i impoten moa. Famle i stampa blong laef blong ol man. Plante laen blong ol man oli save stap yet kasem tede no oli save lus olgeta, i dipen sipos ol famle long ol laen ya oli joengud no oli no joengud.”
Buk ya, The World Book Encyclopedia i talem olsem long 1973. Be taem yumi skelem wetem tingting blong tede, ol tok ya oli gat mining we i mekem man i fraet, olsem wan nogud samting i save hapen. Long ol yia we oli bin pas i no longtaem i gat plante samting oli stat blong mekem trabol long famle laef. John Bradshaw, man blong givim advaes i raetem se: “I gat bigfala trabol long famle tede. . . . Namba blong ol divos i go antap, ol raf fasin blong ol yangfala, nogud fasin blong yusum drag, nogud fasin blong seks wetem famle, sik long saed blong kakae, mo fasin blong faet insaed long famle, ol samting ya oli soemaot se i gat wan samting i rong.”
Tru ya, yumi faenem se “i gat wan samting i rong” long olgeta famle long wol. Buk ya, The Unesco Courier i tokbaot fasin ya long Yurop se: “Stat long 1965, namba blong ol divos i gru bigwan long Yurop. . . . Namba blong ol papa no ol mama we oli no gat waef no hasban blong lukaot long famle i stap gru.” Ol pua kantri tu oli luk se trabol blong famle i stap kam antap. Hélène Tremblay, wan woman blong raetem ol buk i talem se: “Plante milyan man we bifo oli stap laef long ol sosaeti we oli stap gud oltaem, oli no wari long fyuja, laef i no jenis long plante handred yia we i pas, tede hem i defren hem i taem blong trabol.”
Bigfala trabol moa hemia we i stap kamaot insaed long plante famle tede. Long Amerika nomo, plante taosen pikinini oli gruap long famle we papa no mama oli man blong dring alkol. Mo tu fasin blong faet insaed long famle i stap gru. Long buk (Intimate Violence) blong tufala man blong stadi ya, Richard Gelles mo Murray Straus, tufala i ripotem se: “I luk olsem we man i save kilim yu, faetem yu, mo wan man we yu laekem i save kilim yu i ded long prapa haos blong yu nomo bitim eni narafala ples, no narafala man long ples we yumi laef long hem.”
Sipos laen blong ol man i rili stanap long paoa blong famle laef, i gat risen blong wari from fyuja blong ol man. Be, maet yu yu no wari tumas long fyuja blong man. Ating yu yu wari moa se ol trabol olsem oli save mekem wanem long famle blong yu. ?Wanem samting bambae i kamaot from? Maet yu save sapraes long ansa we i kamaot long Hemia we i hae moa.