?Hu i Bilif Long Ol Rabis Speret?

?YU YU bilif se ol speret man we yumi no save luk oli save gat paoa long laef blong yu? Maet plante man oli ansa stret se no gat. Nating we oli agri se God i stap, oli laf taem oli harem se i gat ol speret man we oli stap mekem ol rabis wok.

Ol tijing blong Krisendom oli mekem se plante man long Wes oli no bilif long ol speret man. Long plante handred yia, Krisendom i tijim se wol ya i stap stret long medel blong skae, i stap bitwin heven mo helfaea aninit long graon. Tijing ya i soemaot se ol enjel oli haremgud tumas long pis blong heven be ol devel oli stap lukaot long ol bisnes blong hel.

Taem ol samting we ol sayentis oli faenem i mekem se ol man oli sakemaot ol rong tingting long saed blong fasin we heven mo wol i stat, ol man oli no moa bilif long ol speret man. The New Encyclopædia Britannica i talem se: “Long ol yia 1500, bigfala jenis we Copernicus i stampa blong hem (jenis ya i stanap long ol tingting blong man ya blong Polan, Copernicus, we hem i wan man blong stadi long ol sta), i mekem se . . . oli no moa bilif se Wol ya i stap stret long medel blong skae, be hem i olsem wan long ol smol planet nomo we oli stap goraon long san, mo ol planet ya oli smosmol haf nomo blong wan galaksi,a mo galaksi ya i stap long bigfala skae we man i no save luk en blong hem​—⁠biaen i luk olsem se i no moa stret blong bilif se i gat ol enjel mo ol rabis enjel i stap.”

Nating se plante man oli no bilif long ol rabis speret, i gat plante milyan man we oli bilif. Bilif ya se sam enjel oli bin mekem sin i wan impoten haf blong plante skul, bifo mo naoia tu. Ol man oli tingbaot ol rabis enjel ya olsem ol man blong spolem ol samting long saed blong speret, be antap long wok ya, oli stampa blong ol disasta, olsem faet, kakae i sot, mo graon i seksek, mo tu oli stampa blong sik, harem nogud long tingting, mo ded.

Devel Setan, jif blong ol rabis speret long Kristin skul mo skul blong ol man Jyu, ol Muslim oli kolem hem se Iblis. Long skul blong Soroastrian long Pesia bifo, oli kolem hem se Angra Mainyu. Long Nostik skul,b we i kam strong long ol yia 100 mo 200 K.T., oli ting se hem i Demiuj, nem ya we oli givim long wan god we i jelas mo i no hae tumas mo we bighaf blong olgeta man oli stap wosip long hem be oli no save long hem.

Bilif long ol rabis speret we oli stap aninit long jif blong ol rabis speret i stap tu long ol skul long Is. Ol Hindu oli bilif se ol asuras (ol dimon) oli agensem ol devas (ol god). Oli fraet moa long ol reksasa we oli stap long medel blong ol asuras, hemia ol rabis samting olsem ol gos we oli stap long ol beregraon.

Ol Budis oli tingbaot ol dimon olsem oli ol paoa we oli gat fasin blong man, we oli blokem ol man blong no kasem Nirvana, wan mak we man i save kasem we i no moa wantem wan samting. Mara i wan bigfala man blong traem man long medel blong olgeta, wetem trifala dota ya blong hem Rati (Wantem), Raga (Glad), mo Tanha (Neva spel).

Ol man blong skul long Jaena oli yusum ol bigfala faea, ol toj, mo ol smol laet we oli save faerap blong protektem olgeta agens long kuei, no ol dimon blong ol samting raon long yumi. Ol skul blong Japan tu oli bilif se i gat plante dimon, olsem tengu, we oli mekem man i fraet tumas, ol speret ya oli save stap insaed long man gogo kasem taem we wan pris i ronemaot.

Long ol skul blong Esia, Afrika, ol Pasifik aelan, mo Amerika, we ol man blong olgeta oli no save rid mo raet, oli bilif se ol speret man oli save givhan long olgeta no mekem olgeta oli harem nogud dipen long ol samting we i stap hapen mo filing blong olgeta long taem ya. Ol man oli ona long ol speret ya blong blokem trabol mo blong kasem ol gudfala samting.

Antap long ol samting ya, fulap man oli intres long majik mo wok blong ol kleva, taswe i klia se bilif long ol rabis speret i gat wan longfala histri mo i gat paoa long fulap man. ?Be i stret blong bilif se ol man olsem oli stap? Baebol i talem se oli stap. Be, sipos oli rili stap, ?from wanem God i letem olgeta blong gat paoa long man gogo hem i harem nogud?

[Ol futnot]