Baebol i Talem Wanem

?Ol Rabis Spirit, Oli Hu?

OL MAN blong ol defren skul oli bilif se ol gos, lisefsef, sangalingali, talumeape, mo ol devel, oli defdefren grup blong ol spirit. Oli ting se, sam long ol spirit ya oli gud, sam oli nogud, mo sam oli save mekem i gud mo i nogud long semtaem. Be sam man oli no bilif se ol spirit ya oli stap. Oli ting se hemia i wan stori nomo blong mekem man i fraet, no i wan samting we i stap long tingting blong man nomo. ?Baebol i talem wanem?

Baebol i talem se Man we i Mekem olgeta samting, hem i wan Spirit, mo olgeta enjel we hem i mekem fastaem, olgeta tu oli spirit. (Jon 4:24; Hibrus 1:13, 14) Mo tu, taem Baebol i tokbaot ol rabis spirit, samtaem i singaot olgeta se, ol devel. (1 Korin 10:20, 21; Jemes 2:19) Be Baebol i no talem se God i mekem ol rabis spirit. Ale, ?ol rabis spirit ya oli hu, mo hu i mekem olgeta?

‘Ol Enjel We Oli Mekem Sin’

Taem God i mekem ol enjel, hem i mekem olgeta blong oli naf blong jusum rod we oli wantem folem. Oli save jusum blong mekem i gud no i nogud. Sore tumas, afta we God i mekem faswan man mo woman, sam enjel oli jusum blong mekem samting we i nogud, taem oli mekem stronghed agensem God. Baebol i no talem hamas enjel stret oli mekem olsem.

Faswan rabis enjel we i mekem stronghed agensem God, hem i kam Setan. Hem i nogud we i nogud olgeta. Jisas i talem se: “Neva hem i stap wetem olgeta we oli tok tru.” (Jon 8:44) ?Wanem samting i pulum Setan blong agensem God? Hem i wantem kasem wosip we i mas go nomo long Man ya we i Mekem heven mo wol. Ale hem i folem prapa tingting ya blong hem, nao hem i putumap hem i kam wan rabis god we i wantem kam hae moa long Jeova. Long rod ya, hem i mekem hem wan i kam “Setan,” we i minim “man blong agensem man.” Plante handred yia biaen, bifo we Bigfala Wota i ron long taem blong Noa, sam narafala enjel oli folem Setan. Oli lego prapa ples blong olgeta long heven, oli jenisim bodi blong olgeta i kam man, mo oli kamdaon long wol. (Jenesis 6:1-4; Jemes 1:13-15) Taem Bigfala Wota i ron, ‘ol enjel ya we oli mekem sin’ oli lego bodi blong olgeta we i blong wol ya mo oli gobak blong laef long ples blong ol spirit. (2 Pita 2:4, NW; Jenesis 7:17-24) Sloslo, ol man oli singaot olgeta se, ol devel.—Dutronome 32:17 NW; Mak 1:34.

Ol enjel ya we oli no obei, oli no harem gud long laef we oli gat naoia, we i defren olgeta long hemia we oli gat fastaem, bifo we oli mekem stronghed. Jud 6 i talem se: “Ol enjel ya we oli no glad blong holem hae nem we God i givim long olgeta, nao oli livim prapa ples blong olgeta, oli gowe long hem. God i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta long hem.” Yes, God i no moa letem ol rabis enjel ya oli harem gud long ol blesing we oli gat fastaem long heven, be hem i putum olgeta long wan ples we i “tudak.” God i blokem olgeta blong oli no moa save kasem ol gudfala save mo tijing blong hem we i olsem laet.

Oli ‘Lidim Olgeta Man Long Wol Oli Go Krangke’

Nating we God i no letem ol rabis enjel ya oli jenisim bodi blong olgeta bakegen i kam olsem man, be oli gat bigfala paoa yet long tingting mo laef blong ol man. Blong talem stret, Setan mo ol rabis enjel ya blong hem oli stap ‘lidim olgeta man long wol oli go krangke.’ (Revelesen 12:9; 16:14) ?Oli mekem olsem wanem? Plante taem, oli ‘tijim ol man long ol toktok blong ol devel nomo.’ (1 Timoti 4:1) Bighaf blong ol giaman tijing ya, oli long saed blong God mo Baebol. Ol tijing ya oli satem tingting blong plante milian man blong oli no luksave ol trutok long saed blong God. (2 Korin 4:4) I gud yumi tingbaot sam eksampol.

● Tijing ya se ol dedman oli laef yet. Ol rabis enjel ya oli yusum ol voes, ol pija, mo ol narafala trik, blong giaman long ol man. Oli pulum ol man blong ting se oli save toktok wetem ol dedman. Trik ya i mekem ol man oli bilif se wan samting insaed long man i gohed blong laef afta we man i ded. Be Baebol i talem stret se: “Ol man we oli ded finis oli no moa save wan samting.” (Prija 9:5, 6) Taem oli ‘godaon long ples we i no moa gat toktok nating,’ oli no moa save presem God tu.—Ol Sam 115:17, NW.a

● I no moa gat ol rul long saed blong gudfala fasin. Fas Jon 5:19 i talem se: “Olgeta man blong wol ya oli stap long paoa blong Setan.” Setan mo ol rabis enjel blong hem oli yusum paoa blong olgeta long nogud fasin. Oli yusum radio, ol niuspepa, mo ol narafala samting olsem, blong givim tingting long ol man se oli save mekem enikaen rabis fasin we oli harem gud long hem. (Efesas 2:1-3) From samting ya, enikaen rabis fasin, mo ol nogud fasin blong man wetem woman, oli stap kam plante moa naoia. Ol man oli ting se ol fasin ya oli oraet nomo. Oli tingbaot ol loa mo ol rul blong Baebol se, oli blong ol man long taem bifo nomo, mo oli strong tumas.

● Fasin blong wok wetem rabis spirit. Aposol Pol i mitim wan gel we i stap wok slef, we i gat “devel i stap long hem, i stap soemaot long hem ol samting we bambae i save kamtru.” Samting ya i mekem se, “gel ya i stap winim plante mane blong ol masta blong hem, from we ol man oli stap pem olgeta blong harem tok blong hem.” (Ol Wok 16:16) Pol i no wantem lesin long gel ya. Hem i save se ol devel oli stap givim paoa long hem. Antap long samting ya, Pol i no wantem mekem God i harem nogud. Hem i save se, God i no laekem nating enikaen wok we i joen wetem ol rabis spirit, olsem fasin blong lukluk ol sta blong talemaot fiuja, mo askem ol spirit blong givhan long yumi.—Dutronome 18:10-12.

Yu Mas Blokem Ol Rabis Spirit

?Olsem wanem yu yu save blokem ol rabis spirit blong oli no spolem yu? Baebol i givim ansa se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” (Jemes 4:7) Yumi obei long ol tok ya taem yumi folem ol tijing blong Baebol long laef blong yumi. Tabu buk ya nomo i tokbaot Setan, ol rabis enjel, mo “ol giaman trik” blong olgeta. (Efesas 6:11; 2 Korin 2:11) Baebol i talemaot long yumi tu se, ol rabis spirit wetem ol man we oli agensem God, bambae oli lus. (Rom 16:20) Ol Proveb 2:21 i talem se: “Ol stret man we yu save trastem olgeta, bambae oli save stap gud long ples ya blong yumi.”

[Futnot]

?YU YU BIN TINGBAOT?

● ?Olsem wanem? ?God nao i mekem ol rabis spirit?—2 Pita 2:4.

● ?Yu yu save toktok wetem ol dedman?—Prija 9:5, 6.

● ?Olsem wanem yu save blokem ol rabis spirit blong oli no spolem yu?—Jemes 4:7.

[Tok blong pija long pej 21]

Ol rabis spirit oli yusum ol defdefren rod blong pulum man blong kam aninit long paoa blong olgeta