Ol Yangfala—?Yufala i Stap Folem Tijing Blong Hu?
‘Sam man oli save lego fasin blong bilif long God. . . . bambae oli biaen long ol toktok ya we ol dimon nomo oli tijim olgeta long hem.’—1 TIMOTE 4:1.
1. (a) ?Wanem jus we ol yangfala oli gat? (b) ?Olsem wanem Jeova i tijim ol man?
KWESTIN long ples ya we i go long ol yangfala se, ?Yufala i stap folem tijing blong hu? Samting ya i soem se yufala ol yangfala yufala i mas jus. Yufala i save jusum blong lesin long tijing blong God no blong folem tijing blong ol dimon. Jeova i tijim man tru long Tok blong hem, Baebol, mo tu tru long minista wok blong olgeta we hem i yusum olsem ol man we oli wok long nem blong hem long wol. (Aesea 54:13; Ol Wok 8:26-39; Matyu 24:45-47) Be, ?yu yu sapraes se ol dimon tu oli stap tijim man?
2. ?From wanem yumi nidim blong stap lukaotgud blong agensem ol tijing blong ol dimon, i tru moa tede?
2 Aposol Pol i raetem se: ‘Long taem ya we kolosap wol i finis, sam man oli save lego fasin blong bilif long God. Bambae olgeta ya oli obei long ol devel we oli blong gyaman nomo, bambae oli biaen long ol toktok ya we ol dimon nomo oli tijim olgeta long hem.’ (1 Timote 4:1) From we yumi stap laef long “lasdei” taem Setan mo ol dimon blong hem oli wok strong moa, ?yu yu luksave from wanem mifala i askem kwestin ya se, Yu stap folem tijing blong hu? (2 Timote 3:1-5; Revelesen 12:7-12) From we Setan mo ol dimon blong hem oli waes blong trikim ol man, mo oli save switimgud ol man long ol rod we oli yusum, i nidim se yu mas tingtinggud long kwestin ya.—2 Korin 11:14, 15.
Ol Dimon Mo Ol Tijing Blong Olgeta
3. ?Hu ya ol dimon, wanem plan blong olgeta, mo olsem wanem oli traem blong mekem i kamtru?
3 Bifo, ol dimon oli stap olsem ol enjel blong Jeova, be oli rebel agens long Man we i Wokem Olgeta mo from samting ya oli kam ol man blong Setan. (Matyu 12:24) Plan blong olgeta i blong spolem ol man mo pulum olgeta blong oli no moa mekem wok blong God. Blong mekem samting ya, ol dimon oli yusum ol man olsem tija blong leftemap fasin blong tingbaot yumi wan nomo, mo mekem rabis fasin long laef we i agensem loa blong Jeova. (Skelem wetem 2 Pita 2:1, 12-15.) Sipos yumi tingbaot olsem wanem ol enjel we fastaem oli gud nomo oli kam ol dimon, bambae i halpem yu blong luksave ol tijing blong olgeta mo fasin blong laef we ol tijing ya oli leftemap.
4. (a) ?From wanem ol enjel we oli no obei long God oli kam long wol long taem blong Noa? (b) ?Wanem i hapen long ol nogud enjel mo ol pikinini blong olgeta taem wora i ron bigfala?
4 Long taem blong Noa, sam naesfala gel blong ol man blong wol oli pulum tingting blong sam enjel. Ale ol enjel ya oli lego ples blong olgeta long heven blong kam long wol. Fasin blong olgeta blong slip wetem ol woman i mekem se ol pikinini blong olgeta oli ol bigfala man we oli kolem olgeta ol Nefilim. From we i no stret blong ol speret man oli laef wetem ol man, wanem we ol enjel ya we oli no obei long God oli mekem wetem ol woman ya i rong, sem mak nomo long fasin blong man i slip wetem man we ol man mo boe blong Sodom oli mekem sam taem biaen. (Jenesis 6:1-4; 19:4-11; Jud 6, 7) Ol woman blong ol enjel ya wetem ol pikinini blong olgeta oli ded taem bigfala wora i ron, be ol nogud enjel oli sakem bodi blong olgeta long saed blong wol mo oli gobak long heven we long ples ya oli kam ol dimon, ol fren blong Setan.—2 Pita 2:4.
5. ?Ol dimon oli olsem wanem, mo olsem wanem oli traem blong daonem ol loa blong God?
5 Long lukluk blong yu long histri ya, ?yu kasem save nao long fasin we ol dimon oli rili gat? Oli ol man blong mekem ol krangke fasin blong seks, we long fasin haed, oli stap kontrolem wol ya we i fulap long tingting long saed blong nogud fasin blong seks. Nating se God i blokem olgeta blong oli no moa tekem bodi olsem man, oli stap spolem plante man long wol, mo oli stap haremgud long ol krangke fasin blong seks we oli stap pulum ol man ya blong mekem. (Efesas 6:11, 12) Ol dimon oli traem blong daonem ol loa blong Jeova long saed blong ol klin fasin mo stret fasin blong laef, taem oli mekem ol loa oli luk olsem se oli strong tumas. Ol nogud enjel ya oli leftemap fasin nogud blong seks olsem samting we i oraet nomo, wan gudfala rod blong haremgud long laef.
Leftemap Ol Tijing Blong Ol Dimon
6. ?From wanem yumi no mas sapraes se ol dimon oli stap leftemap ol tijing blong olgeta long fasin we i save trikim man?
6 I no wan sapraes long yumi, se ol dimon oli leftemap ol tijing blong olgeta long wan rod we man i no luksave klia, from hemia rod we lida blong olgeta, Devel Setan, i bin yusum blong trikim Iv. Tingbaot se hem i tok long Iv olsem we hem i wantem halpem hem. Setan i askem se: ‘?I tru we God i blokem olgeta tri se i tabu, yutufala i no save kakae, no i no tru olsem?’ Afta, hem i traem blong daonem tijing blong God taem hem i talem long Iv se bambae hem i kasem gud samting sipos hem i kakae frut ya we God i putum tabu long hem. Devel ya i promes se, ‘Long sem dei ya we yutufala i kakae long hem, bambae ae blong yutufala i open mo bambae yutufala i kam olsem God, bambae yutufala i save wanem i gud mo wanem i nogud.’ (Jenesis 3:1-5) Olsem nao, hem i pulum Iv, yes i switim hem, blong brekem loa blong God.—2 Korin 11:3; 1 Timote 2:13, 14.
7. ?Ol nogud tijing blong ol dimon oli gat wanem paoa, mo samting ya i givim wanem woning?
7 Long taem blong yumi tu, plante oli bin letem wan samting i pulum olgeta, ale oli foldaon from. Long fasin we i trikimgud ol man, ol dimon oli leftemap fasin nogud long saed blong seks, mekem se ol man we bifo oli no agensem fasin ya naoia oli akseptem. Eksampel, taem wan woman blong givim advaes we ol man oli savegud long hem long Yunaeted Stet, i ansa long wan leta long saed blong ol man we oli no mared be oli stap mekem nogud long saed blong seks, hem i talem se: “Mi neva tingbaot se bambae mi jenisim tingting blong mi long bisnes ya, be naoia mi bilif se ol man mo woman we oli wantem mared oli mas pasem sam ful wiken tugeta blong testem sipos tufala i stret long tufala.” Nao hem i ademap se: “!Mi no save bilivim se mi bin raetem samting ya!” !Yes hem i no save bilivim se hem i leftemap fasin blong slip tugeta bifo mared, be hem i bin mekem olsem! I klia se, yumi mas lukaotgud se ol tijing blong ol dimon oli no gat paoa long tingting blong yumi long saed blong ol samting we God i agensem olgeta.—Rom 1:26, 27; Efesas 5:5, 10-12.
8. (a) ?Olsem wanem oli yusum wod ya “wol” long Baebol? (b) ?Hu i stap rulum wol, mo ol man we oli folem Jisas oli mas tingbaot wol olsem wanem?
8 Yumi neva mas fogetem se Setan i “masta blong wol ya.” Yes, aposol Jon i talem se ‘wol ya i stap long paoa blong Setan.’ (Jon 12:31; 1 Jon 5:19) I tru, samtaem Jisas i yusum wod ya “wol” blong tokbaot ol man. (Matyu 26:13; Jon 3:16; 12:46) Be, plante taem, hem i yusum wod ya “wol” blong tokbaot ol grup blong ol man we oli stap afsaed long trufala Kristin kongregesen. Eksampel, Jisas i talem se ol man blong hem oli no mas ‘haf blong wol ya’ (ol grup blong man we oli no mekem stret fasin), mo se from oli no haf blong wol ya, wol bambae i no laekem olgeta i agens long olgeta. (Jon 15:19; 17:14-16) Baebol i gohed blong givim woning se yumi mas lukaot blong no kam fren wetem wol ya we Setan i rula blong hem.—Jemes 4:4.
9, 10. (a) ?Wanem ol samting blong wol we oli pulum man blong wantem ol rabis fasin long saed blong seks? (b) ?Olsem wanem man i save luksave hu i stap biaen long ol tijing we ol myusek, televisin mo video blong wol oli stap tijim?
9 Aposol Jon i wekemap tingting se: “I nogud yufala i stap laekem ol fasin blong wol mo ol samting we oli stap long hem.” Hem i talem tu se: “Ol fasin ya we i stap long wol oli olsemia. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.” (1 Jon 2:15,16) Tingbaot samting ya. ?Wanem samting we i stap long wol tede we i stap mekem man i wantem tumas ol rabis samting, eksampel rabis fasin long saed blong seks? (1 Tesalonaeka 4:3-5) ?Olsem wanem long plante myusek blong wol? Wan ofisa blong polis blong Kalifonia we i stap jekem ol man blong brekem loa blong luk sipos fasin blong olgeta i stap kamgud biaen, i talem se: “Bigfala samting we myusek i tijim se yu no nidim blong lesin long papa mama blong yu, mo se yu save laef long fasin we yu wantem.” ?Yu yu luksave stampa blong tijing we ol kaen myusek olsem oli stap givim?
10 Tingbaot se Setan, i talem long Iv se: ‘Yu stap mestem wan samting we i gud. Laef long fasin we yu wantem. Mekem prapa disisen blong yu long wanem i gud mo wanem i nogud. Yu no nidim blong lesin long God.’ (Jenesis 3:1-5) Hemia sem mesej we i stap long bighaf blong ol myusek blong wol tede. Be ol dimon oli no tijim ol man tru long myusek nomo. Oli yusum ol program long televisin, sinema mo video blong tij tu. ?Olsem wanem? Yes, long ol rod blong toktok we wol i yusum tede blong mekem ol man oli haremgud olsem radyo, televisin, mo video, ol program oli stap mekem ol tijing blong God oli luk olsem se oli strong tumas. Oli leftemap fasin nogud blong seks bifo mared taem oli soem bakegen mo bakegen mo taem oli soemaot fasin ya olsem wan samting we i gud.
11. Long saed blong ol fasin blong laef, ?wanem nao televisin i stap tijim plante taem?
11 Magasin ya U.S.News & World Report i talem se: “Long 1991, tri televisin stesen [long Amerika] oli soem moa long 10,000 fasin blong seks insaed long taem ya we bighaf blong ol man oli stap lukluk televisin; long evri pija we i soemaot fasin blong seks bitwin ol man mo woman we oli mared, televisin i soem 14 pija blong seks afsaed long mared.” From we oli soem bitim 9,000 pija blong fasin blong seks long wan yia long taem we plante man oli stap lukluk televisin, ?yu save talem se televisin i stap tijim wanem? Barry S. Sapolsky, we i joen wetem narafala man blong raetem ripot ya “Seks Long Taem We Plante Man Oli Lukluk Televisin: Skelem 1979 wetem 1989,” i talem se: “Sipos blong plante yia wan yangfala i lukluk long televisin fasin ya we ol man mo woman oli pleplei wetem ol nogud fasin long saed blong seks, no mekem nogud long saed blong seks long klia ples nomo, ol taosen pija ya we hem i lukluk long ol yia bambae oli tijim hem se seks i blong mekem hem i haremgud nomo—mo i no gat nogud frut i save kamaot long hem.” I klia nomo se: Ol televisin, radyo mo video blong wol oli stap tijim ol yangfala se i no gat rul, fasin blong seks bifo mared i oraet nomo, mo se i no gat nogud frut i save kamaot sipos oli laef long fasin we God i putum tabu long hem.—1 Korin 6:18; Efesas 5:3-5.
12. ?From wanem ol myusek, televisin mo video blong wol oli wan bigfala denja moa long ol yangfala Kristin?
12 Oli stap wokem ol myusek blong wol, ol sinema, ol video, mo televisin blong pulum tingting blong ol yangfala. !Oli mekem ol nogud tijing blong ol dimon oli go olbaot! ?Be yumi mas sapraes long samting ya? Traem tingbaot. Sipos ol gyaman skul mo ol politik oli haf blong wol blong Setan—mo i klia se samting ya i tru—?i stret blong bilif se ol myusek, televisin, mo video blong wol ya oli fri long paoa blong ol dimon? Yufala ol yangfala yufala i nidim moa blong lukaotgud blong no “letem wol raon long yufala i fosem yufala blong folem ol fasin blong hem.”—Rom 12:2, The New Testament in Modern English, we J. B. Phillips i raetem.
Jekem Yu Wan
13. ?Wanem fasin blong jekem yumi wanwan we yumi mas mekem?
13 I no toktok blong yu nomo we i soemaot se yu stap lesin long tijing blong hu be tu ol samting we yu yu mekem. (Rom 6:16) Ale askem yu wan se, ‘?Ol samting we mi stap lanem tru long ol rod we wol ya i yusum blong leftemap ol tingting blong hem, oli stap spolem tingting blong mi mo fasin blong laef blong mi? ?Maet i tru se ol tijing blong ol dimon oli stap kam insaed long laef blong mi?’ Blong givhan long yu blong ansa long ol kwestin ya, i gud blong yu skelem hamas haoa mo fasin traehad we yu stap yusum blong stadi Baebol, go long ol Kristin miting mo blong toktok long ol narafala long saed blong Kingdom blong God, wetem hamas haoa we yu yusum blong lukluk televisin, lesin long myusek, mekem spot we yu laekem tumas, no joen long sam narafala samting olsem. From we wan bigfala samting—yes, laef blong yu—i stap long denja, traem skelemgud yu wan blong luk wanem i rili stap hapen long laef blong yu.—2 Korin 13:5.
14. ?Wanem samting bambae i gat paoa long helt blong yumi long saed blong speret, mo yumi mas tingtinggud long wanem samting oltaem?
14 Yu savegud se kakae blong bodi we yu stap kakae bambae i gat paoa long helt blong yu long saed blong bodi. Long sem fasin, samting we yu stap fidim maen mo hat blong yu long hem bambae i gat paoa long helt blong yu long saed blong speret. (1 Pita 2:1, 2) I tru se yu save gyaman long yu wan long saed blong wanem we yu rili intres long olgeta, be yu no save gyaman long Jaj blong yu, Jisas Kraes. (Jon 5:30) Ale askem yu wan, ‘?Sipos Jisas i stap long wol, bambae mi sem sipos hem i kam insaed long rum blong mi mo lesin long myusek we mi stap lesin long hem no lukluk wanem mi stap lukluk long televisin?’ Samting we i mas mekem yumi tingtinggud se, i tru, Jisas i stap lukluk mo i save ol samting we yumi stap mekem.—Revelesen 3:15.
Agensem Ol Tijing Blong Ol Dimon
15. ?From wanem ol Kristin oli mas faet strong blong agensem ol tijing blong ol dimon?
15 Paoa we ol dimon oli gat long ol yangfala blong pulum olgeta blong folem ol tijing blong olgeta i bigwan tumas. Ol rabis speret oli traem blong givim wan laef we i luk olsem man i save haremgud long hem naoia nomo—wan laef blong pleplei mo haremgud. Be blong mekem God i haremgud, Moses blong bifo i sakemaot tingting ya ‘blong mekem sin, blong haremgud blong smoltaem nomo,’ olsem wan impoten memba blong haos blong Fero. (Hibrus 11:24-27) I no isi blong sakemaot samting we ol dimon oli wantem givim, taswe yu mas faet strong blong mekem wanem we i stret. Samting ya i tru moa from we yumi sinman finis taem yumi bon mo hat blong yumi i pulum yumi oltaem blong mekem samting we i nogud. (Jenesis 8:21; Rom 5:12) From we paoa blong sin i stap pulum hem, aposol Pol tu i mas mekem i strong long hem wan blong no letem tingting blong hem long saed blong bodi i bos long hem.—1 Korin 9:27; Rom 7:21-23.
16. ?Olsem wanem ol yangfala oli save winim ol traem blong mekem nogud long saed blong seks?
16 Nating se yu kasem traem blong folem ‘bighaf blong ol man we oli mekem samting we i no stret,’ God i save halpem yu blong stanap strong agensem ol fren blong yu taem oli traem pulum yu blong folem nogud rod blong olgeta. (Eksodas 23:2; 1 Korin 10:13) Be yu mas lesin long ol tok blong God we i blong lidim yu, holemgud ol tok blong hem long hat blong yu. (Ol Sam 119:9, 11) Yu mas luksave se taem ol yangfala oli wantem stap longwe long ol narafala man oltaem, tingting long saed blong seks i save kam antap mo i save lidim olgeta blong brekem loa blong God. Wan yangfala i talem se, “Taem mi stap wetem boe fren blong mi, mitufala nomo, bodi blong mi i wantem mekem wan samting be tingting blong mi i stap talem long mi blong mekem narafala samting.” Taswe yu mas save ol mak we yu no mas bitim mo luksave se hat blong yu i save trikim yu. (Jeremaea 17:9) Yu no mas stap yu wan nomo. (Proveb 18:1) Putum mak we yu no mas bitim long ol fasin blong soemaot filing. Impoten moa, stap frengud wetem olgeta nomo we oli laekem Jeova mo oli gat dip respek long ol loa blong hem.—Ol Sam 119:63; Proveb 13:20; 1 Korin 15:33.
17. ?Wanem i save givhan long ol yangfala Kristin blong kasem paoa blong agensem ol tijing blong ol dimon?
17 Fasin blong stadigud long ol Kristin buk we oli blong mekem yu yu strong long saed blong speret, bambae i givhan long yu. Eksampel, lukluk buk ya, Questions Young People Ask—Answers That Work mo japta ya “Faet ya Blong Mekem Ol Stret Fasin” long buk ya Yu Save Laef Foreva Long Paradaes Long Wol. Letem tijing blong Baebol we i stap long buk ya i go dip insaed long maen mo hat blong yu, mo bambae i mekem yu yu strong. Wan samting we yu neva mas fogetem se i no isi blong mekem i stret long wol ya we ol dimon oli bos long hem. Taswe, yu mas faet strong. (Luk 13:24) Wok blong kam strong moa long saed blong speret. Yu no mas folem fasin blong olgeta we oli no gat strong tingting nating, we oli fraet nao oli stap folem fasin blong bighaf blong ol man.
Kasem Gudfala Frut From Tijing Blong God
18. ?Wanem sam frut we oli kamaot taem yumi folem tijing blong God?
18 Rimemba, tu, se bambae yu neva mestem wan gudfala samting sipos yu folem tijing blong Jeova. Hem i laekem yu tumas, mo hemia nao from wanem hem i stap ‘tijim yu blong givhan long yu bakegen.’ (Aesea 48:17) Ale sipos yu folem tijing blong Jeova, bambae yu save ronwe long fasin blong harem nogud tumas from voes blong hat mo tingting we i no stap kwaet, lusum respek long yu wan, gat bel we yu no wantem, sik long saed blong seks, no sam narafala trabol olsem. Jeova i haremgud tumas taem ol man blong wok blong hem oli soem fasin we hem i save yusum blong ansa long Setan, we i talem se ol man bambae oli no holem strong long God taem oli kasem traem. (Job 1:6-12) Sipos yu mekem hat blong Jeova i glad from yu stap holem strong long hem, bambae yu kasem sef taem bambae hem i jajem wol ya, be olgeta we oli stap brekem ol loa blong hem bambae oli lus.—Proveb 27:11; 1 Korin 6:9, 10; 1 Jon 2:17.
19. ?Olsem wanem fasin blong joen wetem olgeta we oli gat fasin tangkyu long tijing blong Jeova i impoten?
19 Sipos yu stap joengud oltaem wetem olgeta we oli gat fasin tangkyu long ol samting we Jeova i bin mekem long olgeta, yu save lanem sam samting from ekspiryens blong olgeta. Wan woman we bifo i stap kakae drag mo i stap mekem ol rabis fasin blong seks i eksplenem se: “Sipos mi no bin lesin long Jeova, bambae mi ded finis. Man we mi mekem promes blong mared long hem i ded from hem i bin kasem AIDS. Ol gudfala fren we mi bin joen wetem olgeta bifo long wol oli ded from AIDS no oli stap long rod blong ded. Taem mi stap wokbaot mi luk olgeta plante taem, mo mi talem tangkyu long Jeova evri dei from ol loa blong hem we oli lidim ol man blong hem, mo oli save mekem yumi stap klin sipos yumi mekem olgeta oli wok long laef blong yumi. Mi neva glad bifo olsem naoia, mi haremgud, mo mi harem se mi stap sef.” !I tru tumas, fasin blong folem tijing blong Jeova oltaem i mekem i gud long yumi!
Mekem Stret Disisen
20, 21. (a) ?Wanem tufala jus we ol yangfala oli gat? (b) Taem yumi folem tijing blong God, ?wanem blesing blong olwe we i save kamaot from?
20 Mifala i talem stret long yufala ol yangfala: Mekem stret disisen, hemia blong mekem wok blong Jeova. Biaen, mekem tingting blong yu i strong blong holem strong long disisen ya. (Josua 24:15) Yes, yu save mekem wan nomo long tufala jus ya. Jisas i talem se i gat bigfala rod—hemia we i isi, we yumi save mekem wanem we yumi nomo i wantem. Rod ya i lidim man i go long ded, lus olgeta. Narafala rod i smol. Hem i wan rod we i strong blong wokbaot long hem long wol ya we i fulap long ol rabis fasin mo we ol dimon oli bos long hem. Be rod ya bambae i tekem olgeta we oli stap wokbaot long hem oli go long nambawan nyufala wol blong God. (Matyu 7:13,14) ?Bambae yu yu jusum wanem rod? ?Bambae yu yu folem tijing blong hu?
21 Jeova i letem yu blong yu jusum. Hem i no traem blong fosem yu blong mekem wok blong hem. Moses, profet blong God, i talem se: “Mi putum laef mo ded fored long yu. Yu mas jusum laef.” Yu mekem jus ya taem “yu laekem Jeova God blong yu, taem yu lesin long voes blong hem mo holem strong long hem.” (Dutronome 29:2; 30:19, 20) Yu mas waes blong jusum blong folem tijing blong God mo haremgud long laef we i no gat en blong hem long nambawan nyufala wol blong God.
?Bambae Yu Ansa Olsem Wanem?
◻ ?Hu ya ol dimon, mo wanem ol tijing blong olgeta?
◻ ?Olsem wanem ol dimon oli stap leftemap ol tijing blong olgeta tede?
◻ ?Olsem wanem yumi save stanap strong agensem ol tijing blong ol dimon?
◻ ?Wanem gudfala frut i save kamaot taem yumi folem tijing blong Jeova?
[Tok blong pija long pej 16]
Bifo we bigfala wora i ron, ol enjel we oli no obei long god mo ol pikinini blong olgeta oli leftemap raf fasin mo ol rabis fasin blong laef
[Tok blong pija long pej 18]
?Bambae yu sem sipos jisas i lesin long myusek we yu laekem tumas?