Tijing Blong God i Agensem Tijing Blong Ol Rabis Speret
“Sam man oli save lego fasin blong bilif long God. Bambae olgeta ya oli obei long ol rabis speret we oli blong gyaman nomo, bambae oli biaen long ol toktok ya we ol rabis speret nomo oli tijim olgeta long hem.”—1 TIMOTE 4:1.
1. ?Ol Kristin oli stap long medel blong wanem faet?
TRAEM tingbaot sipos long ful laef blong yu, yu stap long wan ples we i gat faet long hem. ?Bambae yu harem olsem wanem sipos yu mas slip, we i gat noes blong masket i faerap, mo taem yu girap, i gat noes blong ol tul we oli stap yusum blong faet? Sore tumas, long samfala ples long wol, ol man oli stap laef stret long ples olsem. Be, long saed blong speret, olgeta Kristin oli stap laef long sem fasin. Oli stap long medel blong wan bigfala faet we i bin stap gohed blong 6,000 yia mo faet ya i bin kam strong moa long taem blong yumi. ?Wanem faet ya we i bin gohed long plante yia? Hemia faet we trutok i agensem ol gyaman tok, tijing blong God i agensem tijing blong ol rabis speret. Yumi no gyaman taem yumi talem se, faet ya i wan faet we i no gat sore mo i givim ded bitim olgeta narafala faet long histri blong man—no maet yumi save talem olsem long saed blong ol fasin agens we wan nomo long tufala saed ya i stap mekem.
2. (a) ?Olsem Pol i soemaot, wanem tufala saed we tufala i stap agensem tufala? (b) ?Pol i minim wanem taem hem i talem ‘fasin blong bilif long God’?
2 Aposol Pol i tokbaot tufala saed blong faet ya taem hem i raet i go long Timote se: ‘Tabu speret i talemaotgud, se bambae, long taem ya we kolosap wol i finis, sam man oli save lego fasin blong bilif long God. Bambae olgeta ya oli obei long ol rabis speret we oli blong gyaman nomo, bambae oli biaen long ol toktok ya we ol rabis speret nomo oli tijim olgeta long hem.’ (1 Timote 4:1) Makemgud se ol tijing blong ol rabis speret bambae oli gat moa paoa long ‘taem ya we kolosap wol i finis.’ Naoia yumi stap long taem ya we ol man long taem blong Pol oli stap tingbaot. Makemgud tu se, samting we i agensem tijing blong ol rabis speret, hemia, ‘fasin blong bilif long God.’ Long vas ya, ‘bilif’ i minim tijing blong God, we i stanap long ol tok blong God long Baebol, ol tok we oli kamaot from tabu speret blong hem. Bilif ya i givim laef. Hem i tijim wan Kristin blong mekem wil blong God. Hem i trutok we i soemaot rod blong itenel laef.—Jon 3:16; 6:40.
3. (a) ?Wanem i hapen long olgeta we oli ded long faet ya bitwin trutok mo ol gyaman tok? (b) ?Hu i stap biaen long ol tijing blong ol rabis speret?
3 Ol man we oli lego fasin blong bilif, oli no save kasem laef blong olwe. Oli ol man we oli ded long faet ya. !Hemia nao rabis frut we bambae i kamaot, sipos wanwan man i letem tijing blong ol rabis speret i lidim hem i go krangke! (Matyu 24:24) ?Wanwan long yumi i save mekem wanem blong no ded long faet ya? Yumi mas sakemaot fulwan olgeta gyaman tijing ya, ol tijing we oli blong sapotem nomo ol plan blong ‘jif blong ol rabis speret,’ Devel Setan. (Matyu 12:24) Yumi save finis se, olgeta tijing blong Setan oli gyaman, from we Baebol i talem se, Setan “i stampa blong ol gyaman toktok.” (Jon 8:44) Tingbaot olsem wanem hem i waes blong yusum ol gyaman tok blong lidim faswan papa mama blong yumi, oli go krangke.
Ol Tijing Blong Ol Rabis Speret Oli Kam Long Klia Ples
4, 5. ?Setan i talem wanem gyaman tok long Iv, mo from wanem samting ya i nogud olgeta?
4 Ol samting we oli hapen long taem ya, oli stap long Baebol long Jenesis 3:1-5. Setan i yusum wan snek, ale hem i kam kolosap long woman ya, Iv, mo i askem long hem se: “?Olsem wanem long ol frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” I luk olsem se kwestin ya i no save mekem trabol, be traem luk kwestin ya bakegen. “?I tru we God i blokem?” I olsem we Setan i sek nao i talem se, ‘?From wanem God i talem wan samting olsem?’
5 Iv i no save nating long fasin ya blong trikim man, ale hem i talem se tok ya i tru. Hem i save tijing blong God long bisnes ya, we God i bin talem long Adam se bambae tufala i ded, sipos tufala i kakae long frut blong tri ya we i save mekem tufala i save ol fasin we oli gud mo ol fasin we oli nogud. (Jenesis 2:16, 17) I klia se kwestin blong Setan i rili pulum intres blong Iv, nao hem i lesin long bigfala poen long tok blong Setan se: “Be snek ya i talem se ‘No, hemia i no tru ya. Yutufala i no save ded from.’ ” !Hemia wan samting we i rabis olgeta blong talem! !Setan i tok agens long Jeova, God we i talem trutok oltaem, God we i fulap long fasin lav, Man we i Wokem Olgeta samting, se Hem i stap gyaman long tufala pikinini ya blong Hem!—Ol Sam 31:5; 1 Jon 4:16; Revelesen 4:11.
6. ?Olsem wanem Setan i stanemap kwestin long saed blong gudfala fasin mo hae rul blong Jeova?
6 Be tok blong Setan i go moa. Hem i gohed se: “[God] i talem olsem from we i save se sipos yutufala i kakae long frut ya, bambae yutufala i kam waes. Nao bambae yutufala i olsem hem, we i save ol fasin we i gud mo ol fasin we i nogud.” Folem tok ya blong Setan, Jeova God—we i bin givim plante samting long faswan papa mama blong yumi—i wantem blokem tufala long samting we i nambawan. Hem i wantem blokem tufala blong oli no kam olsem ol god. Olsem nao, Setan i stanemap kwestin long saed blong gudfala fasin blong God. Mo tu hem i leftemap fasin ya we man i wantem haremgud long samting we hemwan nomo i wantem mo i leftemap tingting blong wantem brekem ol loa blong God, from hem i talem se, i moagud long tufala sipos tufala i mekem olsem. Blong talem stret, Setan i agensem hae rul blong Jeova antap long olgeta samting we Hem nomo i wokem, hem i talem se God i no gat raet blong blokem man long sam samting.
7. ?Wetaem ol man oli stat blong harem tijing blong ol rabis speret, mo olsem wanem ol tijing ya oli sem mak tede?
7 Long taem we Setan i talem ol tok ya, ol man oli stat blong harem tijing blong ol rabis speret. Tede, ol rabis tijing ya oli stap leftemap yet ol tingting we oli no kamaot long God. Ol narafala rabis enjel we oli gat fasin rebel, oli joenem Setan, ale oli stap gohed yet long fasin we Setan i mekem long garen blong Iden, blong agensem raet blong God blong putumap ol rul. Setan i stap gohed yet blong agensem hae rul blong Jeova mo i stap traem blong pulum olgeta man blong oli no obei long Papa blong olgeta long heven.—1 Jon 3:8, 10.
8. ?Adam mo Iv, tufala i lusum wanem long Iden, be wanem i soem se tok blong Jeova i tru?
8 Long faswan faet ya we i joen long bigfala faet bitwin tijing blong God mo tijing blong ol rabis speret, Adam mo Iv, tufala i mekem rong disisen mo tufala i lusum hop blong tufala long laef we i no save finis. (Jenesis 3:19) Taem ol yia oli stap pas mo bodi blong tufala i stat blong lusum paoa, i kam klia long tufala se, hu i bin talem gyaman tok mo hu i bin talem trutok long tufala long Iden. Be, plante handred yia bifo we tufala i ded long saed blong bodi, tufala i kam ol faswan man we oli ded long faet bitwin trutok mo ol gyaman tok, taem Man we i Wokem tufala, Stampa blong laef, i jajem tufala se tufala i no moa naf blong kasem laef. Hemia taem we tufala i ded long saed blong speret.—Ol Sam 36:9; lukluk Efesas 2:1.
Ol Tijing Blong Ol Rabis Speret Tede
9. ?Olsem wanem tijing blong ol rabis speret oli bin kam antap long ol handred yia we oli pas?
9 Olsem i stap long buk blong Revelesen, tabu speret i tekem aposol Jon i kam long ‘dei blong Masta,’ we i stat long 1914. (Revelesen 1:10) Long taem ya, oli sakemaot Setan mo ol rabis enjel blong hem long heven, oli kamdaon long wol—samting ya i blokem bigwan man ya we i stap gohed blong agensem Bigfala Man we i Wokem yumi. Long heven, oli no moa save harem voes blong hem, we oltaem i stap tok agens long ol man blong Jeova. (Revelesen 12:10) ?Be, stat long Iden, tijing blong ol rabis speret i bin kam antap olsem wanem long wol? Store i talem se: “Bigfala algita ya, hem i snek ya blong bifo we nem blong hem ‘Setan’ no ‘Man we i agensem man.’ Hem i gyaman long olgeta man long wol finis, i lidim olgeta oli go krangke.” (Revelesen 12:9) !Ol gyaman tok blong Setan oli bin winim olgeta man long wol! !Yumi no sapraes se Baebol i kolem Setan se, “masta blong wol ya”!—Jon 12:31; 16:11.
10, 11. ?Tede, Setan mo ol rabis enjel blong hem oli stap wok strong long wanem rod?
10 ?Afta we oli sakemaot Setan long heven, hem i tanem tingting blong hem? !No gat! Hem i wantem gohed blong faet agensem tijing blong God mo olgeta we oli holemstrong long tijing ya. Afta we oli sakemaot hem long heven, Setan i gohed long faet blong hem: “Nao bigfala algita ya [Setan] i kros tumas long woman ya, nao i livim hem blong go faetem ol narafala pikinini blong hem. Hemia olgeta ya we oli stap obei long ol loa blong God, mo we oli stap holem trutok we Jisas i wetnes long hem se i tru.”—Revelesen 12:17.
11 Antap long fasin ya we Setan i stap faetem ol man blong God, hem i fulumapgud wol ya wetem ol gyaman tingting blong hem, i stap traehad blong holemtaet ol man long paoa blong hem. Long wan long ol vison we aposol Jon i kasem long Revelesen, long saed blong dei blong Masta, hem i luk trifala wael anamol we trifala i pija blong Setan, politik ogenaesesen blong hem long wol, mo wol paoa we bambae i rul long taem blong yumi. Ol frog oli kamaot long maot blong trifala wael anamol ya. ?Ol frog ya oli pija blong wanem? Jon i raetem se: “Trifala [rabis speret ya] trifala i nogud tumas, mo trifala i gat paoa blong mekem ol saen blong soemaot paoa blong trifala. Nao trifala i go luk ol king blong evri ples long wol blong tekem olgeta oli kam wanples, blong oli mekem faet long bigfala Dei blong God ya we i gat olgeta paoa.” (Revelesen 16:14) I klia nomo, ol tijing blong ol rabis speret oli rili wok strong long wol. Setan mo ol rabis enjel blong hem oli stap faet yet agens long tijing blong God, mo bambae oli gohed blong faet olsem gogo kasem taem we Jisas Kraes, Mesaea we i King, i yusum strong paoa blong hem blong stopem olgeta.—Revelesen 20:2.
Luksave Ol Tijing Blong Ol Rabis Speret
12. (a) ?From wanem yumi naf blong faet agensem ol tijing blong ol rabis speret? (b) ?Olsem wanem Setan i traem blong winim faet ya we hem i stap mekem wetem ol man blong God?
12 ?Ol man we oli fraetgud long God, oli save faet agensem ol tijing blong ol rabis speret? Yes, oli save faet agensem, from tu risen. Faswan, i from we tijing blong God i gat moa paoa; mo seken wan, i from we Jeova i soemaot klia ol trik blong Setan, blong yumi save faet agensem olgeta. Olsem aposol Pol i talem, “yumi savegud ol plan blong [Setan].” (2 Korin 2:11) Yumi save se Setan i stap yusum fasin ya we ol man oli ronem mo mekem nogud long yumi, olsem wan rod blong mekem plan blong hem i kamtru. (2 Timote 3:12) Be, long fasin we i haed moa, hem i stap traem blong spolem tingting mo hat blong olgeta we oli stap mekem wok blong God. Hem i lidim Iv i go krangke mo i mekem se hat blong Iv i wantem tumas ol samting we oli no stret. Tede, hem i stap traem blong mekem sem samting. Pol i raet long ol Kristin man long Korin se: “Be mi fraet we bambae tingting blong yufala i kam olsem we i doti. Mi fraet we bambae yufala i lego fasin ya we yufala i stap laekem Kraes tumas, long fasin we i stret nomo, i klin nomo.” (2 Korin 11:3) Tingbaot olsem wanem hem i bin spolem tingting blong olgeta man.
13. ?Stat long Iden, Setan i bin talem wanem gyaman tok long olgeta man?
13 Setan i talem long Iv se Jeova i stap gyaman, mo se ol man oli save kam olsem ol god sipos oli no obei long Man we i Wokem olgeta. Tede, laef blong ol man we i gat sin i pruvum se Setan nao i man blong gyaman, i no Jeova. !Tede, ol man oli no kam olsem ol god! Be, Setan i joenem faswan gyaman tok ya wetem ol narafala gyaman tok. Hem i statem tingting ya se sol blong man i no save ded, i stap gohed blong laef samples. Olsem nao, hem i putum long fored blong ol man blong pulum olgeta, tingting ya se oli save kam olsem ol god long wan narafala rod. Biaen, hem i leftemap ol tijing we oli stanap long gyaman bilif ya, olsem helfaea, pegatri, fasin blong wok wetem rabis speret, mo fasin blong wosip long ol bubu we oli ded finis. Plante handred milyan man oli stap yet aninit long paoa blong ol gyaman tok ya.—Dutronome 18:9-13.
14, 15. ?Wanem trutok long saed blong ded mo hop blong olgeta man long fyuja?
14 Yes, samting we Jeova i talem long Adam i trutok. Adam i ded taem hem i sin agens long God. (Jenesis 5:5) Taem Adam mo ol pikinini blong hem oli ded, oli kam ol ded sol, oli no save wan samting mo oli no save mekem wan samting. (Jenesis 2:7; Eklesiastis 9:5, 10; Esikel 18:4) Olgeta man we oli olsem sol, oli stap ded, from we taem oli bon, sin blong Adam i stap finis long olgeta. (Rom 5:12) Be, long Iden, Jeova i mekem promes long wan laen we bambae i kam blong faet agensem ol wok blong Devel Setan. (Jenesis 3:15) Laen ya hem i Jisas Kraes, stret Pikinini blong God, wan nomo we hem i gat. Jisas i ded we hem i no mekem sin nating, mo laef blong hem we hem i givim olsem sakrifaes, i kam wan ransom blong pemaot ol man long ded. Olgeta we oli obei mo oli soem bilif long Jisas, oli gat jans blong kasem laef we i no save finis, laef ya we Adam i lusum.—Jon 3:36; Rom 6:23; 1 Timote 2:5, 6.
15 Tingting ya se sol i no save ded, we i no klia nating, i no trufala hop blong olgeta man, be ransom nomo i trufala hop. Hemia nao tijing blong God. Hem i trutok. Mo tu ransom ya i soemaot nambawan fasin lav mo waes blong Jeova. (Jon 3:16) !Yumi mas glad tumas blong lanem trutok ya mo blong kam fri long ol tijing blong ol rabis speret long ol bisnes ya!—Jon 8:32.
16. ?Wanem ol frut we oli stap kamaot taem ol man oli folem prapa waes blong olgeta?
16 Taem Setan i gyaman long garen blong Iden, hem i pulum Adam mo Iv blong no moa wantem stap aninit long God mo blong dipen long prapa waes blong tufala nomo. Tede, yumi luk ol frut blong samting ya long fasin blong brekem loa, ol hadtaem long saed blong mane, ol faet, mo bigfala fasin seraot we i stap long wol tede. Yumi no sapraes we Baebol i talem se: !“Olgeta fasin we ol man long wol oli stap talem se oli waes, be long fes blong God oli krangke nomo”! (1 Korin 3:19) Nating se i olsem, plante man oli folem rod we i krangke nomo, oli wantem harem nogud bitim we oli wantem obei long ol tijing blong Jeova. (Ol Sam 14:1-3; 107:17) Ol Kristin, we oli akseptem tijing blong God, oli stap longwe long trap ya.
17. ?Setan i bin leftemap wanem ‘gyaman tok we oli stap talem se i fasin blong man i kam waes,’ mo wanem frut blong hem?
17 Pol i raet long Timote se: “Timote, yu mas holemgud olgeta samting ya we God i putum long han blong yu finis. Bambae yu no go insaed long ol toktok ya we olgeta oli no tokgud long God, mo long ol krangke toktok ya we oli talem se i fasin blong man i kam waes, be oli gyaman nomo. From we plante man we oli stap folem fasin ya, oli go longwe finis long fasin blong bilif.” (1 Timote 6:20, 21) “Waes” ya i pija blong ol tijing blong ol rabis speret tu. Long taem blong Pol, ating waes ya i minim ol tingting blong apostasia we samfala long kongregesen oli stap leftemap. (2 Timote 2:16-18) Biaen, ol gyaman waes, olsem ol man ya we oli talem se oli gat spesel save long ol samting long saed blong speret (Gnosticism) mo ol waes blong ol man Gris, oli spolem kongregesen. Long wol tede, ol man we oli bilif se i no gat God, ol man we oli no sua sipos i gat God, ol tingting blong evolusen,b mo ol man blong hae save we oli strong blong agensem Baebol, oli ol eksampel blong ol gyaman waes, olsem ol tingting we ol man blong apostasi tede oli stap leftemap, ol tingting we oli no stap nating long Baebol. Yumi save luk frut blong ol gyaman waes ya long ol fasin blong man we oli stap kam nogud olgeta, fasin blong no gat respek long ol haeman i kasem plante ples, i no gat stret fasin, mo fasin we man i tingbaot hem wan nomo we i makem wol blong Setan.
Holemstrong Long Tijing Blong God
18. ?Tede, hu ya i stap lukaot tijing blong God?
18 Nating se Setan i bin fulumap wol ya wetem tijing blong ol rabis speret stat long Iden, oltaem i bin gat sam man we oli stap lukaot tijing blong God. Tede, namba blong ol man ya i kasem plante milyan. Ol man ya, hemia ol tabu Kristin we oli stap yet long wol, we oli gat hop blong rul wetem Jisas long Kingdom blong hem long heven, mo bigfala hif blong ol “narafala sipsip,” we namba blong olgeta i stap gru, we oli gat hop blong kasem laef long wol aninit long Kingdom ya. (Matyu 25:34; Jon 10:16; Revelesen 7:3, 9) Raon long wol tede, ol man ya oli bin hivap long wan ogenaesesen, we Aesea i tokbaot se: “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.”—Aesea 54:13.
19. ?Fasin ya we Jeova i tijim man i joen wetem wanem?
19 Fasin ya we Jeova i tijim man, i no minim nomo se man i save long ol trufala bilif—nating se samting ya i impoten. Jeova i tijim yumi olsem wanem blong stap laef, mo olsem wanem blong folem ol tijing blong hem long laef blong yumi wanwan. Eksampel, yumi faet agensem fasin ya we man i tingbaot hem wan nomo, fasin nogud blong seks mo tingting blong no wantem stap aninit long narafala, ol fasin we oli kam antap bigwan long wol raonabaot long yumi. Yumi luksave kruked fasin ya we man i ronem ol rij samting blong wol ya—we i stap lidim man i go long ded. (Jemes 5:1-3) Neva yumi fogetem tijing blong God we i stap long tok blong aposol Jon se: “I nogud yufala i stap laekem ol fasin blong wol mo ol samting we oli stap long hem. Bambae yufala i no mekem olsem. Man we i laekem tumas ol fasin blong wol, hem i no save laekem Papa blong yumi.”—1 Jon 2:15.
20, 21. (a) ?Setan i stap yusum wanem blong traem satem tingting blong ol man? (b) ?Ol man we oli holemstrong long tijing blong God oli kasem wanem blesing?
20 Long tok blong Pol long ol Kristin long Korin, yumi save luk samting we tijing blong ol rabis speret oli mekem long ol man we oli stap folem: “Setan . . . i satem tingting blong olgeta finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nyus blong Jisas Kraes, we hem i gat olgeta paoa, mo hem i stret pija blong God.” (2 Korin 4:4) Setan i wantem satem tingting blong ol trufala Kristin long rod ya tu. Long Iden, hem i yusum wan snek blong lidim wan long ol man blong God i go krangke. Tede, hem i stap yusum ol sinema mo ol program blong televisin we oli soem raf fasin mo rabis fasin blong seks. Hem i yusum radyo, ol buk, mo myusek. Wan strongfala tul blong faet we hem i stap yusum, hemia ol fren we oli no stret. (Proveb 4:14; 28:7; 29:3) Yumi mas luksave oltaem se ol samting olsem oli—ol tul mo ol tijing blong ol rabis speret.
21 Rimemba se, ol tok blong Setan long Iden oli gyaman; ol tok Jeova oli rili tru. Stat bifo i kam, samting ya i stap sem mak nomo. Oltaem i gat pruf blong soem se Setan i wan man blong gyaman, mo tijing blong God i bin tru oltaem nomo. (Rom 3:4) Sipos yumi holemstrong long Tok blong God, bambae oltaem yumi stap long saed ya we i win, long faet ya bitwin trutok mo ol gyaman tok. (2 Korin 10:4, 5) Ale, i gud yumi gat strong tingting blong sakemaot olgeta tijing blong ol rabis speret. Long fasin ya, bambae yumi stanap strong gogo kasem taem we faet bitwin trutok mo gyaman tok i finis. Trutok bambae i win. Bambae Setan i no moa stap, mo bambae ol man oli harem tijing blong God nomo long wol ya.—Aesea 11:9.
[Ol futnot]
a Man we i lego mo i agensem trufala bilif.
b Bilif ya se wan smol samting nomo i jenis gogo i mekem olgeta defren samting we oli gat laef.
?Yu Save Eksplenem?
◻ ?Wetaem man i stat blong harem tijing blong ol rabis speret?
◻ ?Wanem sam long ol gyaman tok we Setan mo ol rabis enjel blong hem oli stap leftemap?
◻ ?Tede, Setan i stap wok strong tumas long wanem rod?
◻ ?Setan i stap yusum wanem blong leftemap ol tijing blong ol rabis speret?
◻ ?Ol man we oli holemstrong long tijing blong God oli kasem wanem blesing?
[Tok blong pija long pej 9]
Faswan taem we man i harem tijing blong ol rabis speret hemia long garen blong Iden
[Tok blong pija long pej 10]
Tijing blong God long saed blong ransom mo Kingdom nomo, oli givim hop long olgeta man