I Sas Moa Bitim Ol Korel
Namba blong ol man we oli kam blong lukluk ol naesfala samting we oli stap long ol wora blong Red Si, i stap kam antap moa.
Ol man we oli daeva long ol klia wora long ples ya, oli laekem tumas blong lukluk plante fis we oli gat ol defdefren kala blong olgeta olsem renbo. Be yu save luk se raon long ol fis we oli gat ol naesfala kala, i gat ol narafala nambawan samting tu long wora ya, we oli save pulum ae blong ol man, wetem ol korel we kala blong hem i kliagud.
Ol naesfala korel ya oli defdefren, sam oli raon, sam oli longfala, mo i gat plante kala blong hem. Maet yu tingbaot finis se, long ol taem bifo ol naesfala pis blong korel we kala blong hem i kliagud oli sas tumas. Ol man we oli gat gudhan blong wokem ol samting oli mekem ol naesfala samting long ol korel ya, mo ol man blong raetem Baebol oli tokbaot ol korel olsem we oli sem mak long gol, selva, mo ol sas ston we kala blong olgeta i red. (Proveb 3:14, 15; Esikel 27:16) Be ol man ya we oli raetem Baebol oli halpem yumi blong go moa long tingting blong yumi bitim we yumi tingbaot nomo se korel ya i naes mo i sas.
Oli soem se i gat sam samting we oli sas moa bitim korel, mo we yumi mas tinghae tumas long olgeta. Wan samting, hemia waef we i gat gudhan blong mekem wok blong hem, ale yumi ridim se: “?Hu i save faenem wan gudfala waef we i gat gudhan long ol wok blong hem? Hem i winim ol naesfala korel we i sas tumas.” (Proveb 31:10) ?Yu yu wan man we i mared finis? Lukluk bakegen long ol naesfala korel long ples ya, nao tingbaot sipos yu stap tinghae long waef blong yu olsem we i stret blong mekem from ol gudfala fasin mo wok blong hem.
Nating se yumi man no woman, yumi mared no yumi no mared, taem yumi lukluk ol naesfala korel we kala blong olgeta i kliagud, samting ya i mas halpem yumi blong luksave se bigfala waes we i kamaot long God, fasin luksave, mo save, oli moa gud. Tok blong God i talem se: “Man we i faenem waes, hem i hapi, mo man we i kasem fasin luksave, hem tu i hapi. From we i moa gud wan man i winim samting ya, i bitim we hem i winim selva. Mo i moa gud wan man i gat fasin ya, i bitim we hem i gat gol. Samting ya i moa gud bitim ol sas [korel], mo olgeta samting we yu glad long hem oli no save kasem mak blong hem.”—Proveb 3:13-15; 8:11.
Nating sipos yumi bin luk ol korel blong Red Si taem yumi daeva no taem yumi lukluk pija nomo, oli mas mekem yumi tingbaot ol samting we oli naes tumas, be tu oli pulum tingting blong yumi long ol narafala poen we oli gud blong tingbaot.