?Yu Yu Luksave Se Baebol i Impoten?

JES ova 200 yia finis, Mary Jones i bon long Lanfiansel, wan velej blong bus long Wels we i no stap longwe tumas long solwora blong Atlantik. Papa mama blong hem oli pua man we oli mekem wok blong wivim ol tred oli kam kaliko​—⁠oli pua tumas mekem se oli no save pem wan Baebol. Be tufala i tijim pikinini gel blong tufala blong laekem God taem tufala i talem sam store blong Baebol long hem mo talem bakegen sam vas we tufala i tingbaot. Oltaem Mary i stap ridim wan Baebol blong fren blong hem we i stap kolosap, long lanwis blong Wels, mo hem i stat blong sevem smol mane we hem i kasem, wetem strong tingting blong pem wan Baebol blong hem.

Long yia 1800, taem Mary i gat 16 yia, hem i harem se oli stap salem smol namba blong Baebol long lanwis blong Wels long smol taon blong Bale we i stap samwe 40 kilomita longwe. Wetem tingting we i no hafhaf, hem i mekem disisen blong wokbaot i go long ples ya. Hem i mekem samting ya, hem i wokbaot krosem ol hil we i no putum sus nating. Be taem hem i kasem ples ya, oli salem evriwan finis. Mo Mary i faenemaot tu se mane we hem i bin sevem i no naf nating.

I tajem hat blong pasta we i stap long ples ya taem hem i luk ol save mo lav we Mary i gat long Baebol. Taem hem i luk we Mary i krae from i harem nogud afta ol traehad we hem i mekem, pasta ya i soem kaen fasin, i givim prapa Baebol blong hem long Mary, mo i talem se: “Ridimgud, stadi dip long hem, holem ol tabu tok ya long tingting blong yu olsem we i wan sas samting, mo mekem laef blong yu i laenap long ol tijing blong hem.”

Samtaem biaen oli talemaot store ya long wan miting blong ‘Committee of the Religious Tract Society’ blong London. Ale oli mekem disisen blong givimaot Baebol, i no long ol man blong Wels nomo, be long olgeta ples long wol. From smol stat ya nomo, i gat wan long plante kampani blong givimaot ol Baebol long olgeta ples long wol, i stanap. Afta, ol kopi blong Baebol long ol narafala lanwis oli stat kamaot mo kam antap kwiktaem.

Tede, Watch Tower Bible and Tract Society, we i stanap long 1884, i stap prentem Baebol mo ol buk we oli givhan blong kasem save long Baebol long bitim 200 lanwis. Long olgeta ples long wol, hem i givimaot finis 72 milyan kopi blong New World Translation of the Holy Scriptures we i stap long lanwis blong tede. Naoia fulwan no haf blong New World Translation, we oli bin tanem i kamaot long Hibru mo Grik lanwis blong bifo, i stap long 18 lanwis finis mo oli stap tanem i go long 12 narafala lanwis bakegen.

Naoia we kolosap evriwan oli gat jans blong kasem wan Baebol, ?olsem wanem yu tingbaot hem? ?Yu yu luksave se Baebol i impoten? ?Yu yu gat wan Baebol we yu laekem tumas mo yu stap ridim?

[Foto Credit Line blong pija long pej 3]

From the book The Story of Mary Jones and Her Bible