Baebol—Wan Buk We Ol Man Oli Mas Ridim
I NO isi blong faenem ol tok we oli gud i naf, blong talem se Baebol i olsem wanem. Hem i wan buk we oli seremaot moa bitim ol narafala buk long histri blong man. Baebol i olfala moa, oli transletem moa i go long ol narafala lanwis, ol man oli talem plante tok blong hem bakegen, i gat bigfala paoa long laef blong ol man, mo ol man oli respektem moa, bitim ol narafala buk. Ating hem i wan buk we ol man oli agensem moa tu. Mo i tru, hem i buk we i stap yet bitim ol narafala buk, nating se oli putum tabu long hem, oli bonem long faea, mo ol man oli agensem bigwan. Be, sore tumas blong talem, i gat wan samting we Baebol i no moa bitim ol narafala buk long hem. Ating hem i no moa stap olsem buk we ol man oli ridim plante bitim ol narafala buk long wol.
Nating se plante man oli gat Baebol samples long haos blong olgeta, plante oli harem se oli bisi tumas nao oli no gat taem blong ridim Baebol. Long taem bifo, fasin blong rid i wan samting we man i laekem blong mekem blong spel. Be, naioa, plante man oli laekem moa blong spenem fri taem blong olgeta blong lukluk televisin no mekem sam narafala samting. Olgeta we oli gohed blong rid yet, oli laekem moa blong ridim samting we oli no nidim blong yusum plante paoa blong tingting blong ridim mo i isi nomo. Blong ridim Baebol, man i nidim blong tingting dip, mo bighaf blong ol man oli no moa tingting dip long wanem oli stap ridim.
Nating se i olsem, Baebol i no bin stap sef kasem naoia blong yumi livim nomo i stap long ples blong putum buk. I gat gudfala risen from wanem yumi mas ridim. Traem tingbaot sam samting long saed blong Baebol.
!I No Wan Sapraes Se Hem i Stap Kasem Naoia!
Nem ya “Baebol” i kamaot long Grik tok ya bi·bli΄a, we i minim “ol smol buk.” Samting ya i mekem yumi tingbaot se i gat plante buk we oli mekemap Baebol—!samfala oli no smol tumas! Oli raetemdaon ol buk ya long wan taem we i kavremap wan taosen sikis handred yia. Nating se ol man nomo oli raetem, be wan bigfala Paoa we i hae moa i bin givim ol tok ya long olgeta. Wan man blong raetem Baebol i bin talem se: “I no gat tok blong profet we i kamaot from we man nomo i wantem olsem. Taem tok blong profet i kamaot, ol profet oli talem, be tabu speret i stap givim tok long olgeta, nao oli talemaot tok we i kamaot long God.” (2 Pita 1:21) Samting ya we i tru long saed blong ol profet tok blong Baebol i tru tu long ol narafala haf blong Baebol. “Ol smol buk” ya we tabu speret blong God i pusum ol man blong raetem, oli fulap long ol tingting blong Jeova God we oli hae moa. (Aesea 55:9) !Yumi no sapraes se Baebol i bin stap longtaem kasem naoia!
Long laef blong ol man blong God, Baebol i stap oltaem olsem wan buk we i impoten moa long ol narafala buk. Oli agri wetem aposol Pol, we hem i wan long ol man blong raetem Baebol. Hem i talem se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok.” (2 Timote 3:16) From samting ya, Baebol i stampa blong bilif blong ol Wetnes blong Jeova tede. Hem i mekem disisen blong olgeta long ol stampa tijing blong olgeta mo i stap lidim olgeta long ol fasin blong olgeta. Wetem fulhat blong olgeta, oli askem se evriwan i mas ridim wan smol haf blong Tok blong God evri dei mo tingting dip wetem fasin tangkyu long samting we i stap insaed long hem.—Ol Sam 1:1-3.
Fasin Blong Ridim Baebol Oltaem
Fasin blong ridim Baebol oltaem i bin mekem i gud long ol man long taem bifo. Ol king blong Isrel oli kasem oda ya se olgeta wanwan oli mas raetem prapa kopi blong olgeta blong Loa—naoia wan impoten haf blong Baebol—mo oli mas ridim evri dei olsem wan samting we i mekem olgeta oli tingting oltaem long ol wok we God i wantem olgeta blong mekem. (Dutronome 17:18-20) Fasin les blong mekem samting ya i mekem se plante king oli foldaon.
Profet Daniel we i olfala finis, i soemaot from wanem i impoten blong stadi long Baebol. From prapa stadi we hem wan i mekem long ol haf blong Baebol we oli stap long taem blong hem, Daniel, taem i stap long kalabus long Babilon, i save ‘kasem save tru long ol buk’ se wan impoten profet tok we Jeremaea i raetem finis kolosap bambae i kamtru.—Daniel 9:2.
Taem Jisas i bon, ‘stret man mo man blong prea ya’ Simeon, i save se bambae hem i luk hemia we bambae i kam Kraes, no Mesaea. Simeon i bin kasem promes ya se bambae hem i luk Kraes bifo hem i ded. Tok we hem i talem we i kolosap sem mak long profet tok blong Aesea, taem hem i stap holem smol pikinini ya Jisas long han blong hem, i soem se Simeon i wan man blong ridimgud ol buk blong Baebol we oli bin raetem bifo long taem blong hem.—Luk 2:25-32; Aesea 42:6.
Taem Jon Baptaes i stap prij, “ol man oli stat harem i gud tumas long tingting blong olgeta” from oli stap wet long Mesaea. ?Samting ya i soem wanem? I soem se plante man Jyu oli savegud ol profet tok long saed blong Mesaea we oli stap long Baebol. (Luk 3:15) Samting ya i pulum intres blong yumi tumas, from long taem ya, i no gat plante buk we man i save ridim. Oli mas hadwok blong mekem ol kopi blong ol buk blong Baebol wetem han blong olgeta nomo, mo from we oli mekem wetem han, oli sas tumas mo i had blong man i kasem wan. ?Olsem wanem ol man oli kasem gudfala save long ol haf blong Baebol?
Plante taem, oli mekem olsem from we i gat fasin i stap blong ridim Baebol long pablik ples. Eksampel, Moses i givim wan oda se long wan stret taem, oli mas ridim olgeta Loa we God i givim, long ol man Isrel we oli kam hivap wanples. (Dutronome 31:10-13) Long faswan handred yia K.T., fasin blong ridim ol buk blong Baebol long pablik ples i go long plante ples. Disaepol Jemes i talem se: “Longtaem finis, insaed long ol haos blong prea blong ol man Isrel, evri wik long Sabat dei, i gat ol man we oli stap ridim Loa blong Moses. Mo ol man oli stap talemaot ol tok blong hem long evri taon.”—Ol Wok 15:21.
Tede, i isi nomo blong ol man oli gat wan prapa kopi blong Baebol blong olgeta. I gud tumas we “ol smol buk” ya no sam long olgeta oli stap long lanwis blong 98 pesen blong ol man long wol. Taswe, sore tumas blong luk se plante oli no intres blong faenemaot wanem Baebol i stap talem long olgeta. Yumi stap long taem we wok blong sayens i kam antap bigwan, be Tok blong God, Baebol, i stap yet olsem buk we i hae moa long ol narafala buk blong ‘tijim ol man long ol trutok.’ I givim ol gudfala advaes long ol fasin blong man, fasin joen blong ol man, mo plante narafala samting. Antap moa, Baebol i givim wan trufala hop ya nomo blong wan fyuja we i gat pis long hem.
Ridim Oltaem
From samting ya, ol Wetnes blong Jeova oli mekem olsem wan bigfala haf blong wok blong olgeta blong leftemap tingting blong ol man blong ridim Baebol oltaem. Long faktri blong wol hedkwota blong olgeta long Bruklin, Nyu Yok, oli raetem advaes ya long bigfala leta se: “RIDIM HOLI BAEBOL WE I TOK BLONG GOD EVRI DEI.” Plante milyan man we oli stap pas long ples ya oli bin luk ol tok ya, mo mifala i hop se bambae plante oli folem tok ya.
Long moa long 73,000 kongregesen blong ol Wetnes blong Jeova long olgeta ples long wol, oli stap mekem miting ya Tiokratik Skul evri wik. Wan haf blong program ya hemia blong ridim long fored blong ol man wan haf blong Baebol we oli jusum finis. Olgeta we oli lesin oli gat wok tu blong ridim sam japta blong Baebol evri wik long prapa haos blong olgeta. Olgeta we oli gohed blong folem program ya bambae oli save ridim ful Baebol.
Plan ya i laenap wetem wan long ol buk we oli stap yusum long skul ya. Theocratic Ministry School Guidebook i talem se: “Long prapa program blong yu i mas gat taem blong ridim Baebol tu. I gud tumas blong ridim ful Baebol. . . . Be, mak blong yu taem yu ridim, i no blong finisim nomo, be blong kasem save long bigfala mining blong hem wetem tingting blong holem i stap long maen blong yu. Tekem taem blong tingting dip long wanem hem i talem.”
Ol narafala buk we ol Wetnes blong Jeova oli wokem oli leftemap tingting blong man tu blong ridim Baebol. Eksampel, long magasin ya, Wekap!, we i joen wetem hemia we yu stap ridim, i bin gat tok ya blong leftemap tingting blong ol yangfala: “?Yu yu ridim . . . Baebol fulwan finis? Yes, Baebol i wan bigfala buk, be i gud blong katkatem i go long ol smosmol haf blong ridim. . . . Ol man Berea we ‘oli moa glad blong tingbaot ol tok’ blong hem, oli stap ‘ridimgud ol tok blong Baebol evri dei.’ (Ol Wok 17:11) Sipos yu stap folem wan program blong ridim Baebol long 15 menet nomo evri dei . . . , yu save ridim Baebol fulwan long wan yia.” Yes, ol Wetnes blong Jeova oli harem se ol Kristin blong tede oli mas savegud Baebol, olsem ol man blong God long taem bifo.
Wetem samting ya long tingting blong olgeta, ol Wetnes oli leftemap fasin blong rid long pablik ples long taem blong yumi. Oli bin rikodem ful Baebol taem wan man i stap ridim, long ol kaset long plante defren lanwis. Samting ya i wan gudfala help long plante man blong winim sam problem we i blokem olgeta blong ridim Baebol. Samfala oli lesin long ol kaset ya taem oli stap wok long haos, taem oli stap ron long trak, no taem oli stap mekem sam narafala samting bakegen. Blong sidaon mo lesingud long kwaet ples long riding long wan haf blong Baebol, mo long semtaem yu folem long prapa Baebol blong yu, i wan samting we i mekem man i haremgud tumas.
Sipos yu no stap ridim Baebol evri dei, i gud blong mekem i kam wan fasin blong yu. I no nidim blong tekem longfala taem evri dei, be frut we i kamaot long hem bambae i bigwan, from we taem yu mekem ol tok blong Baebol i wok long laef blong yu, bambae i mekem yu yu waes long ol samting we yu mekem, mo bambae yu haremgud long saed blong speret long laef blong yu. Mo tu, bambae yu stap folemgud oda ya we Josua, lida blong ol man Isrel, i bin kasem bifo, se: “Buk ya blong loa i no mas lus long maot blong yu, mo yu mas ridim long tingting blong yu long dei mo long naet, blong yu save lukaotgud blong mekem olgeta samting we oli raetem insaed; nao bambae yu save win long rod blong yu mo bambae yu save wok long fasin waes.”—Josua 1:8.
Ol pej blong Baebol oli soemaot stampa tingting blong Jeova we bambae i mekem i kamtru wetem lav, long ol man we oli obei long hem. Fasin blong kasem stret save long Tok blong hem we i kamaot from tabu speret, i givim trufala glad long yumi mo i givim hop blong laef foreva long Paradaes long wan nambawan nyufala wol we ol blesing bambae oli no save finis long hem. (Luk 23:43; 2 Pita 3:13) Yu mas holem jans blong yu blong ridim mo stadi Baebol mo traehad blong kasem nambawan laef ya.