Ol Raeting We i Gat Spesel Mining

“IEHOVA SIT TIBI CUSTOS”

OL TOK ya we oli raetem long fored long wol blong haos long Selerina, is Swiselan, long ol yia 1600, i minim “Jeova bambae i lukaotgud long yu.” Long ol hil blong ples ya, plante taem ol man oli save luk nem blong God we oli raetem no pentem plante handred yia finis long ol olfala haos, jyos, mo haos blong ol pris mo pasta. ?Olsem wanem ol man oli savegud nem blong Jeova?

Raetia bifo (hemia sam haf blong ol ples ya we naoia oli kolem saot-is Jemani, Ostria, mo is Swiselan) i kam aninit long rul blong Rom long 15 B.K.T. Ol man we oli stap long hem oli lanem lanwis Romans, we i kamaot long Latin lanwis, mo i kam ol defren lanwis we oli stap toktok long olgeta yet long sam flat ples long medel blong ol hil blong Alpaen long Swiselan mo not Itali.

Biaen, oli tanem sam haf blong Baebol long lanwis blong Romans. Wan buk, Biblia Pitschna, i gat Ol Sam mo Kristin Grik haf blong Baebol long hem. Long Baebol ya, we oli wokem long 1666, nem ya Iehova i kamaot plante taem long Ol Sam. From we long taem ya Baebol i bigfala samting we oli ridim long evri haos, ol man we oli stap ridim Biblia Pitschna oli savegud nem blong Man ya We i Wokem olgeta samting.

Be, ol man we oli kam biaen, oli lusum intres long Baebol. Plante oli no wantem save wanem mining blong tok ya, “Iehova,” mo ol pasta mo pris oli no traem blong eksplenem. Taswe, ol raeting ya oli kam olsem samting blong flasem haos, we oli soemaot ol samting blong ol yia bifo.

Long ol yia we oli jes pas i no longtaem, nambawan wok blong tijim bakegen ol man i kamaot. Ol Wetnes blong Jeova oli kam long ol flat ples blong Swiselan, ale oli spenem taem we oli spel long wok blong olgeta long ol naesfala ples ya bitwin long ol hil, mo oli stap traem blong tijim ol man long saed blong God ya we nem blong hem Jeova. Sam Wetnes oli kam stap long ples ya blong oli save spenem moa taem blong toktok wetem ol man long nambawan stampa tingting blong Man ya we i Wokem olgeta samting, long saed blong fyuja blong wol mo man. Taswe, ol olfala raeting ya blong Romans oli stap tekem nyufala mining taem ol man oli kasem save long trufala God ya, Jeova.

[Tok blong pija long pej 32]

IEHOVA PORTIO MEA: Jeova yu yu olgeta laef blong mi.—⁠Lukluk Ol Sam 119:⁠57