Wan Kwestin
Jisas i kamaot long laen blong Jese mo Deved, ale ?from wanem oli kolem hem “rus” blong ol bubu blong hem, Jese mo Deved?
Oltaem yumi stap tingbaot rus blong wan tri no wan plan olsem we i fastaem long stampa no long ol han blong hem. Taswe yumi save ting se oli mas kolem Jese (no pikinini blong hem Deved) rus we Jisas i kamaot long hem. Be, Aesea 11:10 i talem bifo finis se Mesaea we bambae i kam, hem i “rus blong Jese,” mo Rom 15:12 i tokbaot profet tok ya se i laenap long Jisas Kraes. Biaen, Revelesen 5:5 i singaot hem ‘Laeon long laen blong Juda, rus blong Deved.’ I gat risen from wanem oli singaotem hem olsem.
Plante taem Baebol i yusum wan plan, no wan tri, olsem wan pija tok. Samtaem samting ya i kamaot from risen ya se taem wan sid i kamaot mo i stap gru, ol rus oli kamaot bifo ol faswan han blong hem, ol narafala han, no frut, hemia evri samting we ol rus oli sapotem. Eksampel, yumi ridim olsem long Aesea 37:31 se: “Olgeta we oli ronwe long haos blong Juda, we oli stap yet, bambae oli mekem rus i godaon mo karem frut i go antap.”—Job 14:8, 9; Aesea 14:29.
Sipos wan samting i spolem rus, olgeta haf blong tri oli kasem trabol from. (Skelem Matyu 3:10; 13:6.) Folem tingting ya, Malakae i bin raetem se: “ ‘Dei ya we i stap kam bambae i spolem olgeta,’ Jeova blong ol ami i talem, ‘nao bambae i no letem wan rus no han blong olgeta i stap.’ ” (Malakae 4:1) Mining blong hem i klia—spolem fulwan. Bambae oli spolem fulwan ol papa mama (ol rus), sem mak long ol pikinini blong olgeta (ol han).a Samting ya i soemaotgud responsabiliti we ol papa mama oli gat long ol pikinini blong olgeta we oli no bigwan yet; maet fyuja blong ol pikinini we oli no bigwan yet i dipen olsem wanem ol papa mama oli stanap fored long God.—1 Korin 7:14.
Tok long Aesea 37:31 mo Malakae 4:1 i stanap long tingting ya se ol faswan han (mo ol frut long ol han we oli kamaot biaen) oli kasem laef tru long rus. Hemia i stampa poen blong kasem save olsem wanem Jisas i “rus blong Jese” mo “rus blong Deved.”
Long saed blong bodi, Jese mo Deved oli bubu blong Jisas; oli rus, Jisas i olsem gru no faswan han. Aesea 11:1 i talem long saed blong Mesaea we bambae i kam se: “Mo bambae i mas gat wan smol han we i kamaot long stampa ya Jese. Mo wan gru bambae i kamaot long rus blong hem mo i karem frut.” Sem mak long Revelesen 22:16, Jisas i singaotem hem wan olsem ‘Laen blong Deved.’ Be hem i singaot hem wan tu se ‘rus blong Deved.’ ?From wanem?
Long wan rod Jisas i “rus” blong Deved mo Jese from se tru long hem, laen blong olgeta i stap gohed. I no gat man tede we i save pruvum se hem i kam long laen blong Livae, Dan, no Juda, be yumi save sua se laen blong Jese mo Deved i stap gohed yet, from naoia Jisas i stap laef long heven.—Matyu 1:1-6; Rom 6:9.
Jisas i kasem hae ples tu olsem King long heven. (Luk 1:32, 33; 19:12, 15; 1 Korin 15:25) I impoten blong tingbaot samting ya taem yumi tokbaot fasin fren blong hem wetem ol bubu blong hem. Long profet tok, Deved i kolem Jisas Masta blong hem.—Ol Sam 110:1; Ol Wok 2:34-36.
Laswan samting, Jisas Kraes i kasem paoa olsem jaj. Long wan taosen yia rul blong hem we i stap kam, bambae Jese mo Deved tu oli kasem blesing from ransom sakrifaes blong Jisas. Laef blong tufala long wol ya bambae i dipen long Jisas, we bambae i mekem wok olsem “Papa blong Olwe” blong tufala.—Aesea 9:6.
From samting ya, nating se Jisas i kamaot long laen blong Jese mo Deved, haenem we hem i tekem finis, mo wanem we bambae hem i mekem yet, i mekem se hem i gat raet blong oli save singaotem hem se “rus blong Jese” mo “rus blong Deved.”
[Futnot]
a Ol raeting long wan ston long beregraon long Fonisia bifo, i yusum semfala tok. Tok ya i talem long olgeta we oli openem ples blong berem man se: “!I gud se oli no gat rus aninit no frut antap!”—Vetus Testamentum, Epril 1961.
[Foto Credit Line blong pija long pej 31]
Pictorial Archive (Near Eastern History) Est.