?Yu Yu Tingbaot?
?Yu yu bin tingtinggud long ol Wajtaoa we oli jes kamaot i no longtaem? Sipos i olsem, bambae yu faenem i gud tumas blong tingbaot ol poen ya biaen:
▫ ?Wanem stampa fasin we i mekem se man i defren long ol anamol?
Bigfala samting we i defren i long saed blong plan, saes, mo wok blong bren. Long ol anamol, kolosap olgeta wok we bren i mekem oli folem program we i stap finis we yumi kolem se waes we oli bon wetem. Hemia i no sem mak long ol man. God i givim wan fasin long man, hemia se man i save jusum wanem hem i wantem. (Proveb 30:24-28)—4/15, pej 5.
▫ ?Olsem wanem singsing i joen long wosip blong ol man Isrel long haos prea blong olgeta?
Myusek, antap moa ol man blong singsing, oli gat wan impoten ples long wosip, oli no blong tijim ol dip save long saed blong Loa, be blong givim stret tingting mo filing long saed blong wosip. I halpem ol man Isrel blong mekem wosip long Jeova long fasin we i gat paoa mo laef. (1 Kronikel 23:4, 5; 25:7)—5/1, pej 10, 11.
▫ ?Wanem kaen fasin kea nao ol pikinini oli nidim stat taem oli bebi nomo?
Ol papa mama oli mas spenem moa taem mo keagud oltaem long nyufala pikinini we i jes bon. Pol i raetem se: ‘Mo yu yu save tu we taem yu bebi yet, kam kasem naoia, be yu yu savegud ol tok blong Baebol. Tok ya i save mekem yu yu waes, i save lidim yu long rod ya we God i stap yusum blong sevem olgeta we oli bilif.’ (2 Timote 3:15) Ale fasin blong papa mama blong Timote blong keagud long hem, stat taem hem i smol bebi nomo, i long saed blong speret tu.—5/15, pej 11.
▫ ?Wanem ol fo rod blong pruvum se ol mesej blong God we i go long ol man i stap long Baebol?
(1) I no hadwok blong man i kasem wan Baebol. I gat 98 pesen blong olgeta man long wol oli save kasem Baebol. (2) Hem i tru long saed blong histri. Baebol i tokbaot ol trufala samting long histri, i no ol kastom store we oli no gat pruf. (3) Hem i wokgud. Ol loa mo ol rul blong hem oli soem wan fasin blong laef we i givim blesing long olgeta we oli folem ol loa mo ol rul ya. (4) Profet tok. I wan buk we i talem long klia fasin ol samting we bambae oli hapen long fyuja.—6/1, pej 8, 9.
▫ ?Wanem wok man i mas mekem taem hem i kasem save long trufala skul?
Taem yumi faenem trufala skul, yumi mas mekem evri haf long laef blong yumi i joen wetem skul ya. Hem i wan fasin blong laef. (Ol Sam 119:105; Aesea 2:3)—6/1, pej 13.
▫ ?From wanem Baebol stadi blong yu wan i impoten tumas?
Olgeta man blong God oli nidim we glad mo paoa blong olgeta i kam nyuwan bakegen evri dei, mo samting ya i save hapen taem oli faenem ol nyufala poen we oli dip moa long saed blong trutok long Tok blong God. Long rod ya oli stap gohed strong long saed blong speret.—6/15, pej 8.
▫ ?Wanem mining blong tok ya “sin” olsem i stap long Baebol?
Veb blong Hibru mo Grik tok, we oli yusum kolosap oltaem long Baebol blong talemaot “sin,” i minim “mestem,” we i karem tingting ya blong mestem no blong no kasem wan mak. Tufala faswan man mo woman tufala i stap longwe long ol gudfala fasin blong God, from tufala i mestem risen from wanem God i mekem tufala olsem pija blong hem. Samting ya i min se tufala i mekem sin. (Jenesis 2:17; 3:6)—6/15, pej 12.
▫ ?From wanem i no waes blong ridim ol buk blong apostasi?
Sam long ol buk blong apostasi oli yusum ol “tok swit” mo ‘ol gyaman tok’ blong tijim ol gyaman tijing. (Rom 16:17, 18; 2 Pita 2:3) Ol buk blong olgeta oli blong agensem mo daonem narafala man nomo. I no gat wan samting nating insaed we i save leftemap tingting.—7/1, pej 12.
▫ ?Gris i stampa blong demokratik rul?
Long Gris bifo, i gat sam bigfala taon nomo oli stap aninit long demokratik rul, mo long olgeta taon ya tu ol man nomo oli vot. Samting ya i minim se fo long evri faef man long ol ples ya oli no vot. !Yumi no save talem se hemia rul we bighaf blong ol man oli glad long hem no demokratik rul!—7/1, pej 16.
▫ ?Wanem i mekem mared blong tufala we i Kristin i gohedgud?
Taem hasban mo waef tufala i respektem tingting blong God long saed blong mared mo traehad blong folem ol stampa rul long ol Tok blong hem long laef blong olgeta. (Efesas 5:21-33)—7/15, pej 10.
▫ ?Olsem wanem yufala i save haremgud long famle stadi?
Traem blong askem ol kwestin long olgeta pikinini blong mekem se oli joen fulwan long hem. Toktok long gudfala saed blong ol samting mo yusum tok we i stap leftemap tingting, talem gudfala toktok long ol pikinini from fasin ya we oli stap joen long stadi. Yu no jes kavremap ol paragraf we yufala i stadi long hem nomo, be traem kasem hat blong ol pikinini blong yu.—7/15, pej 18.
▫ ?Wanem mining i stap insaed long tok ya: “Taem bambae ol man oli talem se: ‘!Pis mo seftaem!’ ”? (1 Tesalonaeka 5:3, NW)
Makem se Baebol i no talem se ol nesen bambae oli kasem “pis mo seftaem.” Be bambae oli stap tokbaot long wan fasin we i defren, bambae oli soemaot wan strong tingting mo bilif we oli neva soem bifo se wol ya i stap kamgud. Bambae i luk olsem se jans blong kasem pis mo seftaem bambae i kam moa kolosap bitim bifo.—8/1, pej 6.
▫ Talem tri rod we Jeova i yusum blong soem se hem i no stap mekem i strong tumas long ol narafala.
Jeova i soemaot finis we hem i rere blong fogif. (Ol Sam 86:5) Hem i bin soem se hem i rere blong jenisim rod we hem i wantem folem taem ol nyufala samting oli kamaot. (Lukluk Jona, japta 3.) Mo tu, Jeova i soemaot se hem i no stap mekem i strong long narafala long fasin blong hem blong rul. (1 King 22:19-22)—8/1, pej 12-14.