?Weples Yu Save Faenem Advaes Blong Lidim Yu We Yu Save Trastem?
“O JEOVA, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem. Plis Jeova, yu stretem mi.”—Jeremaea 10:23, 24.
Jeremaea i raetem ol tok ya we i stap long Baebol samwe long 2500 yia bifo. Nogud fasin ya blong ol man afta long ol taosen yia we man i lidim man i soemaot se tok ya i tru tumas. Be maet yu save askem se,‘?Weples man i save faenem advaes blong lidim hem we hem i save trastem?’
Vas ya antap i poen i go long stampa blong ol advaes we ol man oli save trastem blong lidim olgeta mo advaes ya i moa gud bitim advaes blong ol man—hemia Man we i Wokem man, Jeova God. I tru i no gat wan man we i savegud long man mo long ol nid blong hem bitim Man ya we i wokem yumi. ?Be, God i intres blong soem rod mo lidim yumi? ?Hem i stap mekem olsem wanem? ?Advaes blong hem i wok long taem blong yumi?
God i Wokem Yumi Long Fasin We Yumi Nidim Hem Blong Lidim Yumi
Ol man oli savegud se wan stampa fasin we i seraotem ol man mo ol anamol, hem i long saed blong plan, saes, mo wok blong bren blong man. Long ol anamol, kolosap olgeta wok we bren i mekem oli folem program we oli kolem se waes we oli bon wetem. Hemia i no sem mak long ol man.—Proveb 30:24-28.
Bren blong man i no olsem bren blong olgeta anamol, bighaf blong bren blong man i no gat ol program we oli stap finis. God i givim wan fasin long man, hemia se man i save jusum wanem hem i wantem, mo from samting ya, man i save mekem ol disisen we oli waes mo wokem ol fasin we oli hae, olsem lav, fasin blong serem mo givim wetem gladhat, fasin blong no tingbaot hem wan nomo, stret fasin, mo waes.
?I stret blong ting se God bambae i wokem man wetem gudfala bren we i naf blong mekem plante samting olsem, be i no soemaot rod blong yusumgud bren ya long hem? God hem wan i lidim faswan man mo woman. (Jenesis 2:15-17, 19; 3:8, 9) Afta we man i foldaon long sin tu, Jeova i gohed blong lidim ol man mo ol woman blong bilif, bigfala rod we hem i yusum, hemia prapa Tok blong hem, Baebol. (Ol Sam 119:105) Samting ya i mekem se ol man oli save winim ol trabol we oli stap fesem long laef evridei taem oli yusum fasin blong olgeta blong jusum wanem we oli wantem long rod we i waes.
God i Stampa Blong Baebol
?Wanem i mekem se yumi save trastem Baebol blong i lidim yumi? Wan samting se, hem i givimaot ol save we Man we i Wokem olgeta samting nomo i save givimaot. Baebol i talemaot histri blong ol samting we oli kamaot bifo we man i stap. Eksampel, hem i tokbaot ol wanwan samting we God i mekem wan afta narawan blong mekemrere wol ya blong i stret blong man i laef long hem. (Jenesis, japta 1‚ 2) Nating se oli raetemdaon samting ya long Baebol moa long 3‚000 yia bifo‚ hem i laenap wetem ol stampa tingting blong sayens tede.
Longtaem bifo we olgeta man oli agri se wol ya i raon, Baebol i bin talemaot se: “[God] i putum ples long not i stap long wan emti ples, hem i stap hangemap wol ya long nating nomo.” (Job 26:7) Antap moa Baebol i talemaot klia se “i gat wan Man i stap antap long raon wol ya, mo hem i luk ol man we oli stap long hem olsem we oli lokis nomo.” (Aesea 40:22) God nomo, Man ya we i Wokem olgeta samting, i save givimaot ol save olsem.
Fasin ya blong lukluk wanem we bambae i kam long fyuja i no wan paoa we God i bin givim long man. Be, Man we i Wokem olgeta samting i talemaot fyuja long ol pej blong Baebol. God i givim Tok long saed blong Hem wan long profet Aesea blong raetemdaon, i talem se: “Mi mi God mo i no gat wan narafala God, no wan we i olsem mi; i stat long stat blong ol samting, mi mi talemaot olsem wanem bambae ol samting ya oli finis. Mo i stat long taem bifo, mi mi talemaot ol samting we oli no kamtru yet.”—Aesea 46:9‚ 10.
Baebol i soemaot klia se long stat blong wan samting hem i talemaot en blong samting ya long fasin ya we i stretgud olgeta. Eksampel, Baebol i talemaot ol bigfala politik paoa blong wol long ol taosen yia blong histri blong man, olsem wanem oli stanap, olsem wanem oli foldaon, mo ol stampa fasin blong olgeta. Ol nambawan profet tok ya, ol man oli raetemdaon plante handred yia bifo we oli kamtru, samtaem plante taosen yia bifo. Olsem nao, Baebol i talemaot stret ol samting we oli stap hapen tede, wetem risal we bambae i kamaot biaen. Baebol i spesel tu from we i soemaot rod blong laef tru long Amageden, “faet long bigfala Dei blong God ya we i gat olgeta paoa,” we bambae i spolem ol kruked gavman we ol man nomo oli stanemap. Kingdom ya blong God long han blong Pikinini blong hem, Jisas Kraes, bambae i mekem bigfala wok ya.—Revelesen 16:14, 16; 17:9-18; Daniel‚ japta 2‚ 8.
I Gud Oltaem—I Neva Mekem Nogud
Waes blong man i no stretgud olgeta; from samting ya, advaes blong man i no givhan oltaem, nating se oli givim wetem gudfala tingting. I no sem mak long advaes blong Baebol. God hem wan i talem se: “Mi, Jeova, mi mi . . . God ya we i stap tijim yu blong givhangud long yu. Mi mi stap mekem yu yu wokbaot long rod ya we yu yu mas wokbaot long hem. !Mi mi wantem tumas we yu lesin gud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae oli kam olsem ol wef blong solwora.”—Aesea 48:17‚ 18.
Advaes blong God we i lidim yumi i halpem yumi blong luksave ol samting we oli impoten long laef blong yumi mo folem ol nambawan rul long laef. Ol man tede oli mekem ol wok mo putum ol mak blong kasem ol samting long saed blong bodi, be Baebol i talem klia se i impoten blong ‘no tingbaot ol samting ya we yumi save luk long ae blong yumi. Yumi stap tingbaot ol samting ya we yumi no save luk. From we ol samting we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.’ (2 Korin 4:18) Rod ya i leftemap tingting blong yumi blong gat ol nambawan mak blong kasem long laef, hemia ol mak long saed blong speret we oli joen wetem wok ya blong mekem wil blong God, mo mak ya we i bigfala olgeta, hemia laef we i no save finis long wan nyufala wol we i gat stret fasin nomo long hem.
Taem wan Kristin i traehad blong kasem ol hae mak ya‚ advaes blong Baebol i givhan long hem blong folem fasin blong laef we i beswan long medel blong ol rabis fasin blong naoia. Waes blong ol man blong naoia i leftemap tingting ya blong wok smol mo kasem plante mane. Defren olgeta, Baebol i talem long yumi se “man we i wok wetem han we i slak bambae i kasem smol nomo, be han we i gat paoa bambae i mekem man i rij.” Aposol Pol i raet i go long ol Hibru Kristin se: “Mifala i no harem olsem we tingting blong mifala i stap jajem mifala, mifala i stap harem gud nomo. Mo mifala i wantem tumas we oltaem mifala i stap mekem i stret nomo.”—Proveb 10:4; Hibrus 13:18.
Baebol i givim ol advaes we i save wokgud tu insaed long famle. Hem i talemaot klia prapa wok blong hasban mo waef insaed long mared, wetem nambawan rod blong trenem mo tijim ol pikinini. Hem i talem se: ‘Man i mas laekem woman blong hem, i mas lukaotgud long hem, olsem we i stap lukaotgud long bodi blong hem nomo. . . . Mo woman i mas onagud long man blong hem. Yufala pikinini, . . . yufala i mas obei long papa mo mama blong yufala. . . . Yufala ol papa, bambae yufala i no agensem ol pikinini blong yufala oltaem. Fasin ya bambae i mekem olgeta oli kros. Yufala i mas lukaotgud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.’ Fasin blong folem advaes we i hae moa blong Man we i Wokem olgeta samting, bambae i givhan bigwan blong mekem ol famle oli stanap strong mo oli glad.—Efesas 5:21 kasem 6:4.
Wan Fyuja We i Sef Blong Olgeta We Oli Folem Rod We God i Soemaot
Tok blong God we ol man oli raetemdaon i soemaot rod blong God blong winim olgeta trabol blong ol man. I no longtaem Jeova God bambae i karemaot olgeta fasin blong wol ya, wetem olgeta soa blong hem, ol kruked fasin mo ol fasin we oli mekem man i harem nogud, mo bambae i mekem i kam wan nyufala wol we stret fasin i stap long hem. Baebol i talem samting ya long 2 Pita 3:7-10, mo i ademap long vas 13 se: “God i promes finis blong putum nyufala skae mo nyufala wol, we stret fasin nomo bambae i stap long hem. Mo yumi stap wet long ol nyufala samting ya.” Hemia beswan gud nyus we eniwan i save givim long olgeta man. Hemia nao stret mesej we Baebol i talemaot mo we ol Wetnes blong Jeova oli stap talemaot long moa long 200 kantri mo ol aelan blong solwora.
Taem olgeta samting we God i wantem oli kamaot long olgeta ples long wol, bambae olgeta man long wol oli haremgud taem oli folem ol nambawan advaes blong lidim yumi we i kamaot long Man blong Wokem olgeta samting, Jeova. Bambae i no moa gat trabol blong fasin pua, fasin blong brekem loa, mo ol drag. Bambae ol man oli no moa gat sik‚ kam olfala mo ded. Famle blong man bambae oli kam stret olgeta olsem faswan papa mama blong yumi, bifo we oli agensem fasin blong God blong lidim olgeta.
!Las buk blong Baebol i givim nambawan toktok blong talem fasin glad blong olgeta we oli putum tras blong olgeta long God blong lidim olgeta! Revelesen 21:4‚ 5 i talem se: “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” Man ya we i Wokem yumi i mekem promes long samting ya se: “!Yu luk! Mi mi stap mekem olgeta nyufala samting.” Hem i ademap se: “Tok blong mi i tru, mo ol man oli save bilif long hem.”
Blong bambae yumi kasem ol blesing ya, ?God i wantem blong yumi mekem wanem? Aposol Pol i eksplenem se “God ya, hem i wantem sevem olgeta man, mo i wantem olgeta man bambae oli faenem trutok.” (1 Timote 2:4) Ol Wetnes blong Jeova oli glad blong invaetem yu blong stadi dip long Baebol blong kasem stret save ya blong trutok. Taem yu traehad blong lanem wil blong God, yu tu yu save luksave from ol ekspiryens blong yu se yu save trastem waes blong God nomo blong lidim yu long ol nogud taem ya. !Taem ya i denja tumas, taswe i moa impoten blong folem naoia bitim bifo!