Baebol i Talem Wanem

?From Wanem Yumi Mas Lukluk i Go Long Baebol Blong i Lidim Yumi?

“Olgeta tok blong Baebol oli kamaot long spirit blong God, mo oli gud blong tijim man, mo blong tok strong long man from olgeta fasin nogud blong hem, blong mekem ol samting oli stret bakegen.”​—⁠2 Timoti 3⁠:​16, NW.

?WEPLES yu yu kasem advaes blong lidim yu long laef blong yu? Tede i gat fulap advaes we man i save kasem long saed blong defdefren samting. Nating se i olsem be plante man oli lukluk i go long Baebol blong i lidim olgeta.

Be, long taem naoia we i gat ol niufala teknoloji olsem kompiuta, bighaf blong ol man oli luk Baebol olsem wan buk we i no impoten. Sam tija mo sam man blong saens, we ol man oli respektem olgeta, oli givim tingting ya se Baebol i no moa impoten long laef blong man. ?Samting we oli talem i tru? Tede, i gat plante ples we man i save kasem advaes long olgeta. ?From wanem man i mas lukluk i go long Baebol blong kasem advaes?

Wan Buk Blong Trutok

Wan taem, Jisas i stap spel klosap long wan wel mo i stap storian wetem wan woman Sameria. Hem i talem long woman ya se: “God hem i wan Spirit, mo olgeta we oli mekem wosip long hem, oli mas wosip long spirit mo trutok.” (Jon 4⁠:​24, NW ) Ol tok ya oli soemaot se i gat wan fasin blong wosip we God i agri long hem. Blong wosip we yumi mekem i laenap wetem trutok, wosip ya i mas joen wetem wanem we God i talem long Baebol long saed blong hem wan. Trutok i stap long Baebol.​—⁠Jon 17⁠:⁠17.

Be i gat plante skul we oli talem se oli bilif long Baebol mo i luk olsem se wanwan long ol skul ya oli tijim samting we i defren long narawan. From samting ya, plante man oli konfius mo oli no save stret wanem we Baebol i rili tijim. Plante skul oli talem se oli save trutok long saed blong ol kwestin ya se, ?Jisas hem i God no hem i Pikinini blong God? ?I gat laef afta ded no nogat? ?Helfaea hem i wan trufala ples we ol man oli stap harem nogud long hem afta we oli ded? ?Setan i rili wan man? ?I minim wanem blong stap olsem wan Kristin man? ?God i rili intres long ol fasin mo ol tingting blong yumi? ?Trufala lav i minim se man i save slip tugeta bifo mared? ?I rong blong dring ol strong dring?a Be ol ansa no tingting we wanwan skul i givim long ol kwestin ya i agensem wanem we narafala skul i talem. Hemia i soemaot we i no enikaen tijing nomo we oli trutok.​—⁠Matiu 7⁠:​21-23.

?Olsem wanem yu yu save faenem trutok long saed blong God mo fasin ya blong wosip we God i glad long hem? Traem tingbaot se yu gat wan sik mo yu nidim we dokta i katem yu. ?Bambae yu yu mekem wanem? Sipos yu naf, ating bambae yu traem bes blong yu blong faenem beswan dokta we i nafgud mo we i bin katem man finis from wan sik we i olsem sik blong yu. Ating bambae yu luk ol pepa blong hem, ekspiriens we hem i gat, yu ring long hem mo toktok wetem hem. Biaen, afta we yu suagud wetem ol pruf se hem i beswan dokta, bambae yu trastem hem mo yu letem hem i katem yu. Ol narafala maet oli gat defdefren tingting. Be tingting blong yu long dokta ya bambae i stap strong.

Long sem fasin, sipos yu lukaot ol pruf we oli tru, bambae yu save bildimap bilif blong yu long God mo Baebol. (Ol Proveb 2⁠:​1-4) Yu wan yu save jusum ples we bambae yu lukluk i go long hem blong faenemaot ansa blong ol kwestin long saed blong wosip we God i glad long hem. Yu save luk i go long ol defdefren kaen tijing no tingting blong ol man, no yu save luk tingting blong Baebol.

I Stretgud Mo i Wok

Taem yu luklukgud insaed long Baebol, bambae yu faenem pruf se “olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud.”b (2 Timoti 3⁠:​16, 17) Baebol i fulap long ol profet tok. Ol buk blong histri oli givim pruf se ol profet tok blong Baebol oli kamtru. (Aesea 13⁠:​19, 20; Daniel 8⁠:​3-8, 20-22; Maeka 5⁠:⁠2) Baebol i no wan buk blong saens be hem i laenap wetem saens. Baebol i tokbaot ol samting raonabaot long yumi mo ol samting long saed blong helt blong yumi we plante taosen yia biaen nomo ol saentis oli jes faenem.​—⁠Levitikas 11⁠:​27, 28, 32, 33; Aesea 40⁠:⁠22.

Antap moa, Baebol i halpem yumi blong mekem ol waes desisen. Insaed long Baebol i gat plante advaes we oli wokgud insaed long famle laef, blong lukaotgud long bodi mo filing, long ples blong wok mo long ol nara samting long laef. Ol Proveb 2⁠:​6, 7 i se: “[Jeova] nomo i save mekem man i waes. Fasin blong save mo fasin blong haremsave, tufala i stap kamaot long hem nomo. Hem i stap givhan long ol stret man we oli no save giaman.” Taem yu luk long Baebol blong i lidim yu, paoa blong tingting blong yu i save kam moagud “blong jusumaot wanem fasin i gud mo wanem fasin i nogud.”​—⁠Hibrus 5⁠:⁠14.

Baebol i halpem yumi blong kasem save mining blong laef. (Jon 17⁠:3; Ol Wok 17⁠:​26-27) Hem i eksplenem from wanem i gat trabol long wol. (Matiu 24⁠:​3, 7, 8, 14; 2 Timoti 3⁠:​1-5) Long Baebol, God i soemaot long yumi olsem wanem hem bambae i finisim ol nogud fasin long wol ya mo i givim janis long ol man blong haremgud long bodi blong olgeta we i stretgud mo gat laef we i no save finis.​—⁠Aesea 33⁠:24; Daniel 2⁠:44; Revelesen 21⁠:​3, 4.

Plante milian man oli luksave se Baebol nomo i buk we yumi save dipen long hem mo trastem olsem stamba blong trufala waes. Mifala i askem yu blong ridim olgeta haf ya se “Baebol i Talem Wanem,” we bambae i kamaot long evri Wekap! magasin. Taem yu mekem olsem, bambae yu faenem moa pruf we i soemaot se Baebol i beswan ples blong kasem advaes blong lidim yu long laef blong yu.

[Ol futnot]

?YU YU BIN TINGBAOT?

◼ ?Wanem fasin blong wosip we God i glad long hem?​—Jon 4:24

◼ ?Yu mas mekem wanem blong yu save haremgud long waes blong God?​—Ol Proveb 2:​1-4

◼ ?Long wanem rod Baebol i stamba ples blong kasem advaes we i save lidim man long laef?—Hibrus 5:14