Paoa Blong Wan Tok We i Kaen
“!Wan hat we i slak from wari, wan tok we i kaen i save mekem hem i haremgud bakegen!”—Proveb 12:25, Knox.
OL KRISTIN oli no fri fulwan long ol hadtaem. Samtaem i gat sam samting we i mekem oli wari, from we oli stap long taem ya we ‘laef blong wol i strong tumas.’—2 Timote 3:1.
!Taem oli stap harem nogud long wan trabol, i wan bigfala blesing blong harem ol toktok we oli kaen, we wan trufala fren i talem! Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Proveb 17:17) Job, wan man we i fasgud long God, ol man oli save hem from we hem i wan fren olsem. Elifas tu i tokbaot hem se: “Taem wan man i stambol, i no moa gat paoa mo i taed, ol tok blong yu oli leftemap tingting blong hem blong stanap strong.”—Job 4:4, Today’s English Version.
Be taem Job hem wan i nidim wan man blong leftemap tingting blong hem, Elifas mo ol fren blong hem oli no talem ol toktok we oli kaen. Oli talem se Job i gat fol from trabol blong hem, mo se hem i mas gat sam sin we oli stap haed. (Job 4:8) The Interpreter’s Bible i talem se: “Samting we Job i nidim, hemia fasin sore we i kamaot long hat blong wan man. Samting we hem i kasem, hemia ol toktok we oli rili ‘tru’ mo oli rili naes, olsem tok blong wan man blong skul mo ol tok long saed blong fasin we oli daonem tingting blong man.” Job i harem nogud tumas long tingting blong hem taem hem i harem ol tok blong Elifas mo ol fren blong hem, mekem se hem i krae bigfala se: “?Gogo kasem wetaem bambae yufala ol man, yufala i gohed blong mekem sol blong mi i kros mo kilim mi wetem ol toktok?”—Job 19:2.
Yumi neva mas talem ol tok we oli no kaen mo we yumi no tingtinggud long olgeta fastaem, blong mekem wan Kristin we i stap mekem wok blong God i harem nogud mo i krae bigfala. (Lukluk Dutronome 24:15.) Wan proveb blong Baebol i givim woning se: “Samting we yu talem i save sevem laef no i save spolem laef; taswe yu mas akseptem ol frut blong ol tok blong yu.”—Proveb 18:21, TEV.
I gud yumi luksave paoa blong ol toktok blong yumi, mo folem eksampel blong aposol Pol. Taem hem i stap long Masedonia, hem i stap “talem plante tok blong mekem tingting blong ol man i strong.”—Ol Wok 20:2.