‘Yu No Harem Nogud Olsem We Ol Narafala Oli Harem Nogud’

?YU YU luk wan flaoa afta we strong win wetem ren i kam mo i benem hem i godaon? Long wan rod samting ya i save tajem hat blong yu. Yes, ren we i foldaon bigwan i mekem fulap anamol mo man​—⁠we oli strong moa bitim eni flaoa​—⁠oli ronwe blong lukaot ples blong haed. Be, flaoa ya i stap stanap long ples blong hem, rus blong hem i stapgud long graon, i fesem ful paoa blong strong win ya. Naoia, flaoa ya i stap yet, i bendaon be i no brok, i soemaot wan paoa we yumi no ting se i gat from hem i sofsof nomo. Taem yu stap lukluk flaoa ya, maet yu wantem save sipos bambae i kamgud bakegen mo leftemap hem wan long skae bakegen.

I sem mak wetem ol man. Long ol trabol taem ya, yumi fesem ol defren samting we oli olsem strong win mo ren. Ol hadtaem long saed blong mane, tingting i foldaon, no gat gud helt long saed blong bodi, lusum wan we yumi laekem tumas long ded​—⁠ol strong win olsem oli kasem yumi evriwan samtaem, mo samtaem yumi no save blokem olgeta olsem we flaoa ya i no save kamaot long graon mo ronwe blong lukaot ples blong haed. I tajem hat blong yumi blong luk ol wanwan man we i luk olsem oli no strong nating, be oli soemaot paoa we yumi sapraes long hem mo oli stanap strong agensem ol trabol we oli fesem. ?Oli mekem olsem wanem? Plante taem bigfala samting ya se bilif. Jemes, haf brata blong Jisas, i raetem se: “Yufala i save, taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.”​—⁠Jemes 1:​3, Today’s English Version.

Narafala bigfala samting se hop. Eksampel, taem wan we yu laekem hem tumas i ded, hop i save givhan bigwan long ol man we oli harem nogud from. Aposol Pol i raet i go long ol Kristin long Tesalonaeka se: “Ol brata mo sista. Mifala i wantem we bambae yufala i savegud ol trutok blong weswe long olgeta ya we oli ded finis. Mifala i no wantem we bambae yufala i stap harem nogud from olgeta ya, olsem we ol narafala man ya we tingting blong olgeta i no stap long God, oli stap harem nogud from ol dedman blong olgeta.” (1 Tesalonaeka 4:13) I tru se ol Kristin tu oli harem nogud from wan we i ded, be i gat wan samting i defren. Oli gat stret save long saed blong ded mo long saed blong hop blong laef bakegen.​—⁠Jon 5:​28, 29; Ol Wok 24:⁠15.

Save ya i givim hop long olgeta. Mo biaen, sloslou, hop ya bambae i daonem fasin blong harem nogud. Hop bambae i halpem olgeta blong stanap strong mo blong soem plante narafala fasin tu. Afta we sam taem i pas, olsem flaoa ya afta long strong win mo ren, oli save leftemap hed blong olgeta we oli no moa harem nogud mo faenem glad mo mining blong laef bakegen.