?Yu Yu Tingbaot?

?Yu yu faenem se ol Wajtaoa we oli jes pas oli givhan long yu? Ale i gud blong traem save blong yu wetem ol kwestin we oli kam biaen:

▫ ?From wanem ol Wetnes blong Jeova oli gohed blong visitim ol man we oli laef kolosap long olgeta?

Ol Wetnes blong Jeova oli wantem kasem blesing blong God, mo from oli laekem ol man raonabaot long olgeta, oli wantem blong ol man ya tu oli kasem sem blesing ya. Taswe, oli folem eksampel blong Jisas, oli harem se oli mas visitim ol man raonabaot long olgeta from we lav ya we i stanap long fasin blong no tingbaot olgeta wanwan fastaem, i pusum olgeta blong mekem olsem. (Matyu 6:​9, 10; 22:​37-39)​—⁠8/15, pej 8, 9.

▫ ?From wanem bilif long evolusen i wan bisnes long saed blong bilif?

Ol sayentis oli neva luk wan samting i jenis i go long narafala samting​—⁠nating se samting ya i gud​—⁠we i mekem nyufala laef; be oli sua se hemia nao rod we ol nyufala samting oli kamaot long hem. Oli no bin luk wan i kamaot wantaem blong mekem laef i stat; be oli talem se hemia nao fasin we laef i kamaot long hem.​—⁠9/1, pej 5.

▫ ?Wanem beswan rod blong yumi winim tingting we i foldaon from ol mak we yumi no mas bitim long laef?

Nating se laef blong yumi i olsem wanem, sipos yumi mekem ol samting we yumi save mekem bitim we yumi harem nogud long ol samting we yumi no save mekem, bambae yumi haremgud long laef, mo bambae yumi faenem glad long wok blong Jeova. (Ol Sam 126:​5, 6)​—⁠9/1, pej 28.

▫ ?Wanem gudfala frut i kamaot from fasin blong fogivim narafala?

Fasin blong fogivim narafala i mekem ol man oli frengud (Efesas 4⁠:32); i mekem pis i stap. Hemia i no pis wetem narafala nomo be pis insaed long yumi. (Rom 14⁠:19; Kolosi 3⁠:​13-15); fasin blong fogivim narafala i mekem rod blong God i fogivim ol sin blong yumi (Matyu 6⁠:14); mo tu, i halpem yumi blong tingbaot oltaem se yumi tu yumi nidim se ol narafala oli fogivim yumi. (Rom 3:23)​—⁠9/15, pej 7.

▫ ?Olsem wanem eksampel blong profet Emos i halpem yumi long wok blong yumi blong prij?

Olsem Emos, yumi no jenisim no daonem mesej blong God. Be, yumi obei, ale yumi talemaot mesej ya nating se ol man oli mekem olsem wanem long yumi.​—⁠9/15, pej 17.

▫ ?Wanem ol fasin blong Jeova we yumi mas folem?

Tu impoten wan, hemia fasin blong wok wetem plan mo fasin glad blong hem. (1 Korin 14:​33; 1 Timote 1:⁠11) Ol gudfala fasin ya blong God oli skelgud, ale i no gat wan long olgeta we i hae moa we i mas fosem ol narawan.​—⁠10/1, pej 10.

▫ ?Wanem sam long ol gudfala rod we ol papa mama oli bin folem blong halpem ol pikinini blong olgeta blong mekem wok blong God?

Wan nambawan rod i blong stat eli. Ol tijing we oli kasem mo ol lesen we oli lanem taem oli smol pikinini yet bambae oli stap longtaem. (Proveb 22⁠:6) I impoten blong tijim olgeta blong gat fasin obei mo respek long Jeova mo wosip blong hem long ol miting. Ol papa mama we oli kasem gud frut long saed ya oli lanem blong luksave ol rong fasin, mo oli halpem ol pikinini blong olgeta blong stretem ol rong ya. (Proveb 22⁠:15) Laswan samting, stat eli blong putum ol tiokratik mak blong pikinini blong yu we oli no had blong hem blong kasem.​—⁠10/1, pej 27-8.

▫ ?Wanem fasin blong Jeova blong fogivim man we yumi mas traem blong mekem i wok?

Jeova i fogivim mo fogetem. (Jeremaea 31⁠:34) Samting ya i had tumas blong ol man blong mekem. Jisas i talem from wanem i impoten blong mekem olsem, long Matyu 6:​14, 15.​—⁠10/15, pej 25-6.

▫ ?Wanem trifala samting we oli mekem se yumi no save soem fasin sore?

From bodi blong yumi we i gat sin, i isi nomo we fasin jelas i save gru long hat blong yumi. Sipos yumi jelas long wan man, ?olsem wanem yumi save soem fasin sore wetem kaen fasin long hem? Ol fasin blong faet we yumi jusum blong lukluk i wan narafala samting we i save blokem fasin sore blong yumi. Samting ya i mekem se yumi no gat filing long ol narafala we oli stap harem nogud. Mo tu man we i tingbaot hem nomo, hem tu i no gat fasin sore. (1 Jon 3:17)​—⁠11/1, pej 20.

▫ ?Yumi save lanem wanem long store blong Job long Baebol?

Tok blong Baebol long saed blong Job i mekem yumi lukaotgud moa long ol trik blong Setan mo i halpem yumi blong luk olsem wanem fasin blong rul long heven mo wol ya i joen long fasin blong man blong stap tru long God. Olsem Job, olgeta we oli laekem God bambae oli kasem traem. Be yumi save stanap strong olsem Job i mekem blong pruvum se Setan i man blong gyaman, mo haremgud long ol blesing blong Kingdom blong God.​—⁠11/15, pej 20.

▫ ?Olsem wanem jeaman blong bodi blong ol elda i save soem stret fasin blong luksave ol elda wanwan?

Sipos i gat jans, bifo we ol elda oli mekem miting blong olgeta, i gud we jeaman i askem ol narafala elda blong talemaot tingting blong olgeta, ale hem i save givimaot wan program longtaem lelebet bifo, blong oli save gat inaf taem blong tingtinggud mo prea from ol wanwan poen long program ya. Long taem blong miting blong ol elda, jeaman i no mas traem blong pulum ol narafala elda blong folem tingting blong hem, be hem i mas leftemap tingting blong olgeta blong glad blong talem tingting blong olgeta long bisnes we oli stap tokbaot. (1 Timote 3:13)​—⁠12/1, pej 30.