?Laef i Gud Tumas Long Yu Olsem Wanem?

WAN yangfala boe i ded taem i jyamdaon long namba eit store blong wan haos we i gat plante rum long hem. Hem i bin ridim wan buk we i tokbaot man we i jam long wan ples we i antap tumas blong kilim hem wan i ded, “i no harem i soa, no seksek i no fraet; be, i haremgud.” Man we i raetem buk ya, i wokem long Japan, i talem se hem i givim “fasin ya blong man i kilim hem wan i ded olsem, wan long ol samting we man i mas jusum long laef.”

Ol man we oli kilim olgeta nomo i ded oli no ol olgeta nomo we oli no soemaot respek long laef tede. Olgeta we oli draeva olbaot oli soemaot smol respek nomo long laef. Sam draeva oli dring mo draev, plante oli spid we oli spid blong ded.

Ol narafala oli soemaot olsem wanem oli no tinghevi long laef blong olgeta taem oli tingting moa long ol samting we oli wantem harem gud long hem. Ol man we oli smok oli no wantem lego sigaret, nating se fasin blong smok i save givim ded mo sloslou i save mekem man i ded. Plante oli folem wan fasin blong laef we i olbaot mo i lidim olgeta i go long ded, be oli no holem wan fasin blong laef we i klin long wol ya we i krangke long seks.

Sam oli no luksave, be oli tekemaot sam yia long laef blong olgeta taem oli kakae bitim mak, dring bitim mak, no oli no mekem inaf eksasaes, mo oli stap lukaot ol samting we oli wantem haremgud long hem. Man Japan ya, Shinya Nishimaru i givim woning ya se: “Fasin ya blong kakae bitim mak i spolem ol wok blong bodi, mo laef we i olbaot no fasin blong man i mekem wanem i laekem no i wantem haremgud long hem, i kakae paoa blong man.” Sam man oli gat sem tingting blong olgeta ya bifo we oli talem se: “I gud yumi gohed, yumi kakae, yumi dring, from we tumora bambae yumi ded.”​—Aesea 22:13; 1 Korin 15:32.

Yes, fasin ya blong no lukaotgud long laef i kam bigwan tede. Taswe, i stret blong askem se, ?Olsem wanem laef i gud tumas long yu? ?I gud blong mekem eni samting blong holem laef i stapgud? ?Mo i gat wan samting we i sas moa bitim laef we yumi gat naoia?