Tinghae Long Laef Ya We i Prapa Wan

?I GAT laef ya nomo? Taem Baebol i leftemap tingting blong yumi blong “kasem laef we i prapa wan,” hem i soemaot se i gat wan samting moa. (1 Timote 6:​17-19) Sipos laef we i prapa wan i no laef ya we yumi gat naoia, ?hem i wanem?

Ol vas raonabaot, oli soemaot se hem i “laef we i no save finis,” we man we i fraetgud long God i mas holemstrong long hem. (1 Timote 6:12) Long bighaf blong ol man, hemia i minim laef we i no save finis long wol. Adam, faswan man long wol, i gat tingting blong laef olwe long paradaes long wol. (Jenesis 1:​26, 27) Hem bambae i ded sipos i kakae nomo long “tri blong save wanem samting i gud no wanem samting i nogud.” (Jenesis 2:17) Be, from we Adam mo waef blong hem, Iv, tufala i no wantem obei nao tufala i kakae frut blong tri ya, God i talem se bambae tufala i ded. ‘Long dei ya we tufala i kakae long hem,’ tufala i ded long ae blong God mo laef blong tufala i stat kam nogud gogo oli ded. Oli no moa haremgud long laef blong olgeta olsem fastaem.

Rod Blong Kasem “Laef We i Prapa Wan”

Blong mekem “laef we i prapa wan” i kamtru, Jeova God i mekem plan blong sevem ol man. Blong halpem yumi blong kasem save long plan ya, yumi save tingbaot wan smol faktri. Olgeta mesin long faktri ya oli nogud, oli mekem trabol long ol man blong wok, from we ol faswan man we oli wok sam yia bifo, oli no wantem folem buk we i eksplenem olsem wanem blong yusum ol mesin ya. Ale oli spolem olgeta. Tede ol man we oli stap wok, oli traem bes blong olgeta blong wok wetem wanem we oli gat. Bos blong faktri ya i wantem mekemgud ol mesin ya bakegen blong halpem ol wokman blong hem, mo hem i putum sam mane i stap blong mekem wok ya.

Faswan ‘man we i wok long mesin,’ Adam, i no tinghae long nambawan laef ya we hem i gat. Taswe, hem i pasem nogud laef ya i go long ol laen blong hem, sem mak long mesin we i no wokgud. (Rom 5:12) Ol man ya we biaen oli wok long faktri, oli no save stretem ol samting ya, long sem fasin, ol laen blong Adam oli no save kasem laef ya we i prapa wan, olgeta nomo. (Ol Sam 49:7) Blong stretem nogud samting ya, Jeova i sanem stret Pikinini blong hem i kam long wol blong pembak laef ya we i no save finis blong olgeta man. (Luk 1:35; 1 Pita 1:​18, 19) Taem hem i ded olsem wan sakrifaes from ol man, Pikinini blong God, Jisas Kraes, i pem praes ya​—hemia sem laef ya we Adam i lusum. (Matyu 20:28; 1 Pita 2:22) Wetem nambawan sakrifaes ya, naoia Jeova i gat stampa samting we i save yusum blong givim laef we i prapa wan.

Blong ol man we oli obei, bambae ransom sakrifaes blong Jisas i minim laef we i no save finis long paradaes long wol. (Ol Sam 37:29) Hop ya i go tu, long ol man we oli laef afta “faet long bigfala Dei blong God ya we i gat Olgeta Paoa,” hemia Amageden. (Revelesen 16:​14-16) Bambae i karemaot olgeta rabis fasin long wol ya. (Ol Sam 37:​9-11) Olgeta we oli stap long tingting blong God we oli ded bifo long taem ya, bambae oli laef bakegen long paradaes long wol mo bambae oli haremgud long laef ya we i prapa wan, we i blong ol man we oli obei long God.​—Jon 5:​28, 29.

Yumi Mas Lukaotgud Long Laef Blong Yumi Naoia

Samting ya i no min se i stret blong yumi no lukaotgud long laef blong yumi naoia. ?Bambae bos blong faktri i spenem taem mo mane blong wokemgud bakegen wan mesin blong wan wokman we i no lukaotgud long hem? Defren olgeta, ?bambae pos ya i no givim mesin ya we oli wokemgud bakegen, long wan man we i traem bes blong hem blong lukaotgud long hemia we i olfala?

Laef i wan nambawan presen we i kam long Jeova. Olsem nambawan stampa blong presen ya, Hem i wantem we yumi lukaotgud long hem. (Ol Sam 36:9; Jemes 1:17) Taem Jisas i tokbaot fasin blong Jeova blong tingbaot ol man long wol ya, hem i talem se: “Ol hea blong hed blong yufala be hem i kaontem evriwan finis.” (Luk 12:7) Jeova i talem long ol man Isrel blong oli no kilim man i ded, we i joen long fasin ya we man i kilim hem wan i ded. (Eksodas 20:13) Samting ya i halpem yumi blong blokem tingting ya we yumi wantem kilim i ded yumi wan.

Taem ol man we oli fraetgud long Jeova oli save olsem wanem Jeova i soemaot intres long yumi wetem fasin lav mo i keagud long yumi, oli folem ol rul blong Baebol long ol fasin blong laef tede. Eksampel, ol tru Kristin ‘oli mas mekem olgeta oli klin. Oli mas putumaot olgeta samting long bodi mo long tingting blong olgeta, we oli stap mekem oli doti long fes blong God. Oli mas traehad blong mekem fasin blong olgeta i klin, i tabu, oli blong God, from we oli stap onagud long hem.’ From samting ya oli stap longwe long fasin blong smok tabak mo ol drag we oli spolem tingting blong man.​—2 Korin 7:1.

Yumi save luk se God i gat intres long laef blong ol man, tru long advaes blong Hem blong gat wan “hat we i kwaet” mo blong blokem rabis fasin. (Proveb 14:30; Galesia 5:​19-21) Taem yumi folem ol hae rul ya, oli protektem yumi long ol bigfala samting we oli spolem helt blong yumi olsem ol sik from nogud fasin long saed blong seks.

Intres blong Jeova long laef blong ol man i klia tu, long advaes blong hem blong blokem fasin blong no kakae mo dring bitim mak. (Dutronome 21:​18-21; Proveb 23:​20, 21) Ol Kristin oli kasem woning ya se ol man we oli griri mo ol man we oli dring blong lusum hed bambae oli no save go insaed long Kingdom blong God, i min se, bambae oli neva kasem laef ya we i prapa wan. (1 Korin 6:​9, 10; 1 Pita 4:3) Taem Jeova i leftemap tingting blong yumi blong no bitim mak long ol fasin blong yumi, hem i stap tijim yumi blong givhangud long yumi.​—Aesea 48:17.

Taem yumi folem ol stret rul blong God, yumi soemaot se yumi lukaotgud long laef blong yumi. Yes, laef we i prapa wan i moa impoten. From we i laef ya i blong olwe, ol tru Kristin oli tinghae moa long hem bitim laef blong olgeta naoia. Taem Jisas Kraes i givim laef blong hem olsem wan sakrifaes, hem i putum hem i stap daon blong mekem wil blong Jeova. Fasin blong hem blong obei long Papa blong hem i moa impoten long hem bitim laef blong hem long wol. Fasin we Jisas i folem i mekem se hem i save laef bakegen mo i kasem laef long heven we neva bambae hem i ded bakegen. (Rom 6:9) Ded blong hem i minim laef we i no save finis long ol man we oli obei mo oli soemaot bilif long ransom sakrifaes blong hem.​—Hibrus 5:​8, 9; 12:2.

Wan Impoten Loa Long Saed Blong Blad

Yes, i klia se ol man blong Jisas oli soemaot sem tingting olsem we hem i soem. Oli traem blong mekem God i glad long olgeta samting, olsem we Kraes i mekem. Wan samting se, samting ya i soem from wanem oli no wantem blad transfyusen, we sam dokta oli talem se i sevem laef. Yumi save luk olsem wanem wan man i soem se hem i tinghae long laef we i prapa wan taem i no akseptem blad transfyusen.

Olsem Jisas Kraes, ol tru Kristin oli wantem blong stap laef long ae blong God, mo from samting ya oli mas obei fulwan long Hem. Tok blong God i givim advaes ya long ol man blong Kraes se: “Bambae yufala i no kakae ol kakae ya we man i yusum finis blong mekem wosip long ol narafala god. Bambae yufala i no kakae blad. Bambae yufala i no kakae anamol we man i jokem nek blong hem nomo, we blad i stap yet long mit blong hem. Mo bambae yufala i no mekem nogud long woman.” (Ol Wok 15:​28, 29) ?From wanem loa ya long saed blong blad i joen wetem ol loa we ol Kristin oli mas folem?

Loa we ol man Isrel oli kasem i askem olgeta blong no tekem blad nating. (Levitikas 17:​13, 14) Ol Kristin oli no stap aninit long Loa blong Moses. Be oli luksave se oda ya blong no kakae blad i stap finis bifo long Loa blong Moses; Noa i bin kasem loa ya afta we bigfala wora i ron. (Jenesis 9:​3, 4; Kolosi 2:​13, 14) Oda ya i go long olgeta pikinini blong Noa, we ol nesen blong wol oli kamaot long olgeta. (Jenesis 10:32) Mo tu, Loa blong Moses i halpem yumi blong luk from wanem God i talem bakegen mo bakegen se blad i tabu. Afta we God i askem ol man Isrel blong oli no kakae eni kaen blad, God i talem se: “Sol blong mit i stap long blad, mo mi putum long olta i blong yufala blong kavremap ol sin blong ol sol blong yufala, from we i blad we i mekem yufala i kavremap ol sin tru long sol we i stap long hem.” (Levitikas 17:11) God i kipim blad blong oli yusum long olta blong mekem sakrifaes. Loa blong Jeova long saed blong blad we i tabu, i soemaot paoa blong hem antap long olgeta laef long wol. (Esikel 18:4; Revelesen 4:11) Taem yumi luk laef blong yumi olsem we Jeova i luk, yumi luksave se laef ya i no blong yumi, be God nomo i givim long yumi.

Olsem man blong wok long pija tok blong yumi we i mas lukaot long mesin, yumi tu i mas lukaot long laef blong yumi. ?Bambae yu mekem wanem, sipos yu nidim blong fiksimap mesin blong yu mo wan mekanik i talem long yu se hem bambae i fiksimap, be hem i yusum ol pat we buk we i eksplenem olsem wanem blong yusum manis ya, i talem klia se oli no mas yusum? ?Bambae yu no tingbaot blong go long sam narafala mekanik bakegen blong luk sipos oli save fiksimap folem advaes we i stap long buk? Laef blong man i impoten moa mo i gat moa samting bitim bitim wan mesin. Long Tok blong hem, buk ya blong kipim ol man oli stap laef, Man ya we i Wokem Yumi i talem se i tabu blong yusum blad blong holem laef blong yumi. (Dutronome 32:​46, 47; Filipae 2:16) ?I stret blong yumi fasgud long ol loa blong buk ya?

Yes, ol sikman we oli Kristin taem oli no akseptem blad from sik blong olgeta, mo oli askem long ol dokta blong no yusum blad taem oli lukaot long olgeta, i no min se oli no wantem olgeta tritmen blong dokta. Oli askem nomo meresin we bambae i soem respek long laef blong olgeta​—naoia mo long fyuja. Ol dokta we oli no fraet blong soem respek long disisen blong ol Kristin, oli luksave ol gudfala frut we i kamaot, taem oli tritim olgeta long wei we oli askem. Wan dokta we i lan blong givim blad oltaem long ol sikman, i talem se “taem mi mitim ol Wetnes blong Jeova, samting ya i lidim mi blong lukluk ol samting long wan nyufala rod.” Naoia hem i traem blong no yusum blad blong tritim olgeta we oli no Wetnes tu.

Lukaotgud Long Laef We i Prapa Wan

?Wanem nyufala rod blong lukluk samting we dokta ya i faenem taem i tritim ol Wetnes blong Jeova? Naoia hem i luksave se fasin blong tritim wan sikman i no jes blong lukaot long haf blong bodi we i kasem sik nomo be hem i lukaot long man ya fulwan. ?Sikman i gat raet blong askem beswan meresin blong hem i save haremgud long saed blong bodi, speret mo long saed blong filing?

Blong Kumiko we i gat 15 yia, blad transfyusen i rod we i nogud moa blong tritim rabis sik ya leukemia, we hem i kasem. Yusum rod ya blong traem mekem laef blong hem i longfala moa blong sam wik, sam manis, no sam yia tu i nogud olsem ol blesing we bambae hem i kasem long fyuja. Hem i givim laef blong hem i go long Jeova God olsem wan long ol Wetnes blong hem, from samting ya hem i respektem laef mo blad we oli tabu. Nating se papa blong hem mo ol narafala famle oli strong blong agensem disisen blong hem, Kumiko i stanap strong. Wantaem dokta blong hem i askem se: “Sipos God blong yu i fogivim ol mastik, ?bambae i no save fogivim yu tu, sipos yu akseptem wan blad transfyusen?” Kumiko i no agri blong lego bilif blong hem we i stanap long Baebol. “Taem hem i holemtaet tok blong laef,” hem i stanap strong. (Filipae 2:16) Olsem bubu woman blong hem we i no Kristin i talem se, “Kumiko i no save lego bilif blong hem.” I no longtaem, fasin blong papa, bubu woman blong hem mo blong dokta tu, i jenis.

Strong bilif blong Kumiko long Jeova God, se hem i save mekem hem i laef bakegen long ded, i tajem hat blong plante man. Taem hem i laef yet, hem i askem strong long papa blong hem se: “Nating sipos mi ded, bambae mi laef bakegen long Paradaes. Be sipos yufala i lus long Amageden, bambae mi no moa luk yufala. Taswe plis stadi long Baebol.” Papa blong hem i jes gohed blong talem se: “Taem yu kam oraet, bambae mi mekem.” Be taem Kumiko i ded from sik blong hem, papa blong hem i putum wan smol not long kofin blong hem we i talem se: “Bambae mi luk yu long paradaes, Kumiko.” Afta we oli berem hem i finis, papa blong hem i toktok long olgeta we oli stap mo i talem se: “Mi promes long Kumiko se bambae mi luk hem long paradaes. Nating se mi no bilivim yet from we mi no stadi i naf, mi gat strong tingting blong luklukgud long samting ya. Plis halpem mi.” Sam narafala long famle blong hem tu, oli stat stadi Baebol.

Kumiko i gat trufala respek long laef mo i wantem blong laef. Hem i glad long olgeta samting we ol dokta blong hem oli mekem blong sevem laef blong hem. Hem i pruvum se hem i tinghae long laef ya we i prapa wan, taem i obei long ol advaes we i stap long buk blong Man ya we i Wokem Olgeta Samting. Blong plante milyan man, bambae hemia laef we i no save finis long wol. ?Bambae yu stap long medel blong olgeta?