Smol Be i Gat Paoa

ROBERT, wan yangfala man blong Kanada, i wokbaot tru long Yurop blong lukaotem mining blong laef blong hem. Hem i luk plante samting we i mekem tingting blong hem i foldaon long saed blong fyuja.

Taem hem i stap sidaon long wan ples blong kofe long Sevil, Spen, Robert i kasem wan traket we ol Wetnes blong Jeova oli wokem. Fastaem Robert i no tingting tumas long samting ya. Hem i talem se, “be afta, mi rili ridim. Mi no save eksplenem, be mi harem se wantaem nomo i gat samting we i gat mining. Taem mi stap wokbaot, mi bin luk plante samting we i mekem ol man oli harem nogud mo tingting i foldaon, mo mi kros tumas from mi no naf blong jenisim ol samting. Afta we mi ridim traket ya, mi stat blong tingbaot se: ‘?Olsem wanem, i gat jans blong “nyufala wol” ya i kamtru?’ Afta, mi tingting se, ‘Yes, maet nyufala wol ya bambae i kam tru.’ ”

Wetem nyufala hop ya, Robert i raet i go long ofis blong ol Wetnes blong Jeova long Kanada, mo askem se wan man i kam visitim hem taem hem i gobak long ples blong hem, blong halpem hem blong kasem save long Baebol.

Yes, ol tok we oli talem i gat paoa. Be, yumi neva mas ting nating long paoa blong mesej we oli raetem. Nating se oli smol, ol buk we oli tokbaot Baebol oli gat bigfala paoa. Oli kasem maen mo hat, oli givim wan gudfala hop long fyuja.​—Hibrus 4:12.