Hem i Akseptem Rod We God i Soem Long Hem

!TINGBAOT se oli askem yu blong lukaot long wan pikinini we i stretgud olgeta, oli askem yu blong lukaotgud mo blong keagud long hem! ?Olsem wanem wan man we i no stretgud olgeta i save mekem samting ya? Sipos hem i akseptem nomo we God i soem long hem mo folem rod ya long evridei laef blong hem.

Hemia samting we Josef i bin mekem, papa blong Jisas we i adoptem hem. Defren olgeta long ol kastom store long saed blong Josef, Baebol i talem smol samting nomo long saed blong wok we hem i bin mekem wetem tingting daon, long ol faswan yia blong laef blong Jisas. Yumi save se Josef mo waef blong hem, Meri, oli lukaot long Jisas, long fo narafala boe, mo sam gel tu​—Mak 6:3.

Josef i wan bubu blong King Deved blong Isrel, mo i bon long laen blong Solomon. Hem i pikinini blong Jekob mo i palika blong Heli. (Matyu 1:16; Luk 3:23) Olsem wan kapenta long taon blong Nasaret, Josef i no gat plante mane. (Matyu 13:55; Luk 2:​4, 24; skelem wetem Levitikas 12:8.) Be hem i rij long saed blong speret. (Proveb 10:22) Samting ya i tru tumas from hem i akseptem rod we God i soem long hem.

Yes, Josef i wan man Jyu we i rili gat tingting daon, we i gat bilif long God mo i laekem blong mekem samting we i stret. Sam samting we i hapen long laef blong hem we Baebol i tokbaot i soem se hem i obei oltaem long ol loa blong Jeova. Be hem i mekem olsem nomata we hem i wan samting we oli raetem long Loa no we Josef i kasem tru long ol enjel stret.

Wan Stret Man We i Gat Ol Problem

?Wan man we i fasgud long God i mas mekem wanem taem hem i stap fesem wan bigfala problem? !Hem i mas ‘putum ol trabol blong hem long Hae God’ mo folem rod we God i soem long hem! (Ol Sam 55:22) Hemia wanem we Josef i mekem. Taem hem i promes blong maredem Meri, “taem tufala i no mared yet, tabu speret i mekem Meri i gat bel.” From we Josef i ‘wan stret man, mo hem i no wantem mekem Meri i sem. Hem i wantem blong oli brekem promes ya, be long kwaet fasin nomo.’ Afta we Josef i tingtinggud long bisnes ya, enjel blong Jeova i kamtru long hem long wan drim mo i talem se: “Josef yu laen blong Deved, yu no fraet blong tekem woman ya Meri, blong i woman blong yu. From we tabu speret i givim pikinini ya long hem. Bambae Meri i bonem wan boe, mo yu mas putum nem blong hem se Jisas, we i minim se sevya, from we hem bambae i sevem ol man blong hem, i tekemaot ol sin blong olgeta.” Taem Josef i wekap, “hem i mekem olsem enjel ya blong Hae God i talem long hem. Hem i mared long Meri, be i no slip wetem hem gogo Meri i bonem boe blong hem. Mo Josef i putum nem blong pikinini ya se Jisas.” (Matyu 1:​18-25) Josef i akseptem rod we God i soem long hem.

Sisa Ogastas i mekem wan loa, se ol man oli mas go rejista long prapa taon blong olgeta. Blong obei long oda ya, Josef mo Meri oli go long Betlehem long Judia. Long ples ya nao Meri i bonem Jisas long hem mo i mas putum hem i slip long wan ples we ol buluk oli stap kakae long hem, from i no moa gat ples blong slip. Long naet ya, ol man blong lukaot long sipsip we oli harem spesel mesej we enjel i talem long olgeta long saed blong pikinini ya we i bon, oli kam blong luk hem. Kolosap 40 dei biaen, Josef mo Meri oli folem Loa taem oli karem Jisas i go long haos prea long Jerusalem wetem wan sakrifaes. Tufala tugeta oli sapraes taem oli harem ol tok profet blong olfala Simeon long saed blong wanem Jisas bambae i mekem.​—Luk 2:​1-33; skelem wetem Levitikas 12:​2-4, 6-8.

Nating se Luk 2:39 i soem olsem we Josef mo Meri oli bin go stret long Nasaret afta we oli karem Jisas i go long haos prea, vas ya i haf blong wan store we oli katem i sot. I klia se samtaem afta we oli karem Jisas i go long haos prea, sam man blong lukluk long sta we oli blong kantri blong wes, oli bin visitim Meri mo Jisas long haos long Betlehem. God i mekem wan samting blong blokem visit ya blong i no givim ded long Jisas. Afta we ol man ya blong lukluk long sta oli go, enjel blong Jeova i kamtru long Josef long wan drim mo i talem long hem se: “King Herod i lukaot pikinini ya blong kilim hem i ded.” Olsem oltaem, Josef i akseptem rod ya we God i soem long hem mo tekem famle blong hem i go long Ijip.​—Matyu 2:​1-14.

Afta we Herod i ded, wan enjel i kamtru long Josef long wan drim long Ijip, i talem se: “Yu girap, yu tekem pikinini ya wetem mama blong hem, yufala i gobak long kantri ya Isrel.” Taem Josef i harem se pikinini blong Herod Akaleas i rul long ples blong papa blong hem, Josef i fraet blong gobak long Judia. Taem hem lesin long rod we God i soem long hem long wan drim, hem i go long Galili mo stap laef long taon blong Nasaret.​—Matyu 2:​15-23.

Wan Man Long Saed Blong Speret

Josef i bin mekem ol samting blong mekem se famle blong hem oli obei long ol loa blong God mo oli gat kakae long saed blong speret. Evri yia hem i tekem ful famle blong hem wetem i go long Lafet blong Pasova long Jerusalem. Long wan long ol taem ya, Josef mo Meri tufala i stap gobak long Nasaret mo maet oli wokbaot wan dei finis aot long Jerusalem, taem oli faenemaot se Jisas we i gat 12 yia blong hem i no stap wetem olgeta. Oli gobak long Jerusalem oli lukaotemgud hem, mo oli faenem hem long haos prea, we hem i stap lesin mo askem kwestin long ol tija long ples ya.​—Luk 2:​41-50.

I luk olsem se samtaem Josef i letem waef blong hem i mekem faswan samting. From we taem oli gobak long Jerusalem mo faenem Jisas long haos prea, hem i Meri we i toktok long yangfala pikinini boe blong hem long bisnes ya. (Luk 2:​48, 49) Taem hem i stap gruap olsem “wan pikinini boe blong wan kapenta,” Jisas i stap kasem ol tijing long saed blong speret. Josef i tijim hem tu long wok blong kapenta, from oli kolem Jisas se “man blong wokem haos, i pikinini blong Meri.” (Matyu 13:55; Mak 6:3) Tede ol papa mama we oli fasgud long God oli mas yusumgud ol jans olsem, blong tijim ol pikinini blong olgeta, antap moa taem oli givim trening long olgeta long saed blong speret.​—Efesas 6:4; 2 Timote 1:5; 3:​14-16.

Hop Blong Josef

Baebol i no tokbaot ded blong Josef. Be i gud blong makemgud, se Mak 6:3 i kolem Jisas se “pikinini blong Meri,” i no blong Josef. Samting ya i soem se Josef i bin ded finis. From, sipos Josef i bin laef tru kasem 33 K.T., bambae i no stret se Jisas i askem aposol Jon blong lukaot long Meri, taem hem i stap long pos.​—Jon 19:​26, 27.

Yes, Josef bambae i stap long medel blong olgeta we bambae oli harem voes blong Pikinini blong man mo kamaot blong laef bakegen. (Jon 5:​28, 29) Taem hem i lanem ol samting we Jeova i mekem blong givim laef we i no save finis, bambae Josef i glad blong akseptem ol samting ya. Mo bambae hem i kam wan sabjek we i obei long bigfala King long heven, Jisas Kraes, olsem we hem i folem rod we God i soem long hem bitim 1,900 yia i pas finis.

[Tok blong pija long pej 31]

Josef i tijim ol samting long saed blong speret long Jisas mo tu hem i tijim hem long wok blong kapenta